“Hər növbəti addım əvvəlki addımın məntiqi davamı idi”. Bu fikirləri Prezident, Silahlı Qüvvələrin Ali Baş Komandanı İlham Əliyev Müdafiə Nazirliyinin komando hərbi hissələrinin birinə Döyüş bayrağının təqdim olunması mərasimində çıxışı zamanı deyib.
Ölkə başçısının sözlərinə görə, bu məsələlər elə-belə yaranmır: “Azərbaycan-Ermənistan şərti sərhəd istiqamətində baş vermiş hadisələr, ermənilərin yaşadıqları Qarabağ bölgəmizdə hərbi əməliyyatlar və iki ay əvvəl Ermənistan-Azərbaycan sərhədində, onun Laçın istiqamətində sərhəd-buraxılış məntəqəsinin yaradılması bizim çox güclü siyasi iradəmizin göstəricisidir. Yəni biz bütün addımlarımızı vahid proqram əsasında atmışıq. Əgər son iki il yarım ərzində baş vermiş hadisələr təhlil olunarsa, hər kəs görə bilər ki, hər bir addımımızın arxasında güclü siyasi iradə dayanmışdır, güc dayanmışdır, məntiq dayanmışdır, beynəlxalq hüquq dayanmışdır və hər növbəti addım əvvəlki addımın məntiqi davamı idi. Bu gün biz öz şanlı Zəfərimizi siyasi və diplomatik müstəvidə daha da möhkəmləndirdik. Bu gün biz bölgədə söz sahibiyik”.
“Qalib tərəf olaraq beynəlxalq danışıqlarda ölkəmiz prinsipial mövqeyini ortaya qoydu”
Sözügedən məsələni “Bakı-Xəbər”ə şərh edən hərbi ekspert Ramil Məmmədlinin fikrincə, həqiqətən də baş verənlər elə-belə yaranmır: “Müharibədən əvvəl belə skeptik düşüncələr var idi ki, Azərbaycan güc yolu ilə ərazilərini azad edə bilməz. Bunu onunla əsaslandırırdılar ki, dünya gücləri buna imkan verməz. Digər tərəfdən, Ermənistan güclü müdafiə səddi yaradıb, bütün hakim yüksəkliklər onların əlindədir və s. Ancaq 27 sentyabr 2020-ci ildə Vətən müharibəsi başlayandan sonra 44 gün ərzində Ali Baş Komandan və Silahlı Qüvvələrimiz bütün bu kimi düşüncələri, illərlə forlalaşan stereotipləri darmadağın etdi. Ordumuz mümkünüsüzü mümkünə çevirdi. Nə bəzi dövlətlərin, beynəlxalq təşkilatların çağrışları, nə də Ermənistanın mənfurcasına iri yaşayış məntəqələrini ballistik raketlərlə atəşə tutması bizi dayandıra bildi. Azərbaycan öz məqsədlərinə nail olaraq ərazilərin böyük hissəsini işğaldan tam azad etdi. Qarabağa sülhməramlılar yerləşəndən sonra belə fikirlər ortaya atılırdı ki, guya Azərbaycan Rusiyaya görə orada hansısa lokal əməliyyatlar aparmaqdan çəkinəcək. Buna hansısa cəhd göstərməyəcək. Prezident İlham Əliyevin apardığı uğurlu və düşünülmüş siyasət sayəsində bu cür fikirlər də öz təsdiqini tapmadı. Ordumuz 2022-ci ilin martın 24-də Qarabağda Fərrux kimi olduqca önəmli strateji yüksəkliyi ələ keçirdi. Daha sonra 2022-ci ilin avqustun 4-də “Qisas” əməliyyatı nəticəsində Qarabağ istiqamətində Sarıbaba, Qırxqız, Buzdux yüksəklikləri nəzarətimizə keçdi. Bütün bunlarla yanaşı, diplomatik müstəvidə də intensiv işlər aparıldı. Ermənistanın Qarabağa qanunsuz silah daşınmasının, oradakı sərvətlərin talanmasının qarşısını almaq üçün sistemli tədbirlər həyata keçirildi. Dekabrın 12-də Azərbaycan QHT-ləri Laçın-Şuşa yolunda fasiləsiz aksiyalara start verdi və bu, aprelin 23-nə qədər davam etdi. Blinkenin vasitəçiliyi ilə bu ilin fevralında Münhendə keçirilən görüşdə Prezident İlham Əliyev Laçın sərhədində nəzarət-buraxılış məntəqəsinin yaradılmasının vacibliyini qəti şəkildə müzakirələrdə qaldırdı. Qalib tərəf olaraq beynəlxalq danışıqlarda Azərbaycan prinsipial mövqeyini ortaya qoydu. Nəticədə aprelin 23-də Laçın yolunun başlanğıcında Azərbaycan sərhədçilərinin nəzarət-buraxılış məntəqəsi quruldi. Azərbaycanın ərazi bütövlüyü təmin edildi. Bütün bu uğurların arxasında siyasi iradə, güc və düşünülmüş siyasət dayanır. Azərbaycan müharibədən sonra mümkünsüz görünənləri reallığa çevurdi və bunu bacardı”.
Vidadi ORDAHALLI
