Son vaxtlar Ermənistanda hakimiyyətdə olan qüvvələr verdikləri açıqlamalarla, qərarlarla Moskvanı daha çox qıcıqlandırırlar. Bu arada Ermənistan hakimiyyətindən növbəti anti-Rusiya demarş.
Ermənistanın ədliyyə naziri Qriqor Minasyan bəyan edib ki, Ermənistan hökuməti tezliklə Beynəlxalq Cinayət Məhkəməsinin Roma statutunu ratifikasiya etmək üçün parlamentə müraciət edəcək. Rəsmi Moskva isə Ermənistanın Beynəlxalq Cinayət Məhkəməsinin Roma Statutuna qoşulmasını qəbuledilməz hesab edir. TASS agentliyi məlumat yayıb ki, belə bir qərarın qəbulu Moskva ilə münasibətlərə son dərəcə mənfi təsir edəcək və bununla bağlı İrəvana artıq xəbərdarlıq edilib. Ancaq belə görünür ki, erməni tərəfi bu məsələdə geri addım atmaq istəmir.
Qeyd edək ki, bu il martın 17-də Beynəlxalq Cinayət Məhkəməsi Rusiya prezidenti Vladimir Putinin həbs edilməsi barədə qərar çıxarıb. Həmin qanun Ermənistan parlamentində ratifkasiya edilərsə, Rusiya prezidenti Vladimir Putinin Ermənistana gələcəyi təqdirdə həbs edilmək ehtimalı var.
“Ancaq parlamentdə bununla bağlı müzakirələrin aparılması belə, iki ölkə münasibətlərinə mənfi təsir göstərəcək”
Məsələ ilə bağlı “Bakı-Xəbər”ə açıqlama verən siyasi şərhçi Qorxmaz İbrahimli buna bir neçə prizmadan yanaşdı: “Putinə qarşı həbs sanksiyası çıxarılandan üzübəri təkcə bu, Ermənistanın mövqeyini dəyişmədi. Eyni zamanda Rusiyanın Ukrayna müharibəsində üstünlüklərini itirməsi, beynəlxalq aləmdə böyük güclərin Moskvaya qarşı birləşməsi Ermənistan hakimiyyətini daha da həvəsləndirib. Yəni Rusiyadan qopmaqla bağlı. O biri tərəfdən, Ermənistanın belə bir sanksiyaya qoşulması məcburiyyəti var. Ona görə ki, Paşinyan hakimiyyətə gələndən bəri Qərbə doğru reveranslar edir. Rusiyanın Ukraynada hərbi potensialının zəifliyi ortaya çıxandan sonra ermənilər özləri üçün yeni bir müstəvi axtarmaqdadılar. Bunu da, təbii olaraq, Qərbdə görürlər. Rusiya prezidentinin Ermənistanda həbs olunması real görünməsə də, bununla ona təzyiq etmək istəyirlər. Ermənistan parlamentinə Beynəlxalq Cinayət Məhkəməsinin Roma statutunu ratifikasiya edilməsi göndəriləcək. Güman etmirəm ki, ölkə parlamenti bunu ratifikasiya edəcək. Ancaq parlamentdə bununla bağlı müzakirələrin aparılması belə, iki ölkə münasibətlərinə mənfi təsir göstərəcək. Ona görə ki, Ermənistan Rusiya ilə eyni iqtisadi və hərbi bloklarda təmsil olunur. Ancaq Paşinyan bütün bunları nəzərə almadan belə müzakirələrə gedir. Bu isə onu göstərir ki, Ermənistanın yeni hakimiyyəti Rusiyadan qopmaqda maraqlıdır. Çünki Paşinyan hakimiyyəti Rusiya ətrafında gedən prosesləri dəyərləndirməyə çalışır. Rusiya Ermənistanda hakimiyyəti zor gücü ilə devirmək istəyir, amma hələlik bunun üçün tam uyğun zəmin yoxdur. Paşinyan həm də belə təhlükələri önləmək üçün bəzi bu kimi addımlar atır. Təsadüfi deyil ki, Ermənistan Fransa ilə hərbi sahədə əməkdaşlığı dərinləşdirir. Ona görə də Ermənistan parlamenti həmin məsələnin ratifikasiyasını müzakirə etsə təəccüblənməyin”.
Vidadi ORDAHALLI
