Abxaziyanın dinc gürcü əhalisinə qarşı vəhşilikləri ilə məşhur olan erməni Baqramyan adına erməni batalyonu, təəssüf ki, separatçı müharibədə və suveren dövlətə qarşı təcavüzdə iştirak edən yeganə erməni quldur dəstəsi deyil. Bu fikirlər “Kavkazplus” nəşrində yer alıb.
Qeyd olunur ki, Ukrayna ərazisində erməni silahlılarının – “baqramyançıların” qanlı “ənənələrini” Kremlin köməyi ilə yaradılan elə abxaz separatçılarının “Arbat” batalyonunu erməni silahlıları davam etdirməyə hazırlaşır: “Ukraynaya qarşı müharibə üçün bu erməni “Arbat” batalyonunun yaradılmasına və bu cinayətkar müharibə üçün ermənilərin Eçmiədzindən xeyir-dua almasına həsr olunmuş bəyanatı separatçı komandir Axra Avidzba səsləndirib. O, Ukrayna ərazisində erməni silahlılarına rəhbərlik edəcək. Moskvadakı Erməni Apostol Kilsəsində Donbasa göndərilən “Arbat” erməni batalyonunun tərkibində yer alan döyüşçülərə xeyir-dua mərasimi keçirilib. Axra Avidzba deyib: “Ermənilər bütün bölmələrdə təmsil olunublar və Qorlovkada “Arbat” dəstəsi var. Biz göstərmək istəyirik ki, Rusiyada hamı birləşib, xalqlar birləşib. Komandirlərin və ictimai xadimlərin kiçik bir toplantısı var idi, onlar qərara gəldilər ki, bu, sadəcə kiçik bir dəstə deyil. Vaxt gələcək, “Arbat” erməni batalyonu tamhüquqlu erməni batalyonu olacaq. Biz ümumi olan hər şeyi vurğulamaq qərarına gəldik, batalyon erməni bayrağı altında döyüşəcək. Birlik olacaq. Biz Donbasın Vəhşi Diviziyasıyıq, hamımızı etnik, ideoloji, dini və müxtəlif səbəblərə görə birləşirik və hamımız birlikdə işləyirik”. Diqqət edək: “Arbat” batalyonu Ukrayna ərazisində erməni bayrağı altında Ukrayna xalqına qarşı döyüşəcək! Ermənistanın Ukraynaya qarşı təcavüz və müharibədə rəsmi iştirakı deyilsə, bu nədir? Erməni Apostol Kilsəsi Eçmiədzin isə suveren Ukrayna dövlətinə və Ukrayna xalqına qarşı təcavüzə görə erməni muzdlularına və separatçılarına xeyir-dua verir. “Baqramyan”ın Gürcüstana və Abxaziyanın gürcü əhalisinə qarşı müharibəyə də Eçmiədzin xeyir-dua verib. Bu, Eçmiədzinin Gürcüstan ərazisindəki bir neçə yüz gürcü kilsəsinə iddialarının heç də zərərsiz olmadığının sübutu deyilmi? Bu iddiaların arxasında Gürcüstana qarşı müharibə və gürcü torpaqlarının, gürcü ziyarətgahlarının zəbt edilməsi üçün istənilən əlverişli məqamda erməni döyüşçülərinə “xeyir-dua” verməyə hazır olmaq dayanır. Ukraynaya göndərilən “Arbat” batalyonu təsadüfən yaranmayıb. Çox güman ki, bunun əhəmiyyətli bir hissəsini “Artsax” separatçıları və sonradan Azərbaycan Qarabağını “geri almaq” üçün revanşist müharibəsində iştirak etmək niyyətində olanlar təşkil edəcək. Bu yaraqlılar Ukraynada “sınaqdan” keçəcəklər ki, görünür, batalyonun yaradıcılarının ümid etdiyi kimi, Qafqazda müharibə başlayanda yenidən Cənubi Qafqaza köçürüləcəklər. Amma çox güman ki, həmin silahlılar heç vaxt Qarabağa çatmayacaq. Birincisi, ona görə ki, “Artsax” separatçı layihəsi məhvə məhkumdur və “Artsax” separatçılarının özləri Rusiya sülhməramlılarının Qarabağdakı məsuliyyət zonasında deyillər, ikincisi, Ukrayna Silahlı Qüvvələri təcavüzkarlara çox böyük zərbələr vurur. “Arbat” batalyonunun əhəmiyyətli bir hissəsi isə Ukrayna “qara torpağında” qalacaq”.
Beləliklə, qeyd edilənlərdən göründüyü kimi, ermənilər açıq şəkildə Ukrayna xalqına qarşı müharibəyə qatılır. Hazırda Rusiya Ukraynaya qarşı müharibəsində bu ölkənin mülki və enerji obyektlərini vurmaq üçün raketlərdən, o cümlədən qanadlı raketlərdən istifadə edir. Həmin raketlərin hazırlanmasında istifadə olunan mikrosxem və elektron komponentlər isə Ermənistan vasitəsilə Rusiaya çatdırılır. Onu da bildirək ki, Moskvanın Ukraynaya hücumundan dərhal sonra Rusiyada mikrosxemlərin idxalı kəskin azalsa da, sonradan bu idxal bəzi ölkələrin, xüsusilə də Ermənistanın hesabına çoxalıb. Hazırda Ermənistan Rusiyanın Ukraynaya qarşı müharibəsinin əsas iqtisadi tərəfdaşıdır və şimal qonşumuza sanksiyalar siyahısına salınmış məhsullar tədarük edir. Ümumiyyətlə, Qərb rəsmiləri Rusiyanın, tanklar da daxil olmaqla, hərbi texnikasında soyuducu və paltaryuyan maşınların hissələrinin olduğunu bildirirlər. İrəvan rusları hərbi texnika üçün lazım olan mikrosxemlərlə də təmin edir. ABŞ Xəzinədarlığı mikrosxemlərin hazırlanması və istehsalı üzrə ixtisaslaşan Rusiyanın “Milandr” şirkətinə xüsusi diqqət yetirib. Onun Ermənistandakı törəmə şirkəti – “Milur Electronics” MMC xarici zavodlara sifarişlər vermək, inteqral sxemlər istehsal etmək və xaricə satış həyata keçirmək məqsədilə yaradılıb. Ermənistanın digər şirkəti – “Taco” MMC Rusiyanın “Radioavtomatika” şirkəti ilə sıx əlaqədə olduğuna görə sanksiyalar siyahısına daxil edilib. Belə ki, bu şirkət sanksiyalardan yan keçərək Rusiya hərbi sənayesi üçün xarici avadanlıqların alınması üzrə ixtisaslaşıb. Ermənistandan Rusiyaya smartfonların və Qərb istehsalı olan avtomobillərin tədarükü də uğurla həyata keçirilir. Bunlar fonunda hesab edilir ki, Ukraynada müharibəni körükləyən Ermənistana sanksiyalar tətbiq edilməsi artıq zərurətdir. Belə sanksiyalar olmadıqca Ermənistan Ukraynaya qarşı mübarizədə iştirak səviyyəsini artırır.
Tahir TAĞIYEV
