İkinci Qarabağ müharibəsi Azərbaycanın qələbəsi ilə bitdi. Xalqımız öz torpaqlarını erməni işğalından azad etdi. Məlum olduğu kimi, işğaldan azad olunan ərazilərdə infrastruktur yenilənir.
Prezident İlham Əliyevin əzmi və qətiyyəti, uzaqgörən siyasəti sayəsində erməni faşistləri tərəfindən viran qoyulmuş şəhər və kəndlərimiz, tarixi, mədəni, dini abidələrimiz tez bir zamanda bərpa olunur, insanlar öz ata-baba yurdlarına qayıdır. Yerli əhali öz doğma yurdlarına qayıtdıqdan sonra onların dayanıqlı məskunlaşmasını təmin etmək, bu əraziləri cəmiyyətin sağlam, müasir və abad yaşayış mühitinə çevirmək üçün artıq genişmiqyaslı işlərə başlanılıb. Əhalinin təhlükəsizliyi üçün hıəmin ərazilərdə yerli polis idarələri də yaradılır. Məlumdur ki, bu günlərdə Azərbaycan Daxili İşlər Nazirliyinin (DİN) Xankəndi şəhərində polis şöbəsi yaradılıb. Bu barədə sosial şəbəkələrdə foto paylaşılıb. Belə ki, sözügedən fotoda şöbənin lövhəsi əks olunub.
“Böyük Qələbənin əldə olunmasında Azərbaycan Daxili İşlər orqanlarının özünəməxsus sanballı payı vardı”
Xankəndidə polis idarəsinin yaradılmasının əhəmiyyəti haqqında danışan hərbçi ekspert Rasim İsgəndərov “Bakı-Xəbər”ə açıqlamasında bunları qeyd etdi: “Vətənə, xalqa, Ulu Öndərin irsinə, Prezidentin kursuna sədaqət andına daim sadiq olan Azərbaycan Polisi şanlı missiyasını, məsuliyyətli fəaliyyətini indi daha yeni, təkmil istiqamətlərlə davam etdirir. İşğaldan azad olunan ərazilərdə vətəndaşların əminamanlığının, təhlükəsizliyinin yüksək səviyyədə təmin edildiyi dövlət imicini Azərbaycan daim möhkəmləndirir. Xankəndidə yerli polis idarəsinin yaradılması olduqca əhəmiyyətlidir. Bu gün orada polis fəaliyyət göstərir. Həmin ərazilərdə polisin olması təhlükəsizlik baxımından vacibdir. Nəzərə almaq lazımdır ki, polis və Daxili Qoşunlar milli maraqların, sabitliyin və asayişin keşiyində mətinliklə dayanır, insan və vətəndaş hüquq və azadlıqlarının müdafiəsi üçün səylə çalışırlar”.
Həmsöhbətimiz onu da əlavə etdi ki, Böyük Qələbənin əldə olunmasında Azərbaycan Daxili İşlər orqanlarının özünəməxsus sanballı payı var: “Ordumuzun tərkib hissələrindən olan Daxili Qoşunların xüsusi təyinatlıları 44 günlük Vətən müharibəsində hünərlə vuruşub”.
Günel CƏLİLOVA
