Mühüm diplomatik tədbir çərçivəsində beş əsas ölkənin Xarici İşlər Nazirləri Tehranda "3+3" regional mexanizminin ikinci iclasına toplaşaraq BMT Nizamnaməsində təsbit olunmuş prinsiplərə sadiq olduqlarını və mübahisələrin sülh yolu ilə həllinin vacibliyini vurğulayıblar.
“3+3” formatı çərçivəsində görüşün keçirilməsi və bir sıra qərarların qəbul olunması fonunda, İranın yollar və şəhərsalma naziri Mehrdad Bəzrpaş Zəngəzur dəhlizi ilə bağlı çox yersiz açıqlama ilə çıxış edib: “İran Zəngəzur dəhlizinə qarşıdır. Azərbaycan tərəfi ilə görüşlərdə biz dəfələrlə Zəngəzur dəhlizi ilə razılaşmadığımızı və bunun əleyhinə olduğumuzu bildirmişik. Bizim siyasətimiz Qafqazda sülhə əsaslanır. İnanırıq ki, region ölkələri özləri üçün ən yaxşı qərarları verə biləcəklər. İran həmişə Ermənistanın ərazi bütövlüyünü dəstəkləyib və gələcəkdə də dəstəkləyəcək. Ermənistan İran üçün çox vacibdi”.
Heç belə qərəzli açıqlamanın yeridir? Region ölkələri rəsmilərinin Tehranda bir araya gəlməsi fonunda bu dərəcədə qərəzli olmaq olar?
“İranla düşmən olan Qərbin kəşfiyyatçıları, təlimatçıları Ermənistan ərazisində fəaliyyət göstərirlər”
Sözügedən məsələ ilə bağlı fikirlərini “Bakı-Xəbər”lə bölüşən Böyük Azərbaycan Partiyasının sədri Elşad Musayev hesab edir ki, bütün bunlar İranın əsl niyyətini ortaya qoyur: “Məlum olduğu kimi, 5 ölkə xarici işlər nazirlərinin iştirakı ilə “3+3” formatı çərçivəsində görüş keçirildi. Görüşdə bir sıra məsələlər müzakirə olundu. Azərbaycan xarici işlər nazirinin mövqeyi daha çox ondan ibarət idi ki, bölgə məsələləri əsasən region ölkələri tərəfindən həll olunmalıdır. Eyni zamanda, kommunikasiya xətlərinin keçməsi birbaşa regiona aid olan məsələlərdir. Belə müzakirələrin getdiyi bir vaxtda İranın yollar və şəhərsalma naziri Mehrdad Bəzrpaş tamamilə mənasız və təxribat xarakterli mövqe sərgiləyib. Özü də o, bunu Ermənistanda səfərdə olarkən deyib. Bu onu göstərir ki, nə qədər çətin vəziyyətdə olsalar da, İranın fars-molla rejiminin rəhbərləri, onların ayrı-ayrı məmurları hələ də rasional düşünə bilmirlər. Başa düşmürlər ki, Azərbaycandan İrana təhlükə yoxdur. İrana təhlükə yaranarsa, bu, Ermənistandan qaynaqlanacaq. Çünki İranla düşmən olan Qərbin kəşfiyyatçıları, təlimatçıları Ermənistan ərazisində fəaliyyət göstərirlər. Bu gün Avropa İttifaqının müşahidə missiyası çətiri altında Fransanın, Almaniyanın hərbçiləri Ermənistandadır. Faktiki bunlar yarıhərbi strukturlardır. Əgər Ermənistana Qərbin hərbi qüvvələri gələcəksə, bunlar vasitəsilə İrana təhlükə yaradacaqlar. Həmin kəşfiyyatçılar Ermənistandakı vəziyyəti öyrənir və münasib zəmini formalaşdırırlar. Nə qədər kor olasan ki, bütün bunları görməyəsən. Ona görə də İran rəsmisinin bu mövqeyi təəssüf doğurur. O cümlədən biz ehtiyatımızı əldən verməməliyik. Xüsusilə İrana qarşı diqqətli olmalıyıq. Çünki molla rejimindən istənilən vaxt istənilən addımı gözləmək olar. Ancaq İranın Azərbaycan-Türkiyə birliyinə qarşı çıxmaq potensialı yoxdur”.
Vidadi ORDAHALLI
