Tehran rejimi Azərbaycan xalqının dəyərlərinə, tarixi abidələrinə qarşı düşmən siyasətini davam etdirir, soydaşlarımıza öz tariximizi, tarixi qəhrəmanlarımızı unutdurmaq üçün hər cür vasitədən istifadə edir. Lakin buna heç bir təbliğat vasitəsilə nail ola bilmir.
Güneyli soydaşlarımızın öz azadlıqları uğrunda mübarizə simvoluna çevirdiyi Babək, yaxud Bəzz qalasına uzun illərdir milli siyasi və mədəni fəallar tərəfindən yürüşlər təşkil edilir. Ənənəvi olaraq hər il Babək Qalası qurultayı da keçirilir. Babək Qalası qurultayı ilk dəfə 1990-cı ilin əvvələrində professor Məhəmməd Tağı Zehtabinin təşəbbüsü ilə keçirilib. Uzun illər professor Zehtabinin və Həsən Dəmirçinin öndərliyi ilə milli fəallar Babək qalasına yürüş edir, qurultay qeyd edirlər. 798-ci ilin 1 iyulunda Cənubi Azərbaycanın Ərdəbilində anadan olan Babəkin qəhrəmanlığı bütün dünyaya məlumdur.
Soydaşlarımızın Babək qalasına yürüşlərinin qarşısının alınması üçün mollalar min bir oyun çıxarıblar.
Moizə Teleqram kanalı məlumat yayıb ki, molla rejimi Babək qalasını bağlayıb. Qeyd olunur ki, molla rejimi azərbaycanlıların kütləvi ziyarət etdiyi Babək qalasını təmir adı ilə bağlayıb.
Bildiyimiz kimi, Azərbaycanın milli qəhrəmanı Babək Xürrəminin ad günü münasibətilə hər il iyunun sonunda Bəzz qalasına ənənəvi yürüşün qarşısının alınması üçün mollalar “təmir-bərpa” alətindən istifadə edirlər.
“...Rejimin məkrli siyasətinə baxmayaraq, soydaşlarımız Babəkin milli azadlıq yolunu davam etdirəcək”
Tehran rejiminin bu davranışının düşmənçilik siyasətindən qaynaqlandığını deyən AMEA-nın Fəlsəfə və Sosiologiya İnstitunun aparıcı elmi işçisi, fəlsəfə doktoru, BAO sədrinin müavini, siyasi icmalçı Faiq Ələkbərli “Bakı-Xəbər”ə bildirdi ki, Babək qalasına yürüş Güney azərbaycanlılar üçün çox önəmli yürüşlərdən, hərəkatlardan biridir: “Əlbəttə, bunu yürüşdən, ziyarətdən daha çox milli azadlıq ruhunu qoruyub saxlamaq istəyi ilə əlaqələndirmək lazımdır. Bilirik ki, Güney Azərbaycan milli hərəkatında ən mühüm mərhələlərdən biri də soydaşlarımızın hər il iyunun sonu iyulun əvvəllərində Babək qalasını ziyarət etmək, Babəkin ruhunu anmaq olub. Məhəmməd Tağı Zehtabinin böyük əməyi sayəsində bu yürüz bir zamanlar özünün ən yüksək mərhələsinə də çatıb. On minlərlə insan bu qalaya yürüş edirdilər. Sözsüz ki, milli hərəkatın genişlənməsi molla rejimini ciddi narahat etməyə bilməzdi. Tehran rejimi müxtəlif bəhanələrlə Babək qalasına yürüşün qarşısını almağa çalışdı, milli fəalları həbs etdi, soydaşlarımıza işgəncələr verdi, işlərindən azad etdi. Mollalar yenə də bu məsələdə öz həssaslıqlarını qoruyub saxlamaqdadır. Şovinst-fars rejimi insanlarımızın Babək qalasına yürüş etməsinin qarşısını almaq üçün hər cür məkrli addımlar atıblar. Amma buna baxmayaraq, yenə də soydaşlarımız Babək qalasını ziyarətə çıxdılar, ziyarət edənlər də oldu. Ancaq yürüşə çıxan soydaşlarımızın bir çoxunu “təmir-bərpa” bəhanəsi ilə gerei qaytardılar. Çox təəssüflər olsun ki, molla rejimi soydaşlarımızı Babək qalasına yaxın buraxmır. Fars-şovinist rejimi üçün Güney azərbaycanlıların kütləvi şəkildə Babək qalasına yürüş etməsi çox təhlükəlidir. Rejim bu yürüşdən əndişələnir. Bütün hallarda Babək və onun apardığı milli azadlıq mübarizəsi Azərbaycan türklərinin tarixində və yaddaşında əbədi bir iz buraxıb. Bu, Azərbaycan türklərinin İran İslam Respublikası adlanan ölkədə özünü toparlayıb yenidən milli bir gücə çevirilməsi, milli dövlətini bərpa etməsi üçün əsas sınaqlardan biridir. Yəni Babək qalasını ziyarət mənəvi bir xarakter daşısa da, əslində ideoloji anlamda milli azadlığı özündə əks etdirir”.
Bunu da Tehran rejiminin yaxşı bildiyini deyən F.Ələkbərli qeyd etdi ki, ona görə də məhz minlərlə insanın bu qalanı ziyarət etməsinin qarşısını almaq üçün əlindən gələni edir. Fars-şovinst rejiminin məkrli planlarına, çirkin siyasətinə baxmayaraq soydaşlarımız nə Babək qalasını, nə də Babəkin doğum gününü unudurlar, əksinə rejimə qarşı daha da barışmaz olurlar deyən F.Ələkbərlinin sözlərinə görə, xalqımızın yaddaşında Babək azadlıq simvoludur. “Hesab edirəm ki, rejimin məkrli siyasətinə baxmayaraq soydaşlarımız Babəkin milli azadlıq yolunu davam etdirəcək, Güneydə yenidən milli dövlət quracaq. Fars-molla rejimini mümkün qədər mövcud rejimin ömrünü uzatmağa çalışır. Ancaq bu cəhdlər müvəqqətidir. Soydaşlarımızın öz milli varlığını, türklüyünü dərindən hiss etməsi, Babək qalasına yürüşü, “Traxtor” futbol komandasını yaxından dəstəkləməsi və başqa onlarla, yüzlərlə amil göstərir ki, onlar heç zaman öz milli haqlarına, milli dövlətçiliklərinə qovuşmaqdan, yenidən dövlət qurmaqdan geri çəkilməyəcəklər” - deyə F.Ələkbərli qeyd etdi.
İradə SARIYEVA
