Ermənistanın yalan təbliğat maşını nə qədər işləsə də, yenə də həqiqəti təhrif etməyə gücü yetmir. 2020-ci ilin noyabrında imzalanan üçtərəfli sazişə görə, Azərbaycanın suveren ərazisi olan Qarabağdan Ermənistanın bütün silahlı birləşmələri çıxarılmalı idi, amma terror ölkəsi nəinki bunu etmədi, əksinə, silahlı dəstələrini Azərbaycan torpağında saxlamaqda davam etdi.
Yalandan məlumat yaydı ki, guya Xankəndidə Ermənistan hərbçiləri yoxdur. Əslində isə Ermənistan bu yalanı ilə bütün dünyanı aldadır, bu gün də Qarabağda bu ölkənin silahlı hərbi birləşmələri var və onlar separatçılarla, rus sülhməramlıları ilə birləşib kəndlərimizi, şəhərlərimizi atəşə tuturlar. Bildiyimiz kimi, iyunun 27-si saat 20:05-də Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri ordumuzun Ağdam rayonunun Qalayçılar kəndi istiqamətində yerləşən mövqeləri atıcı silahlardan atəşə tutdular.
Azərbaycan Silahlı qüvvələrinin cavab atəşi nəticəsində 5 erməni hərbiçisinin öldürüldüyü bildirildi və həmin zaman müəyyən olundu ki, Qalayçılar kəndini atəşə tutanlar arasında Ermənistanın Qarabağda qanunsuz şəkildə saxladığı hərbçiləri də var, hətta həlak olanların ikisinin Ermənistan hərbçisi olduğu təsdiqləndi. Bu bir daha Qarabağda Ermənistanın hərbçilərinin olduğunu sübut etdi.
Qarabağdakı terrorçuların təxribatlarına cavab olaraq məhv edilmiş iki hərbçi – Yervand Tadevosyan və Samvel Torosyanın cəsədlərinin Beynəlxalq Qızıl Xaç Komitəsi tərəfindən Ermənistana aparıldığı məlumdur.
Erməni mediası qondarma rejimin oyuncaq “ombudsman”ı Geqam Stepanyana “istinadən” məlumat yayıb ki, həmin şəxslər valideynlərinin istəyinə uyğun olaraq Yerablurda dəfn ediləcək (artıq edilib).
Onu da vurğulayaq ki, oyuncaq “ombudsman” ölən hərbçilərin Ermənistan silahlı qüvvələrinin heyətinə daxil olduğu barədə məlumatları təkzib etməyə cəhd göstərsə də, cidanı çuvalda gizlətməsi uzun çəkməyib, onların həqiqətən də Ermənistan vətəndaşı, Ermənistan ordusunun şəxsi heyətinin üzvləri olduqları təsdiqlənib.
Bu fakt bir daha sübut edir ki, Azərbaycan torpağında, Qarabağda Ermənistanın qanunsuz saxladığı silahlı dəstə var. Ekspertlərə görə, dünya birliyi Ermənistandan tələb etməlidir ki, öz hərbçilərini Azərbaycan ərazisindən çıxarsın.
“Hesab edirəm ki, beynəlxalq təşkilatlar nəhayət Ermənistana təzyiq göstərməli, onu öz qanunsuz silahlı dəstələrini Azərbaycan ərazisindən çıxarmağa məcbur etməlidir”
"Müasir İnkişaf" Birliyinin sədri, siyasi şərhçi Mübariz Göyüşlü "Bakı-Xəbər"ə şərhində bildirdi ki, Ermənistanın öz hərbçilərini hələ də Azərbaycan ərazisindən çıxarmaması bu ölkənin əsl mahiyyətini bir daha təsdiqləyir. M.Göyüşlünün sözlərinə görə, separatçıların təxribatına cavab olaraq Azərbaycan Silahlı Qüvvələrinin atəşi nəticəsində ölən erməni hərbçiləri arasında Ermənistan ordusunun mənsublarının olması bu ölkənin yalanlarını ifşa edir. “Azərbaycan dəfələrlə bəyan edib ki, Azərbaycanın Qarabağ İqtisadi rayonunda, hazırda rus sülhməramlılarının müvəqqəti nəzarətində olan ərazimizdə Ermənistan ordusuna məxsus hərbçilər var və onlar orada oyuncaq “ordu” ilə birgə qanunsuz fəaliyyət göstərirlər. Ermənistanın Qarabağada hələ də öz hərbçilərini saxlaması qanunsuzdur. Separatçı silahlı dəstələri də həmçinin. Ermənistan hərbçilərinin hələ də Azərbaycan ərazisində qalması dövlətimizin suverenliyini təhdid edən haldır. Ermənistanın hərbçilərinin geri çağırılması məsələsi üçtərəfli bəyanatda əks olunsa da, təəssüf ki, Ermənistan hələ də buna əməl etmir, hətta hərbçilərinin Azərbaycanın kəndlərinə, şəhərlərinə hücum etməsinə imkan yaradır. Ermənilər yalan danışmağı özünə həyat tərzi seçən toplumdur. Ermənistan rəsmiləri həmişə bəyan edirdilər ki, Azərbaycan ərazisində Ermənistan ordusuna mənsub hərbçilər yoxdur, amma son baş verənlər onların yalanlarını bir daha ifşa etdi. Yəni Azərbaycanın müzəffər Silahlı Qüvvələri Ermənistanın bu yalanını da üzə çıxardı. “Qisas-2” əməliyyatı ilə Ermənistanın yalançı simasını bir daha dünyaya göstərdi. Ağdamın Qalayçılar kəndini atəşə tutarkən ordumuz tərəfindən əks-zərbə ilə zərərsizləşdirilən erməni hərbçiləri arasında iki Ermənistan vətəndaşının olması Ermənistanın yalanlarını sübut edir”-deyə bildirən M.Göyüşlü qeyd etdi ki, Ermənistanın bu hərəkətinə beynəlxalq səviyyədə dəyər verilməlidir. M.Göyüşlünün sözlərinə görə, Ermənistan bir tərəfdən Brüsseldə, Soçidə, Vaşinqtonda Azərbaycanla sülh danışıqları aparmaq, problemləri həll etmək istəyində olduğunu bəyan eidr, digər tərəfdən də Azərbaycanın suveren ərazisində qanunsuz silahlı dəstə saxlayır və Azərbaycana qarşı təcavüz niyyətlərini ortaya qoyur: “Necə olur ki, bir tərəfdən Nikol Paşinyan Qarabağ da daxil olmaqla Azərbaycanın ərazi bütövlüyünü, suverenliyini tanıdığını rəsmən bəyan edir, digər tərəfdən də Azərbaycan ərazisində qanunsuz silahlı dəstə saxlayır? Bu heç bir məntiqə sığmır. Hesab edirəm ki, beynəlxalq təşkilatlar nəhayət Ermənistana təzyiq göstərməli, onu öz qanunsuz silahlı dəstələrini Azərbaycan ərazisindən çıxarmağa məcbur etməlidir. Heç olmasa indi Ermənistandan bunu tələb etsinlər. Əks halda, cənab Prezidentin dediyi kimi, “əgər erməni əsgəri ölmək istəmirsə, rədd olsun Azərbaycan torpaqlarından”. Odur ki, Ermənistan xoşluqla öz hərbçilərini çıxarmasa ordumuz onlara öz gücünü göstərəcək, torpaqlarımızdan rədd edəcək”-deyə müsahibimiz qeyd etdi.
İradə SARIYEVA
