Türkiyə Cumhuriyyətinin qurucusu Mustafa Kamal Atatürkə qarşı erməni və kürd diasporunun kin-kudurəti səngimək bilmir. Belə ki, Telegram kanallarında yayılan məlumata görə, ABŞ-ın erməni lobbisi və kürdlər Mustafa Kamal Atatürk serialı ilə bağlı xoşagəlməz kampaniya həyata keçiriblər. Məlumatlara görə, onların Disney-ə təzyiqlərindən sonra Disney+ Türkiyədəki bütün türk məzmunlu yayımlarını silib.
Linç kampaniyasında erməni və kürdlər Türkiyə Cümhuriyyətinin qurucusu Mustafa Kamal Atatürkü “soyqırım lideri” kimi təhqir ediblər.
Mətbuatda yayılan digər məlumata görə, erməni diasporu Türkiyə Cümhuriyyətinin 100 illiyi münasibəti ilə hazırlanan "Atatürk" serialını hədəf alıb. Türkiyənin "Akşam" qəzeti xəbər verir ki, erməni diasporu oktyabrın 29-da 6 bölümlük "Atatürk" serialını yayımlayacaq "Disney Plus" ilə bağlı sərt açıqlamalar verib.
Açıqlamada Türkiyə Cümhuriyyətinin qurucusu Mustafa Kamal Atatürk təhqir olunub və “Disney Plus”a filmin yayımının dayandırılması üçün çağırış edilib.
Amerika Erməni Milli Komitəsi (ANCA) öz sosial media hesabından Atatürkün şəklini paylaşaraq “soyqırımı”, “qatil” kimi ifadələrdən istifadə edib. Həmçinin film qiymətləndirmə platforması IMDB-nin ünvanı da qeyd edilərək filmin ləğv edilməsi istənilib.
Şərhçilərin fikrincə, erməni diasporunun Atatürk serialını təhqir etməsi Türkiyə-Ermənistan münasibətlərinin həlli istiqamətində cəhdlərin gücləndiyi bir vaxta təsadüf edib.
Qeyd edilənə görə, “Disney Plus”da yayımlanacaq böyük büdcəli "Atatürk" serialının aktyor heyəti dəqiqləşib. Layihədə Mustafa Kamal Atatürk obrazını Aras Bulut İyinemli canlandıracaq. Mustafa Kamalın atası Əli Rıza Əfəndi obrazını aktyor Mehmet Günsür, anası Zübeydə xanımı Songül Ödən, bacısı Makbulə Atadana isə Sahra Şaş həyat verəcək.
Telegrama görə isə, “Disney” təzyiqlərə məruz qalıb, şirkət bütün türk məzmunlarını silib.
“Onların bu təxribatlarının heç bir nəticəsi yoxdur”
Atatürk siyasətinə qarşı erməni və kürd lobbisinin, diasporunun davranışlarının bir təxribat olduğunu deyən AVCİYA-nın vitse-prezidenti, professor Məhərrəm Züıfüqarlı “Bakı-Xəbər”ə şərhində “Ermənilərin Atatürkə qarşı həyata keçirdikləri kampaniya yeni deyil, əvvəlkilərin təkrarıdır. Belə bir misal var: Avropa və Qərb ölkələri, ABŞ Türkiyəyə nəyisə vermək istəməyəndə, yaxud nəyisə almaq istəyəndə dərhal qondarma “erməni soyqırımı”nı ortaya atırlar. Son prezident seçkilərində Türkiyə çox böyük uğur qazandı, nə qədər kənardan təsirlər edilsə də, xalq öz düzgün seçimini etdi. Bu da həmin dairələrin xoşuna gəlmədi. Çünki onlar istəyirlər ki, Türkiyədə bir marionet rejim olsun, istədikləri kimi Türkiyəni idarə etsinlər. İndi qarşıda güclü Türkiyə və güclü hakimiyyət, müstəqil siyasət yürüdən bir lider var. Artıq Ermənistanla da münasibətlərin normallaşması, sərhədlərin açılması ilə bağlı hazırlıq prosesi gedir. Məhz buna görə də Türkiyəyə düşmən olan qüvvələr yenə də cılız addımlar atırlar. Anti-Türkiyə qüvvələri həmişə olduğu kimi, yenə də öz çirkin məqsədlərini icra etdirmək üçün erməni daşnaklarından və kürd separatçılarından istifadə edirlər. Mənə elə gəlir ki, bu çirkin kampaniyanın heç bir nəticəsi olmayacaq. Çünki artıq erməni xalqı da, kürd xalqı da bu separatçılardan, bu terrorçulardan təngə gəlib. Beynəlxalq qurumlar öz məqsədləri üçün bunlardan istifadə edirlər, bu fakt da artıq dünyaya məlumdur. Amma hesab edirəm ki, ayıq olmaq lazımdır. Bu cür təxribatlar Azərbaycana qarşı da həmişə olub”-deyə bildirdi.
O qeyd etdi ki, Azərbaycan və Türkiyə cəmiyyətləri hər bir təxribata qarşı həssasdır və hər bir məlumatı dərindən incələyib nəticələr çıxarır. M.Zülfüqarlı hesab edir ki, beynəlxalq təşkilatların daxilində olan sağlam qüvvələr də bütün tarix boyu baş verənləri təhlil edib düzgün nəticə çıxaracaqlar.
“Erməni diasporu da, onlarla birgə hərəkət edən kürdlər də hansısa təşkilatlardan aldıqları pul müqabilində Atatürkə və Türkiyəyə qarşı düşmən fikirləri ortaya atırlar. Yəni məsələnin mahiyyəti budur”-deyə M.Zülfüqarlı qeyd etdi.
Professor Zülfüqarlının sözlərinə görə, dünyada 50-yə yaxın münaqişə ocağı var ki, onu da dünyanın iri dövlətləri, silah istehsalçıları yaradıblar, onlar xalqları bir-birinə düşmən etməklə öz silah ticarətlərini genişləndirirlər. Türkiyənin regionda yeritdiyi sülhpərvər siyasətin, sərgilədiyi xoşniyyətli davranışın bəzi qüvvələrin narahatlığına səbəb olduğunu deyən M.Zülfüqarlı hesab edir ki, onlar da əllərindəki təzyiq vasitələrilə “Disney” kimi şirkətlərə təsir etməyə çalışırlar ki, burada da erməni və kürd separatçıların işinə yarayır: “Onların bu təxribatlarının heç bir nəticəsi yoxdur. Türkiyəyə qarşı heç bir təzyiqin təsiri ola bilməz, qardaş ölkə hər zaman belə təxribatlara hazır olub və hazır olmalıdır da. O qüvvələrin qara niyyətləri heç zaman yerinə yetməyəcək”.
Əli TURABOV
