Ordumuzun daha da gücləndirilməsi vəzifəsi bir nömrəli vəzifə olaraq qalır.
Bunu Azərbaycan Prezidenti, Silahlı Qüvvələrin Ali Baş Komandanı İlham Əliyev Müdafiə Nazirliyinin komando hərbi hissələrinin birinə Döyüş bayrağının təqdim olunması mərasimində çıxışı zamanı deyib.
Buna nail olmaq üçün kompleks tədbirlərin görüldüyünü qeyd edən dövlət başçısı bildirib: “Vətən müharibəsindən sonra yeni silahların alınması prosesi davam edir və artıq bir çox kontraktlar imzalanmışdır - həm yeni pilotsuz uçuş aparatlarının ölkəmizə gətirilməsi, həm uzaqmənzilli raketlərin ölkəmizə gətirilməsi, o raketlər ki, böyük dağıdıcı qüvvəyə və yüksək dəqiqliyə malikdir”.
Göründüyü kimi, Prezident uzaqmənzilli raketlərin hərbi arsenalımıza daxil olmasından danışıb. Bu amil Azərbaycan ordusunun möhkəmlənməsində nə kimi rola malik olacaq?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, hər bir müstəqil dövlət üçün bir neçə amil çox vacibdir: “Onlardan da ilki ordu və silahlı qüvvələrdir. Hər bir dövlət çalışır ki, ordusu güclü olsun. Ordunun güclü olması şəxsi heyətin mənəvi, psixoloji hazırlığı və müasir silahlarla bağlıdır. Texnologiya çox sürətlə dəyişir. Bu gün çox güclü, dəqiq vuran silahlar, artilleriya qüvvələri, raketlər kimdədirsə güc də ondadır. Hava qüvvələrinin, xüsusi təyinatlıların güclü olması, savadlı, bilikli kadr potensialının olması, ordunun hansı silahlarla silahlanması çox vacibdir. Ən müasir silahları, güclü ordusu olan ölkələrlə hesablaşırlar hər zaman və onlardan çəkinirlər. 2020-ci il qələbəsindən sonra Ermənistan bir çox şərtləri qəbul etmədi. 10 noyabr bəyanatına atəşkəs desələr də, bu təslimçilik aktıdır. Təslimçilik aktı olmasaydı ermənilər Kəlbəcər, Laçın, Ağdamı qaytarmazdılar. Bir çox öhdəlikləri yerinə yetirməzdilər. Bunlar hamısı güclü ordu ilə bağlıdır. Bir orduda əsgər savadlı, vətənpərvər, müasir silahlara yiyələnmiş olmalıdır. Eyni zamanda uzaq vuran, dəqiq raketlərin olması qonşu dövlətlərin Azərbaycanla hesablaşmasını təmin edəcək. O raketlərin əksər hissəsi bir çox ölkələrə satılmır. Hər ölkə gedib silah almır. Dünyanın yazılmış və yazılmamış qanunları var. Sənin həmin ölkələrlə siyasi müttəfiqliyin, əməkdaşlığın olmalıdır. Sevindirici haldır ki, Azərbaycanın qardaş Türkiyə ilə, İsraillə, Avropa ilə, Rusiya ilə, Amerika ilə, Çinlə, dünyanın ən qabaqcıl, hərbi potensialı olan ölkələri ilə çox gözəl əlaqələri var. Bu etimad qarşılıqlı əlaqələr nəticəsində yaranıb. Azərbaycan ordusu xeyli güclənib, bundan sonra daha da güclənəcək. Azərbaycan ordusunun hər il güclənməsi dövlətimizin daha da qətiyyətli addımlar atmasına səbəb olacaq”.
Bəllidir ki, Vətən müharibəsindən sonra yeni silahların alınması prosesi davam edir və bu istiqamətdə bir çox kontraktlar imzalanıb. Həm yeni pilotsuz uçuş aparatlarının ölkəmizə gətirilməsi, həm uzaqmənzilli raketlərin ölkəmizin silah arsenalına qəbulu ordumuzun hər gün potensialının artırılması üçün atılan addımlardı və bunu təqdir etmək lazımdır.
Məhəmmədəli QƏRİBLİ
