Fransa Prezidenti davranışı, çıxışları ilə daha çox ermənilik edir. Ermənistanın baş naziri Nikol Paşinyan Qarabağın Azərbaycanın tərkib hissəsi olduğunu dediyi halda, Emmanuel Makron Azərbaycanın Qarabağ iqtisadi rayonunu ermənilər kimi adlandırmaqla özünü hay erməni gözünə soxur.
Bu günlərdə Makron Fransanın Marsel şəhərində erməni icmasının nümayəndələri ilə görüşüb. Görüşdə ona Qarabağla bağlı sual ünvanlayıblar. Fransa prezidenti suala cavabında bildirib ki, Azərbaycan Prezidenti İlham Əliyevə Qarabağla bağlı Ermənistanın baş naziri Nikol Paşinyandan daha çox təzyiq (?!) edib: “Mən bu məsələdə dəqiq mövqeyi olan yeganə şəxsəm”.
Makron Fransanın İrəvandakı səfirliyində hərbi attaşenin də fəaliyyət göstərdiyini vurğulayaraq, Ermənistanı müdafiə etmək üçün əllərindən gələni etdiklərini söyləyib: “Siz də bilirsiniz ki, Fransa ilk dəfə öz hərbi attaşesini Ermənistandakı səfirliyinə göndərib və bunun nə demək olduğunu bilirsiniz, eləmi? Biz əlimizdən gələni, mümkün olan hər şeyi etməliyik”.
Ümumilikdə, Makronun hərbi attaşe təyinatı ilə bağlı belə danışması nə deməkdir? O bununla niyə öyünür?
“Ukrayna-Rusiya müharibəsinin uzanması fonunda Paris Ermənistanda Moskvanın boşalacaq yerini doldurmaq niyyətindədir”
Məsələ ilə bağlı “Bakı-Xəbər”ə açıqlama verən AMİP funksioneri Əli Orucovun fikrincə, Makronun hərbi attaşe ilə bağlı belə danışması bir sıra məsələlərə işarədir: “Makron bununla işarə edir ki, Fransa Ermənistanla hərbi sahədə əməkdaşlıqda qərarlıdır. Düzdür, bir sıra səbəblərə görə bu o qədər də asan olmayacaq. Başlıcası ona görə ki, hər iki ölkə fərqli silah inventarına malikdir. Ermənistanın hərbi baxımdan Rusiyanın orbitində olması səbəbindən bu, Fransa silahlarının strukturunun öyrənilməsi ilə bağlı müəyyən risqlər yaradır. Digər tərəfdən, silahların ora necə çatdırılması da o qədər də asan deyil. Ancaq bütün bunlara baxmayaraq, Ermənistanda Qərblə Rusiya arasında geosiyasi mübarizənin kəskinləşməsi Fransanı xeyli ümidləndirir. Üstəlik, Ukrayna-Rusiya müharibəsinin uzanması fonunda Paris Ermənistanda Moskvanın boşalacaq yerini doldurmaq niyyətindədir. Təsadüfi deyil ki, son vaxtlar mətbuatda Fransanın Ermənistana bir sıra silahlar ötürdüyü barədə məlumatlar yayılır. Avropa İttifaqının monitorinq missiyasının Ermənistanda akrivliyini artırdığı bir dövrdə Fransanın hərbi yöndə səyləri əsasən sonrakı mərhələlərə hesablanıb. Xüsusən də Ukrayna müharibəsinin necə nəticələnəcəyi bu baxımdan Fransa üçün önəmli əhəmiyyət kəsb edir. Rusiya Ukraynada məğlubiyyətə uğrasa, ölkədə daxili vəziyyət gərginləşsə, o zaman Fransanın Ermənistanda möhkəmlənməsi ehtimalı var. Belə vəziyyətdə Rusiya Ermənistanda ABŞ-ın təşəbbüsü ələ almasındansa, Fransanın güclənməsində maraqlı olacaq. Çünki Fransa tarixən Rusiya ilə xüsusi əlaqələrə malik olub. O baxımdan, fors-major vəziyyət yaranarsa, Rusiya Ermənistanı Fransaya güzəştə gedə bilər. Ona görə də siyasətdə hər şey mümkündür”.
Vidadi ORDAHALLI
