Bazar ertəsi Parisdə Ermənistan və Fransanın müdafiə nazirləri Thales istehsalı olan üç GM 200 radarının satışına dair müqavilə imzalayıblar. Həmçinin gələcəkdə “Mistral” qısamənzilli hava hücumundan müdafiə sistemlərinin tədarükünə dair memorandum imzalanıb.
"Səmanın qorunması tamamən mühüm məqamdır", - Fransa müdafiə naziri Sebastiyan Lekornü Ermənistanın müdafiə naziri Suren Papikyanla birgə mətbuat konfransı zamanı bildirib.
O deyib ki, Fransa Ermənistana quru müdafiə qüvvələrini hazırlamağa kömək edəcək və ölkənin Silahlı Qüvvələrində islahatların aparılması və modernləşdirilməsi səylərini dəstəkləyir: “Biz müdafiə sahəsində Ermənistanla münasibətlərimizi dəstəkləyirik, baxmayaraq ki, eyni hərbi və siyasi ittifaqların bir hissəsi deyilik”.
Maraqlıdır, bütün bunları ekspertlər necə dəyərləndirir?
“Həm GM200 radarı, həm də “Mistral” yaxınmənzilli hava hücumundan müdafiə sistemləri müdafiə xarakterlidir”
Sözügedən məsələni “Bakı-Xəbər”ə şərh edən politoloq Turan Rzayev hesab edir ki, burada söhbət müdafiə xarakterli silahlardan söhbət gedir: “Lekornu bildirib ki, Fransa Ermənistana qurudan müdafiə qüvvələrini hazırlamağa kömək edəcək və ölkənin silahlı qüvvələrinin islahatları, modernləşdirilməsi səylərini dəstəkləyəcək. Həm GM200 radarı, həm də “Mistral” yaxınmənzilli hava hücumundan müdafiə sistemləri müdafiə xarakterlidir. Fransa bu məqamı xüsusilə vurğulayır. Aydın məsələdir ki, Fransa bu məqamı Rusiya faktoruna görə qeyd edir. Bundan başqa, regionun digər ölkələri İran və Türkiyənin də məsələyə narazılıq bildirməsi ehtimalını bu açıqlama ilə neytrallaşdırmaq istəyir. Fransanın əsas məqsədi isə bu silahların Azərbaycana qarşı istifadəsini təmin etməkdir. Məsələ ondadır ki, Ermənistana veriləcək qurğular, silahlar müdafiə xarakterli olsa da, gec-tez Azərbaycana qarşı ehtimal müharibədə istifadə edilməsi planlaşdırılır. Misal üçün, “Mistral” yaxınmənzilli hava hücumundan müdafiə sistemləri PUA-ların vurulmasında effektivdir. Lakin bundan başqa bu sistemlərlə helikopter və qırıcı təyyarələrini də vurmaq mümkündür. GM200 isə hava nəzarəti boşluqlarını dolduran və ya hava hücumundan müdafiə sistemi üçün sensor kimi fəaliyyət göstərir. GM200 həmçinin raket, artilleriya, minaatana qarşı xəbərdarlıq qabiliyyətinə malikdir. Azərbaycan daha çox PUA, dron texnologiyalarında ixtisaslaşıb və hazırda ən güclü PUA, dron ehtiyatına sahib ölkələrdəndir. Bu fakt belə öz növbəsində Fransanın qeyd edilən qurğuları və sistemləri Ermənistana Azərbaycana qarşı ehtimal müharibədə istifadə edilməsi üçün verdiyini təsdiqləyir. Aydındır ki, Parisin İrəvana verəcəyi GM200 radarları və “Mistral” yaxınmənzilli hava hücumundan müdafiə sistemləri Ermənistan ordusunu gücləndirəcək. Bunu həm də Fransa ilə Azərbaycan arasında gedən soyuq müharibənin ilk ciddi təzahürü kimi qiymətləndirmək olar. Fransa bununla Azərbaycana zərbə vurduğunu düşünsə də, rəsmi Bakının Parisə vurduğu zərbə daha effektiv və təhlükəlidir. Söhbət bir neçə gün öncə Bakıda Bakı Təşəbbüs Qrupunun təşkilatçılığı ilə keçirilən “Neokolonializm: İnsan Hüquqlarının Pozulması və Ədalətsizlik” adlı beynəlxalq konfransdan gedir. Konfransda 14 ölkədən, eləcə də Fransanın müstəmləkə altında saxladığı dənizaşırı ərazilərin (Yeni Kaledoniya, Fransız Polineziyası, Fransız Qvianası, Martinika və Qvadelupa), həmçinin Korsikanın təmsilçiləri də iştirak etdi”.
Vidadi ORDAHALLI
