Qarabağda və ətraf rayonlarda, o cümlədən də Qərbi Azərbaycanda məscidləri məhv edən, alban kilsələrini erməniləşdirən, onlara qarşı terror törədən ermənilər yeni cəfəngiyyatlarla gündəmi məşğul edirlər.
Erməni mediasının həm erməni, həm rus, həm də türk siqmentlərində növbəti dezinformasiya yayılıb ki, guya “Azərbaycan Laçındakı Sumb Ambardsum (Müqəddəs dirilmə) kilsəsini məscidə çevirir”.
Separatçı tör-töküntülərinin “Tarixi Ətraf Mühitin Mühafizəsi üzrə Dövlət Xidməti” haray-həşir salıb yalan, saxta məlumatlar yayır, Azərbaycanı guya onların “tarixini saxtalaşdırmaqda”, “mədəni kimliyini məhv etməkdə”suçlayır.
İddia edirlər ki, guya əvvəllər Azərbaycan Abidələrin Mühafizəsi” ictimai birliyi “Sumb Ambardsum kilsəsinin” məscidə çevriləcəyi barədə məlumat yayıb.
Guya kilsə 2022-ci il avqustun 25-dək, yəni Azərbaycana təhvil verilənə qədər “yaxşı vəziyyətdə” olub. Ermənilər yazır ki, kilsə Laçında 1998-ci ildə tikilib.
Məsələ burasındadır ki, ermənilər öz adlarını bizə qoymaq, əməllərini bizim ayağımıza yazmaq istəyirlər. Adama qəribə gələn odur ki, Azərbaycan məscidlərinə qarşı soyqırım törədən, alban kilsələrini mənimsəyən ermənilər utanmadan Azərbaycana çamur atır. Bu gün ermənilər bizə Qərbi Azərbaycanda salamat qalan abidələrimizi, məscidlərimizi göstərsinlər. Yoxdur. Azərbaycanda qədim erməni irsi olmayıb, bizim torpaqlarda isə erməni kilsələri Azərbaycan əraziləri işğalda olduğu dövrlərdə tikilib. Halbuki, bütün beynəlxalq konvensiyalara görə, işğal edilən ərazilərdə bu tip tikintilərin aparılması qadağandır.
Erməni mediasının növbəti saxtakarlığı ilə bağlı Mədəniyyət Nazirliyinin Mədəni İrsin Qorunması, İnkişafı və Bərpası üzrə Dövlət Xidməti ilə əlaqə saxladıq. Qurumdan bildirdilər ki, bu növbəti erməni yalanı və saxtakarlığıdır, onlara əhəmiyyət vermək lazım deyil.
“Ermənilər Laçın şəhərində Qubad İbrahimov adında bir vətəndaşın evini söküb, onun yerində həmin bu kilsəni tikiblər”
AMEA-nın A.Bakıxanov adına Tarix İnstitutunun əməkdaşı, maddi irs üzrə mütəxəssis Faiq İsmayılov “Bakı-Xəbər”ə şərhində “Laçının tarixində orada heç vaxt erməni kilsəsi olmayıb. Laçında alban kilsələri mövcuddur, bu barədə çox danışmışıq. Bu kilsə isə torpaqlarımız işğal edildikdən sonra tikilib. Məlumatıma görə, onu 2014-cü ildə inşa ediblər. Ermənilər belə ikinci belə bir kilsə də Zabux kəndində tikiblər. Bilirik ki, Laçında ermənilərin hansısa kilsə tikməsi qanunsuz idi, bu bütün beynəlxalq konvensiyalara, beynəlxalq hüquqa ziddir. Ermənilər Laçın şəhərində Qubad İbrahimov adında bir vətəndaşın evini söküb onun yerində bu kilsəni tikiblər. Kilsə tikilən ərazinin sahibi Qubad İbrahimovdur. Onun hüququ var ki, beynəlxalq məhkəməyə müraciət edib o kilsənin sökülməsi barədə qərar qəbul etdirsin. Çünki o ərazi onun mülkiyyətidir. Bu, məsələnin bir tərəfi. Digər tərəfdən o kilsənin məscidə çevriməsi barədə deyilənlərə gəlincə, ermənilər indi niyə bu barədə danışır? Bu təşəbbüs illər əvvəl irəli sürülüb. Hələ 5-6 il bundan əvvəl belə bir təşəbbüs olmuşdu ki, Laçın işğaldan azad edildikdən sonra Qubad İbrahimovun evinin yerində tikilən kilsə sökülməsin, məscidə çevirilsin. Amma sonradan dövlətin müvafiq orqanlarından deyildi ki, bu kilsə məscidə çevrilə bilməz. Bina həcmcə çox kiçikdir, orada laçınlıların ibadəti mümkün olmaz. İkincisi də, Laçında məscid tikintisi Laçın şəhərinin baş planına salınıb. Elə həmin kilsənin yaxınlığında böyük bir məscid tikiləcək, o da kifayət qədər böyük olacaq ki, Laçın şəhəri əhalisi burada ibadət edə bilsin.
O ki qaldı kilsənin sökülməsinə, bu, ermənilərin növbəti ajiotaj yaratmaq cəhdidir. Azərbaycan hökumətinin həmin kilsəni sökmək, yaxud məscidə çevirmək niyyəti yoxdur. O kilsə orada erməni vandallığının bir nümunəsi kimi qalacaq, hər kəs biləcək ki, bu kilsənin yerində olan ev vandalcasına dağıdılıb. O nun sökülməsi barədə hökumət tərəfindən heç bir rəsmi qərar yoxdur. Bu bina yerində qalmalıdır”-deyə bildirən F.İsmayılov əlavə etdi ki, erməni mediasının Azərbaycana atdığı iftira boş və mənasızdır.
İradə SARIYEVA
