“İkinci Qarabağ müharibəsindən sonra bölgədə gündəliyi müəyyən edən yenə də biz olduq”. Bu fikirləri Prezident, Silahlı Qüvvələrin Ali Baş Komandanı İlham Əliyev Müdafiə Nazirliyinin komando hərbi hissələrinin birinə Döyüş bayrağının təqdim olunması mərasimində çıxışı zamanı deyib.
Ölkə başçısının sözlərinə görə, bu gün regionda proseslər yenə də bizim təkliflərimiz əsasında cərəyan edir: “Əgər Vətən müharibəsindən sonrakı birinci ayları götürsək görərik ki, yenə də Ermənistanın havadarları bizə köhnə tezisləri qəbul etdirməyə çalışırdılar. Biz isə bunu qətiyyətlə rədd etdik və bu gün hər kəs görür ki, vaxtilə erməni işğalını əbədiləşdirmək üçün səylər göstərmiş Minsk Qrupu artıq gündəlikdə yoxdur, tarixin arxivindədir. Hər kəs görür ki, vaxtilə Qarabağ erməniləri üçün hansısa xüsusi status tələb edən qüvvələr artıq tamamilə fərqli açıqlamalar verirlər. Görürük ki, vaxtilə “Qarabağ Ermənistandır və nöqtə” deyən Ermənistan rəhbərləri indi mənim sözlərimi təkrarlayırlar: “Qarabağ Azərbaycandır!” Yəni, bütün bunlar bizim son iki il yarım ərzində apardığımız siyasətin nəticəsidir”.
“Müharibədən sonra Ermənistanı himayə edənlər yeni reallıqları qəbul etmək məcburiyyətində qaldılar”
Məsələ ilə bağlı “Bakı-Xəbər”ə açıqlama verən “İki sahil” qəzetinin baş redaktoru Vüqar Rəhimzadənin fikrincə, Azərbaycan qalib tərəf olduğu üçün köhnə planların yenidən ortaya atılmasına imkan vermədi: “O baxımdan, Prezident İlham Əliyevin səsləndirdiyi fikirlər təkcə ermənilərə yox, onları himayə edənlərə də bir xəbərdarlıq idi. Çünki Vətən müharibəsi və onun nəticələri tamamilə yeni geosiyasi reallıqlar yaratdı. Bu zaman, əlbəttə ki, əvvəlki tezislərin ortaya atılmasına imkan vermək olmazdı. Çünki Prezident İlham Əliyevin qətiyyəti, ordumuzun rəşadəti sayəsində əvvəlki status-kvo darmadağan edildi. Yarandığı gündən Ermənistanı himayə edən Minsk Qrupu tarixin arxivinə göndərinldi. Bütün bunları şərtləndirən və reallığa çevirən Azərbaycanın gücü, müharibədə qazandığı qələbə idi. Yoxsa ermənilər heç vaxt xoşluqla öz mənfur niyyətlərindən əl çəkməzdilər. Müharibədən sonra Ermənistanı himayə edənlər yeni reallıqları qəbul etmək məcburiyyətində qaldılar. Hətta Ermənistan baş naziri Nikol Paşinyan Qarabağı Azərbaycan ərazisi kimi tanıdığını deyir. Həqiqətən də bütün bunlar Vətən müharibəsindən sonra aparılan uğurlu siyasətin nəticəsidir. Azərbaycan bir daha regionda söz sahibi olduğunu sübut etdi. Eyni zamanda, davamlı şəkildə bu prinsiplərini uğurla qorumaqda və inkişaf etdirməkdədir. Ona görə ermənilərin havadarlarına da ciddi mesajlar verildi. Bu isə o deməkdir ki, Ermənistanı himayə edənlər tədricən öz addımlarını korrektə etməlidilər. Azərbaycan bu gün regionda diqtə edən tərəfə çevrilib. Bütün bunlar da ölkəmizin gücünün, qüdrətinin göstəricisidir. Azərbaycan istənilən məsələni haqq müstəvisi çərçivəsində, beynəlxalq hüquqa söykənərək ortaya qoyur və onun həllinə nail olur. Ona görə də ermənilər də, onlara havadarlıq edən avanturist qüvvələr də bunu dərk etməlidilər. Azərbaycanın gücü ilə hesablaşmalıdılar və şərtlərini qəbul etməlidilər”.
Vidadi ORDAHALLI
