Ermənistan Milli Assambleyasının Müdafiə və Təhlükəsizlik üzrə Daimi Komitəsinin üzvü Andranik Köçəryan bildirib ki, Ermənistan “Artsax” hakimiyyətinin Ermənistana köçdükdən sonra “Artsax” ermənilərinin cavab gözlədiyi sualları cavablandırmasını istəyir:
“Bu səlahiyyətlilər bir gün “imza atdıq” deyirlər, ertəsi gün deyirlər ki, heç nəyə imza atmayıblar, sonra deyirlər ki, məmurlar vəzifəsini itirə bilməz”.
A.Köçəryan qeyd edib ki, “Artsax prezidenti” Samvel Şahramanyan “Artsax”ın ləğvi haqqında sənədi imzalayıb-imzalamadığına qərar verməlidir:
“Əgər o imza atmayıbsa, niyə Ermənistandadır? O, “Artsaxda prezident” vəzifəsini icra etməli idi. Əgər sənədin etibarlı olmadığını bəyan edirsə, o zaman sual yaranır ki, “Artsax” erməniləri niyə öz evlərini tərk ediblər?”
Göründüyü kimi, Samvel Şahramanyanın “Artsax buraxılmayıb” bəyanatı Ermənistanın özündə belə qeyri-ciddi qəbul olunur.
Politoloq Rəşad Bayramov “Bakı-Xəbər”ə açıqlamasında bildirdi ki, bu, ölünü yenidən həyata qaytarmaq cəhdinə bənzəyir: “Görünür, saxta “prezidentlik” arzusu ürəyində qalan Şahramanyanın Ermənistanda sıravi adam kimi qəbul edilməsi heç ürəyincə deyil: “Qondarma qurumun ləğvinə onun özü imza atıb və qaçıb Ermənistana. Nə qədər qəribə olsa da, indi də özü-özünü təkzib edir. Deyir ki, güya “Atrsax” buraxılmayıb. Əslində “Artsax” adlı qurum legetim formada heç olmayıb da. Şahramanyanın bu sərsəmləməsinin Ermənistan cəmiyyətinin özündə belə gülüşlə qarşılanması təsadüfi deyil. Çünki bu, özünə haqq qazandırmaqdan başqa nəsə deyil. Şahramanyan belə edir ki, işsiz qalmasın. Saxta “Artsax” adından çıxışlar, səfərlər etsin. Ən əsası isə, maliyyə yardımı alıb, özünü dolandırmağın asan yolunu tapmaq istəyir. Şahramanyan eyni zamanda erməni cəmiyyəti üçün kifayət qədər məsuliyyət tələb edən bu addımına haqq qazandırmağa çalışır. Əslində saxta “prezident” doğru qərar qəbul edib, sadəcə, ictimai qınaqdan yayınmağa çalışır. Bu çabaların heç bir faydası yoxdur. Şahramanyan sevinsin ki, özündən əvvəlki üç saxta “prezident” kimi DTX-nın təcridxanasında deyil. Erməni mediası yazır ki, Samvel Şahramanyan qondarma qurumun buraxılması haqqında "sərəncam"ı Ermənistanın baş naziri Nikol Paşinyanın çağırışı ilə imzalayıb.
Ermənistan ictimaiyyətini inandırmağa çalışırlar ki, təslim aktını Samvel Şahramanyan imzalayıb və bunun Nikol Paşinyana heç bir aidiyyəti yoxdur. Əslində isə Baş nazir bu sərəncamın mətnindən şəxsən xəbərdar olub, şəxsən Şahramanyana Azərbaycanın bütün tələbləri ilə razılaşaraq hərbi eskalasiyanı dayandırmaq üçün hər şeyi etməyi məsləhət görüb.
Məlumata əsasən, Şahramanyan Ermənistan milli təhlükəsizlik xidmətinin direktoru Armen Abazyanla əlaqə saxlayıb və onun vasitəsilə Nikol Paşinyanla telefon danışığı olub. Baş nazir onu Azərbaycanın bütün tələblərini dərhal yerinə yetirməyə və müharibənin Ermənistan ərazisinə keçməsinin qarşısını almağa çağırıb. Bütün bunlardan sonra Şahramanyanın atdığı bu addımlar daxili auditoriyaya hesablanan komediyadan başqa nəsə deyil”.
Qeyd edək ki, Qarabağdakı keçmiş separatçı rejimin rəhbəri Samvel Şahramanyan sentyabrın 28-də qondarma qurumun buraxılması haqqında "sərəncam" imzalayıb.
Məhəmmədəli QƏRİBLİ
