Qarabağda müvəqqəti yerləşdirilən Rusiya sülhməramlılarının fəaliyyətinə Ermənistanda tənqidi yanaşanlar var. Artıq sülhməramlılardan narazılıqlar yaranmaqdadır.
Məsələn, "Şərəf duyuram” parlament fraksiyasının katibi Tiqran Abrahamyan hesab edir ki, Rusiya sülhməramlıları öz öhdəliklərini yerinə yetirməlidir.
O qeyd edib ki, 9 noyabr 2020-ci il tarixli üçtərəfli bəyanatda" dəhlizin rəvan işləməsi" və onun təhlükəsizliyi üçün şərait aydın şəkildə müəyyən edilib və Qarabağda yerləşən Rusiyanın sülhməramlı missiyasına həvalə edilib. "Ancaq sülhməramlılar vəziyyətlə bağlı Bakıya müraciət etməkdənsə, öz öhdəliklərini yerinə yetirsələr yaxşı olar" - deyə Abrahamyan Feysbuk səhifəsində yazıb.
Azərbaycanın sülhməramlılardan narazılığının əsası var. Biz narazıyıq ki, sülhməramlılar qanunsuz erməni silahlı dəstələrini Qarabağdan çıxarmırlar, azərbaycanlıların təhlükəsizliyini təmin etmirlər, gecə-gündüz onların müşaiyəti ilə Xankəndiyə ermənilər silah daşıyır, bir çox qanunsuz işlər görürlər.
Bəs ermənilər nədən giley-güzar edirlər, sülhməramlılar onlara arxa-dayaq olduğu halda niyə narazıdırlar?
"Erməni tərəfdən bir qrup Qərb əhval-ruhiyyəli deputat da var ki..."
“Ermənistanın “Şərəf duyuram” parlament fraksiyasının katibi Tiqran Abrahamyanın Rusiya sülhməramlılarından narazılıq ifadə etməsi artıq reallıqları ortaya qoyur". Bu fikirləri "Bakı-Xəbər"ə şərhində SƏS Media Qrupunun rəhbəri Bəhruz Quliyev deyib.
Bəhruz Quliyevin sözlərinə görə, Azərbaycan tərəfi də sülhməramlılarla bağlı mütəmadi olaraq bəzi məqamlarda öz iradlarını bildirib: "Sülhməramlılar emrəni qruplaşmasına qarşı tədbir görmədikdə, erməni hərbi qruplaşmasının qarşısını almadıqda və ermənilər torpaqlarımızda ekoterror törətdikdə biz də öz iradlarımızı dəfələrlə bildirmişik.
Maraqlı məqam ondan ibarətdir ki, erməni tərəfdən bir qrup Qərb əhval-ruhiyyəli deputat da var ki, Rusiyanı həmişə tənqid edirlər. Onsuz da bu gün Rusiyaya qarşı böyük bir qrup formalaşıb. Onlar Qərbin diqtəsilə Rusiyaya qarşı həm meydanda aksiyalar keçirərək, həm də digər fəaliyyətləri ilə anti-Rusiya siyasəti apardıqlarını açıq şəkildə göstərirlər. Bu gün Tiqranın bu formada fikir səsləndirməsi də təbiidir".
SƏS Media Qrupunun rəhbəri bildirib ki, əgər Azərbaycan və Ermənistan tərəfi rus sülhməramlılarının fəaliyyətindən narazıdırsa, deməli, onlara lüzum qalmayacaq: Xatırlatmaq yerinə düşər ki, rus sülhməramlıları, 10 noyabr bəyanatında əks olunmasına baxmayaraq, erməni silahlılarının Qarabağdan çıxmasını təmin etməyib. Əksinə, onlar faktiki olaraq, bu silahlılar və keçmiş qondarma qurum “rəsmiləri” üçün qalxan rolunu oynayır. Həmçinin Azərbaycanın bir neçə dəfə kəskin etiraz bildirməsinə rəğmən, Azərbaycanın rus sülhməramlılarının məsuliyyət zonasında olan ərazilərinə Ermənistan rəsmiləri, hətta xarici ölkə nümayəndələrinin gəlişi müşahidə edilir. Onların Laçın dəhlizindən keçməklə Azərbaycan ərazisinə daxil olmasına isə rus sülhməramlıları şərait yaradırlar. Halbuki, Laçın dəhlizi Qarabağda yaşayan ermənilərin Ermənistanla təhlükəsiz əlaqəsinin təmini üçün müvəqqəti olaraq yaradılan və rus sülhməramlılarının nəzarətində olan koridordur”.
Qurum rəsmisi onu da əlavə edib ki, bu gün Ermənistanın baş naziri Nikol Paşinyan Azərbaycanın 86,6 min kv.km-lik ərazi bütövlüyünü tanıyır və bunu etiraf edib: “Erməni deputatlar da bilməlidir ki, digər missiyanın fəaliyyətinə icazə verməyəcəyik. Əgər razılaşma olacaqsa, 2020-ci il 10 noyabrda imzalanmış üçtərəli bəyannaməyə uyğun olaraq tələblər yerinə yetiriləcəksə, sülhməramlılara ehtiyac qalmayacaq. Fraksiya üzvü olan deputatlar da Paşinyanın yolunu tutsalar, onların etnik kimi Azərbaycan ərazisində yaşamasına imkan vermək olar. Əks təqdirdə, cənab Prezident İlham Əliyevin də qeyd etdiyi kimi, sonda “Dəmir Yumruq” qaçılmaz olacaq”.
Leyla QARAXANLI
