Qarabağdan Ermənistana köç edən ermənilərin Nikol Paşinyan hakimiyyətinə qarşı istifadə olunması bu ölkədə radikal müxalifətin xüsusi maraq dairəsində yer alır. Görünən budur ki, həmin ermənilərdən istifadə etməyə çalışan “Qarabağ klanı” Ermənistanda yenidən təşkilatlanmağa çalışır.
Bu fonda Paşinyana qarşı yeni informasiya kampaniyasının aparıldlğı da müşahidə olunur.
Qeyd edilənlər fonunda “Qraparak“ qəzeti iddia edir ki, Ermənistanın baş naziri Nikol Paşinyan şəxsən Qarabağ separatçılarının sonuncu başçısı Samvel Şahramanyanı qondarma qurumu ləğv etməyə çağırıb. Bildirilir ki, Azərbaycanın tələblərini irəli sürməsindən sonra Samvel Şahramanyan Ermənistan Təhlükəsizlik Xidmətinin direktoru Armen Abazyanın vasitəçiliyi ilə Nikol Paşinyanla telefon danışığı aparıb. Paşinyan lokal xarakterli antiterror tədbirləri zamanı Şahramanyanı Azərbaycanın bütün tələbləri ilə razılaşaraq eskalasiyanı dayandırmaq üçün hər şeyi etməyə çağırıb: “Xüsusilə azərbaycanlılar “Artsax”ın özünü buraxması, “dövlət institutları”nın, “ordu”nun ləğvi, Azərbaycan Silahlı Qüvvələrinə silah-sursatın təhvil verilməsi barədə tələblərin öz əksini tapdığı qərarı Qarabağdakı ermənilərə çatdırarkən Şahramanyan Milli Təhlükəsizlik Xidmətinin direktoru Armen Abazyanla əlaqə saxlayıb və onun vasitəçiliyi ilə Paşinyanla bircə dəfə telefon danışığı olub. Həmin söhbətdə Ermənistanın baş naziri onu Azərbaycanın bütün tələblərini dərhal yerinə yetirməyə və müharibənin Ermənistan ərazisinə keçməsinin qarşısını almağa çağırıb”. İndi belə vəziyyətdə Samvel Şahramanyan da Paşinyanı zərbə altında qoymağa çalışır. Məsələn, Şahramanyan “Artsax”ın özünü buraxmadığını iddia edib. Ermənistan parlamentinin müdafiə və təhlükəsizlik komissiyasının rəhbəri Andranik Köçəryan baş separatçını tənqid edib. Şahramanyanla bağlı sualı cavablandıran Köçəryan onun bu açıqlamasından qıcıqlandığını gizlətməyib: “Qoy Şahramanyan qərar versin ki, o kağıza imza atıb, ya yox. Əgər Samvel o sənədə qol çəkməyibsə, niyə indi Ermənistandadır? Axı Qarabağda vəzifə başında olmalı idi. Belə olan halda qarabağlılar niyə evlərini tərk etdilər?”. Artan qarşıdurma fonunda Qarabağdan qaçan bəzi separatçılar haqqında artıq Ermənistanda cinayət işləri açılıb. Məsələn, Azərbaycanda terrorçu kimi axtarışda olan separatçıların liderlərindən biri olan Vitali Balasanyan artıq Ermənistanın Milli Təhlükəsizlik Xidməti tərəfindən dindirilib. Qondarma qurumun keçmiş “təhlükəsizlik şurasının sədri” Samvel Babayana qarşı da iki maddə ilə cinayət işi açılıb. Beləliklə, Paşinyan Ermənistanda yeni “Qarabağ klanı”nın yaranmasına imkan vermək istəmir. Vitali Balasanyan və Samvel Babayan kimi fiqurlar təşkilatlanaraq Ermənistan müxalifətini gücləndirə və yeni cəbhə yarada bilərlər. Robert Köçəryan, Serj Sarkisyan kimi fiqurların onlara hər cür dəstək verəcəyi də gözləniləndir. Bu səbəbdən Paşinyan işini ehtiyatlı tutaraq, barələrində cinayət işləri açmaqla onları təzyiq altında saxlamağa çalışır. “Qarabağ klanı”nın əsas hədəfi isə Ermənistanda daxili siyasi-ictimai gərginliyi maksimum həddə çatdırmaqdır. Bu radikal-revanşist düşərgə, sosial problemlər dərinləşdikcə, Ermənistanda kütləvi etiraz dalğasının da güclənə biləcəyinə ümid bəsləyir. Qarabağdan könüllü köçən erməni azlığı bu baxımdan onların işinə yaraya bilər.
Beləliklə, Ermənistandakı hakimiyyət təmsilçiliyində Qarabağ amilinin ön plana çıxma təhlükəsi var. Qeyd edək ki, uzun müddət bu tendensiya ölkənin siyasi mənzərəsini müəyyənləşdirib. Düzdür, Azərbaycan 44 günlük müharibədə və 1 günlük antiterror tədbirlərində məqsədinə nail olmaqla bu xüsusda ideoloji əsası məhvə məhkum edib. Bu gün Ermənistanda gedən proseslər müharibənin vurduğu zərbənin təsirləridir. Amma görünən budur ki, Qarabağ avantürizmini Ermənistanın ictimai-siyasi mühitinə təməlli keçirmək istəyən qüvvələr aktivləşib. Onlar müharibə rüsvayçılığını Paşinyan iqtidarına başa qaxınc şəklində, mənəvi məsuliyyət şəklində qabardaraq, onu nüfuzdan salmaq, nəticə etibarilə siyasi səhnədən tamamilə uzaqlaşmasına nail olmaq istəyirlər. Paşinyan isə hələlik inzibati yolla rəqiblərini neytrallaşdırdığını düşünür və hazırda bütün diqqətin Qarabağdan köç edən ermənilərə yönəlməsi üzərində işləyir. Bununla həm daxili problemlərdən yayınmaq, həm də müxalifəti, qısamüddətli olsa da, fasiləyə şövq etmək istəyir. Amma Ermənistanın keçmiş prezidentlərinin açıqlamaları vəziyyətin başqa məcrada davam edəcəyindən xəbər verir. Keçmiş prezident Serj Sarkisyan açıqlama verərək Qarabağ məsələsinin onun üçün bitmədiyini bildirib. Bu, artıq Qarabağ məsələsinin tarixə qovuşduğunu üstüörtülü bəyan edən Paşinyana mesajdır. Görünür, Sarkisyan revanşa hazırlaşır və bunun üçün də Qarabağdan köçən ermənilərə ümid edir. O, Paşinyanı devirmək üçün Qarabağdan köçən ermənilərə, sabiq prezident Robert Köçəryana və erməni diasporuna ümid edir. Paşinyan iqtidarı reallıqla hesablaşır və onu devirmək ssenarisinin işə düşə biləcəyini görür. Bu səbəbdən, güc yolu ilə olsa da, rəqiblərini sıradan çıxarmağı düşünür.
Samirə SƏFƏROVA
