Rusiya Xarici İşlər Nazirliyinin sözçüsü Mariya Zaxarova cümə günü yaydığı bəyanatda rəsmi Bakını Laçın dəhlizi boyunca nəqliyyatın hərəkətini tamamilə açmağa çağırıb:
“Azərbaycan tərəfindən Laçın dəhlizinə girişin bağlanması ilə əlaqədar olaraq, belə hərəkətlərin Rusiya, Azərbaycan və Ermənistan liderlərinin 9 noyabr 2020-ci il tarixli Bəyanatının müddəalarının pozulması olduğuna diqqət çəkirik. Bu cür addımlar gərginliyin artmasına gətirib çıxarır və Rusiyanın yardımı ilə Azərbaycanla Ermənistan arasında davam edən münasibətlərin normallaşması prosesi ətrafında normal atmosferin saxlanmasına kömək etmir. Biz Bakını Laçın dəhlizi boyunca hərəkəti tamamilə açmağa çağırırıq”.
Qeyd edək ki, iki gün əvvəl Zaxarova başqa bir lüzumsuz bəyanatı ilə yadda qalmışdı. Həmin bəyanatda Zaxarova Azərbaycanı Qarabağdakı erməniləri öz “siyasi girovuna” çevirməkdə günahlandırmışdı. Zaxarovanın verdiyi bu iki absurd bəyanatı nə ilə əlaqələndirmək olar?
Politoloq Yeganə Hacıyeva “Bakı-Xəbər”ə bildirdi ki, Zaxarovanın bu fikirlərinin Rusiyanın daxilində gedən prosesıərlə birbaşa əlaqəsi var: “Biz tarixən həmişə görmüşük ki, Rusiyanın daxili proseslərindən qaynaqlanan gərginliklərin fonunda Azərbaycana yönəlik təzyiqlər artır. Hazırda da Rusiyada ciddi proseslər gedir. Daxili gərginlik mövcuddur. Bunu görən ermənipərəst Lavrov öz işçilərini bu yöndə təlimatlandırır. Rusiyanın Laçın yolu ilə bağlı mövqeyini Overçuk keçən həftə elan etdi. Ermənistan, Azərbaycan və Rusiya baş nazir müavinlərinin işçi komissiyasının üzvü olan bu şəxs baş verən hadisəni təxribat adlandırdı. Bu bir daha göstərir ki, daxildəki bəzi qüvvələrin Azərbaycana mövqeyi tez-tez dəyişməli olur. Bunu Rusiya xarici işlər nazirliyinin Ermənistana verdiyi “sovqat” kimi dəyərləndirmək olar. Bütün bunların bir adı var - erməni maraqlarının təşviqi. Laçın yolunun “bağlanması”, bölgədə “humanitar fəlakət” yarandığı barədə iddialar əsassızdır. Ötən müddət ərzində Rusiya sülhməramlı kontingentinin və Beynəlxalq Qırmızı Xaç Komitəsinin (BQXK) konvoylarının, erməni təcili tibbi maşınları daxil olmaqla nəqliyyat vasitəsinin heç bir maneə olmadan yoldan keçməsi bir daha sübut edir ki, yol bağlı olmayıb. Bu prosesə ermənilərin nəzarət buraxılış məntəqəsində yol verdikləri silahlı təxribatdan sonra start verildi. Bununla yanaşı, yerli sakinlərin istifadəsi üçün malların tədarükü və ya zəruri tibbi xidmətlərin göstərilməsi ilə bağlı heç bir maneə mövcud deyildi. Həmçinin dəfələrlə bəyan etdiyimiz kimi, Azərbaycan hökuməti erməni sakinlərinin üzləşə biləcəyi bütün humanitar ehtiyacları operativ şəkildə həll etməyə hazırdır. Özlərini erməni sakinlərin nümayəndələri kimi təqdim edən şəxslərin erməni sakinlərin yoldan istifadəsinə mane olmaqla süni şəkildə humanitar böhran yaratmaq cəhdləri barədə də danılmaz faktlar mövcuddur. Bu özünü son təxribatda bir daha göstərdi. Çox təəssüflər olsun ki, bu çirkin kampaniyaya Zaxarovanın timsalında Rusiya XİN də qoşulub”.
Məhəmmədəli QƏRİBLİ
