Ukrayna prezidenti Volodimir Zelenski Azərbaycanın bu ölkəyə yeni təyin olunmuş səfiri Seymur Mərdəliyevi qəbul edərkən deyib ki, Azərbaycan Ukraynanın İrpen şəhərinin bərpasında iştirak edəcək. Seymur Mərdəliyevi Ukraynada diplomatik fəaliyyətə başlaması münasibətilə təbrik edən Zelenski Azərbaycanın Ukraynanın ərazi bütövlüyü və suverenliyinə verdiyi dəstəyə görə minnətdarlığını bildirib:
“Xüsusilə biz Azərbaycanın İrpen şəhərinin bərpasında iştirakına razılaşdıq. Bizim komandalarımız artıq bu sazişin həyata keçirilməsi üzərində işləyir. Bu, Ukraynanın müharibədən sonrakı bərpasına konkret töhfə olacaq”.
Zelenski, həmçinin, Azərbaycan iş adamlarını indidən infrastruktur və enerji layihələrinin icrasına qoşulmağa dəvət edib. Ümumilikdə, Azərbaycan müharibə başlayandan Ukraynaya 20 milyon dollar humanitar yardım edib. Daha 10 milyon yardım edəcək. Bütövlükdə Azərbaycanın indidən Ukraynanın pərpasında iştirak etməsi Rusiyanı qıcıqlandıra bilərmi?
“Çünki burada söhbət hərbi yardımdan yox, humanitar xarakterli dəstəkdən gedir”
Sözügedən məsələni “Bakı-Xəbər”ə şərh edən İdarəçilik Akademiasının müəllimi, sosioloq Hüseyn İbrahimov buna bir neçə prizmadan yanaşdı: “İlk növbədə onu qeyd etmək istərdim ki, Azərbaycan Rusiya-Ukrayna müharibəsində neytral mövqedən çıxış edir. Məsələnin sülh yolu ilə həllinin tərəfdarıdır. Bütün bunlarla yanaşı, Azərbaycan birmənalı olaraq Ukraynanın ərazi bütövlüyünü dəstəkləyir. Azərbaycan o ölkələrdəndir ki, Ukraynaya ilk humanitar yardım göstərən dövlətlərdən biri olub. Müharibə fevralın 24-də başladı, ayın 27-də Azərbaycan Ukraynaya ilk humanitar yardım göstərdi. Müxtəlif tranzit yüklərin Ukraynaya daşınmasında Azərbaycan öz dəstəyini əsirgəməyib. O cümlədən, Azərbaycan müəyyən sayda Ukrayna qaçqınını qəbul edib, oradan olan uşaqların reablitasiyasına yardım edib. Azərbaycan müharibədən, işğaldan zərər çəkən ölkə olduğuna görə, bütün bunların nə olduğunu çox yaxşı bilir. Üstəlik, Azərbaycan işğaldan azad edilən ərazilərin minalardan təmizlənilməsində, bərpasında təcrübəyə malik olan ölkədir. Bu baxımdan Azərbaycanın Ukraynanın bərpasına qoşulması müsbət haldır. Eyni zamanda bu, ölkəmizin beynəlxalq imici üçün müsbət göstəricidir. Ona görə də İrpen şəhərinin bərpasında iştirak etmək mühüm əhəmiyyət kəsb edir. Rusiyanın bundan qıcıqlanacağına gəldikdə isə, bu baxımdan narahat olmağa dəyməz. Düşünmürəm ki, Azərbaycanın bu addımına Rusiya mənfi yanaşsın. Çünki burada söhbət hərbi yardımdan yox, humanitar xarakterli dəstəkdən gedir. Ona görə də elə bir problemin olmayacağı qənaətindəyəm. Bu günlərdə Sankt-Peterburqda keçirilən beynəlxalq tədbirdə Rysiya prezidenti Vladimir Putin qeyd etdi ki, Qərb ölkələri Rusiyanı aldatdılar. Fikrimcə, Putinin bu fikri sıradan bir açıqlama deyildi. Bunun arxasında bəzi məsələlər var. Bu tezis onu göstərir ki, məsələ əslində çox mürəkkəbdir. Ona görə ki, Rusiya Ukrayna müharibəsinin bu qədər uzanacağını gözləmirdi. Kreml hesab edirdi ki, müharibə tez başa çatacaq. Ancaq prosesin uzanması göstərdi ki, Ukrayna tək deyil. Hiss olunur ki, Rusiya müharibənin uzanmasından narahatdır”.
Vidadi ORDAHALLI
