“Sülh danışıqlarının yekunlaşması həm bizə lazımdır, həm də daha çox Ermənistana lazımdır”. Bu fikirləri Prezident, Silahlı Qüvvələrin Ali Baş Komandanı İlham Əliyev Müdafiə Nazirliyinin komando hərbi hissələrinin birinə Döyüş bayrağının təqdim olunması mərasimində çıxışı zamanı deyib.
Ölkə başçısının sözlərinə görə, bu gün bizə qarşı aparılan çirkin kampaniyanın heç bir əhəmiyyəti yoxdur və olmayacaq: “Bizim iradəmizə heç kim təsir edə bilməz. Əgər Vətən müharibəsi dövründə bizim iradəmizə heç kim təsir edə bilmədisə, bu gün təbii ki, heç kim təsir edə bilməz. Yenə də deyirəm, biz haqq-ədaləti tələb edirik. Bu gün Ermənistanla aparılan sülh danışıqlarının yekunlaşması həm bizə lazımdır, həm də daha çox Ermənistana lazımdır. Bu sülh anlaşması beynəlxalq hüququn norma və prinsipləri əsasında imzalanmalıdır. Bu sülh anlaşmasında postmüharibə reallıqları nəzərə alınmalıdır. Bu, təbiidir. Biz qalib gəlmişik, biz qan tökmüşük, şəhidlər vermişik”.
Bütün bu deyilənlərin fonunda, sülh sazişi niyə məhz ən çox Ermənistana lazımdır?
“Sabah bizim üçün elə əlverişli situasiya yarana bilər ki, o zaman indiki şərtlərlə razılaşmayacağıq”
Sözügedən məsələyə aydınlıq gətirən Demokratik Dəyişim Partiyası Təşkilat Komitəsinin sədri Əli Mustafa bunu bir sıra faktorlarla əlaqələndirdi: “Sülh sazişi o baxımdan Ermənistana daha çox lazımdır ki, Azərbaycan bir sıra parametrlərə görə üstündür. Çünki Azərbaycan güclüdür, öz tarixi ərazilərinə iddia edə bilər. O əraziləri azad edə bilər. Ona görə də sülh sazişi Ermənistana daha çox lazımdır. Yəni, sülh sazişi 29,8 kvadrat kilometrlik Ermənistan ərazisinin bir sığortasıdır. Sülh müqaviləsi olmayacaqsa, biz hər zaman öz tarixi torpaqlarımıza iddia edib o torpaqları azad etmək istiqamətində çalışa bilərik. Digər tərəfdən, Azərbaycan Ordusu daha güclüdür, imkanları daha genişdir. Bu baxımdan dinamika xeyrimizədir, əhalinin sayı da Azərbaycanda çoxdur. Bizim ordumuz həm güclüdür, həm də say baxımından qat-qat üstünlüklərə malikdir. Üstəlik, getdikcə Azərbaycan daha çox güclənir, nəinki Ermənistan. Zaman və dinamika baxımından da proseslər bizim xeyrimizədir. Ermənistan bu gün sülh sazişini imzalamasa sabah istənilən vaxt eskalasiya baş verəcəksə, bu, bizim xeyrimizə olacaq. Başqa bir tərəfdən kommunikasiyaların açılması Ermənistanın iqtisadi inkişafı baxımından önəmli əhəmiyyət kəsb edir. Sülh yoxdursa, bütün kommunikasiyaların açılması, Türkiyə və Azərbaycanla iqtisadi əlaqələrin qurulması real deyil. Ən nəhayət Ermənistan KTMT-nin üzvüdür və Rusiyada da yaşananlar göz qabağındadır. Sabah Rusiya parçalansa, KTMT dağılsa Ermənistanı qoruyacaq hansısa hərbi blok da yoxdur. Belə bir şəraitdə bizim üçün elə əlverişli situasiya yarana bilər ki, o zaman indiki şərtlərlə razılaşmayacağıq. Nəticədə Azərbaycan başqa şərtlər irəli sürə bilər, digər tələblərlə çıxış edə bilər. Özü də bunu etmək üçün kifayət qədər əsaslarımız var. Nəzərə almaq lazımdır ki, 30 ildir Ermənistan bizim ərazimizi işğal edib, kənd və şəhərlərimizi viran qoyub. Yəni Azərbaycana çox böyük maddi zərər vurub. Ona görə də bizim haqqımız var ki, Ermənistana vurduğu o zərəri ödətdirək. Bu baxımdan da sülh sazişini imzalamaq Ermənistana daha çox lazımdır ki, gələcəkdə təhlükələrlə üzləşməsin”.
Vidadi ORDAHALLI
