Məlum olduğu kimi, iyunun 27-də ABŞ-ın paytaxtı Vaşinqtonda Azərbaycan və Ermənistan XİN başçılarının sülh sazişi layihəsi üzrə danışıqlarının növbəti raundu keçirildi. Elə həmin tarixdə də Rusiya sülhməramlılarının gözü qarşısında Ağdam atəşə tutuldu.
Bəli, Vaşinqtonda keçirilən görüş zamanı, yəni iyunun 27-də Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri tərəfindən Ordumuzun Ağdam rayonunun Qalayçılar kəndi istiqamətində yerləşən mövqeləri atıcı silahlardan atəşə tutuldu.
Müdafiə Nazirliyindən verilən məlumata görə, atəş nəticəsində Azərbaycan Ordusunun hərbi qulluqçusu Bəkirov Əli Şükür oğlu yaralanıb. Yaralı hərbi qulluqçumuz dərhal hərbi tibb müəssisəsinə təxliyə edilib, həyatı üçün təhlükə yoxdur.
İyunun 29-da isə Azərbaycanın xarici işlər naziri Ceyhun Bayramovla Ermənistan xarici işlər naziri Ararat Mirzoyanın ABŞ-də danışıqları başa çatır.
Qeyd edək ki, Azərbaycan Ordusunun Qarabağ bölgəsində erməni qanunsuz hərbi birləşmələrinin istehkamlarını məhv etməsinin görüntüləri yayılıb. Qanunsuz silahlı birləşmələrin növbəti təxribatına ordumuz layiqli cavab verib. Azərbaycan Silahlı Qüvvələrinin cavab tədbirləri nəticəsində - “Qisas” əməliyyatı ilə qanunsuz silahlı birləşmənin istehkamı və 5 üzvü məhv edilib.
Vaşinqton görüşləri ərəfəsində Ağdamın Qalayçılar kəndinə ermənilərin qanunsuz silahlı dəstəsinin hücumu nə deməkdir? Bu hücumda rus sülhməramlılarının iştirakı barədə də məlumatlar var, bu nəyə xidmət edir?
Siyasi şərhçi Azər Həsrət baki-xeber.com-a “Ermənilərin Rusiya sülhməramlılarının müvəqqəti yerləşdiyi Azərbaycan torpaqlarında törətdiyi təxribatlar bizi heç də təəccübləndirmir, eyni zamanda gözlənilməz də deyil. Niyə? Ona görə ki, Azərbaycan Rusiyanın nəzarətindən kənar bir müstəvidə Ermənistanla həqiqətən də normal danışıqlar apardığı müddətdə həmişə belə təxribatlar baş verir. Yəni hansısa təxribat törədilir, rayonlarımız atəşə tutulur, əsgərlərimiz şəhid edilir, həmçinin hansısa yalan informasiyalar yayılır, ictimai rəy çaşdırılmağa çalışılır. Qalayçılar kəndinin atəşə tutulması da o qəbildəndir. Cəfər Cabbarlının məlum pyesində (“1905-ci ildə”) deyildiyi kimi, yenə də atan kazaklardır. Yəni işin içindəki yenə də Rusiyadır. Heç şübhəsiz ki, rus sülhməramlılarının separatçıların növbəti təxribatında da iştirakı təsadüfi deyil. Çünki Rusiya bütün gücü ilə çalışıb ki, bu mühüm görüş ərəfəsində danışıqlara hər hansı formadasa ziyan vursun. Vaşinqton danışıqları ərəfəsində Ağdamın Qalayçılar kəndinin atəşə tutulması Rusiyanın növbəti təxribatı idi ki, bu da danışıqları pozmaq məqsədinə xidmət edib. Ermənilər rus sülhməramlılarının “xeyir-dua”sını almadan hərəkət etmir. Onlar dünyanın ən bədbəxt qurbanlarındandır” - deyə bildirdi.
O, hesab edir ki, məhz bu mühüm danışıqlar zamanı Qalayçılara hücumun təşkil edilməsi danışıqların gedişinə mənfi təsir göstərmək məqsədi daşıyıb.
A.Həsrət vurğuladı ki, Rusiya öz çirkin siyasətini Qafqazlarda irəli aparmaq üçün ermənilərdən istifadə edir. “Təəssüflər olsun ki, ermənilərin içində də Rusiyanın bu oyununa alət olmağa həvəsli insanlar hələ də var. O təxribatı törətməklə dünyaya göstərmək istəyirlər ki, guya azərbaycanlılarla ermənilər bir yerdə yaşaya bilməzlər və sair. Halbuki, hamınıza bəllidir ki, Azərbaycan da, Türkiyə də həmişə ermənilərə çox hörmətlə yanaşıb, onlara heç bir problem yaratmayıb və bundan sonra münasibətlər normallaşacağı təqdirdə yenə də ermənilər görmədikləri günü görəcəklər. Əlbəttə, Ermənistanda bunu anlayanlar var. Amma anlamaq istəməyənlər də az deyil. Üstəlik də, Rusiyaya da könüllü şəkildə alət olmaq istəyənlər də çoxdur. Bu da ondan irəli gəlir ki, adamlar içlərindəki xislətdən qurtara bilmirlər. Eyni zamanda nəzərə almaq lazımdır ki, Qarabağdakı 30-40 min civarında olan erməni orada Rusiyanın birbaşa idarə etdiyi, nəzarət altında saxladığı cinayətkar qruplaşmanın girovluğundadır. Yəni o adamlar girovluqdadır. Azərbaycan dövləti öz vətəndaşlarını girovluqdan qurtarmaq üçün hərəkətə keçməlidir. Əminik ki, Qarabağda yaşayan ermənilərin böyük əksəriyyəti, kiçik bir qruplaşmanı çıxmaq şərti ilə hətta 100 faizə qədəri Azərbaycan dövlətinin bayrağı altında yaşamağa çoxdan hazırdır. Sadəcə olaraq həm oradakı Rusiya sülhməramlıları, həm də cinayətkar qruplaşma o insanları girov olaraq saxlayır onlara bu cür əməl törətdirir. Yeri gəlmişkən, Azərbaycan ordusunun həyata keçirdiyi zərərsizləşdirmə əməliyyatı zamanı zərərləşdirilənlərdən ikisinin Ermənistan Silahlı Qüvvələrinin hərbçiləri olduğu deyilir. Onlar qanusuz silahlı birləşmənin üzvü olan Ermənistan vətəndaşlarıdır. Ermənistan “biz orda yoxuq”, “çıxmışıq” deyir. Bəs necə olur ki, zərərsizləşdirmə əməliyyatında orada Ermənistan vətəndaşlarının olduğu da məlum olur. Ona görə də, düşünürəm ki, artıq Azərbaycan dövləti Qarabağdakı öz vətəndaşı olan ermənilərin girovluqdan qurtarılması üçün hərəkətə keçməlidir. Bu hərəkət zamanı ABŞ başda olmaqla dünyanın öndə gedən dövlətləri, eləcə də beynəlxalq qurumlar məlumatlandırılmalı, onlara vəziyyət izah edilməli, onlarla birlikdə hərəkətə keçərək vətəndaşlarımızı girovluqdan azad etməliyik. Çünki belə olmasa onlar da pis əməllərə bulaşdırılacaq, eyni zamanda biz də əziyyət çəkəcəyik. Əlbəttə, bu da sonsuza qədər davam edə bilməz” - deyə A.Həsrət qeyd etdi.
İradə SARIYEVA
