Separatçı tör-töküntüsü psixoloji cəhətdən o vəziyyətə düşüb ki, öz kölgələrindən belə qorxmağa başlayıblar. Sadə erməniləri basqı altında saxlamaq üçün onları da öz nağıllarına inandırmağa çalışırlar.
Xankəndiyə xarici şirkətlərdən gələn hər bir zəngə daşnaklar və separatçılar böyük şübhə ilə yanaşır və bu zəngləri "Azərbaycan xüsusi xidmət orqanlarının etdiyini" iddia edirlər.
Ermənistanın Milli Təhlükəsizlik Xidməti məlumat yayıb ki, guya
son vaxtlar Azərbaycan xüsusi xidmət orqanları "Artsax Respublikasının" telefon abunəçilərinə zəng edərək, özlərini "Gallup" və digər tanınmış sosioloji tədqiqat şirkətlərinin işçiləri kimi təqdim edirlər. İddialara görə, guya abunəçilərə Ermənistan Respublikasının Əmək və Sosial Məsələlər Nazirliyi, "Artsax"ın "xarici və daxili siyasi həyatı", ümumi vəziyyət və əhval-ruhiyyəni inkişaf etdirən sosial-iqtisadi vəziyyətlə bağlı suallar ünvanlayıb, "bununla da onlara lazım olan məlumatları əldə etməyə çalışırlar".
Artıq sonu çox yaxınlaşan separatçı tör-töküntülərinin ölümqabağı bu cür əndişələri təbiidir. Onlar o qədər cinayətlər ediblər ki, qorxuya düşüblər. Öz qorxularını Azərbaycana reinteqrasiya etmək arzusunda olan sadə ermənilərə də sirayət etdirmək istəyirlər.
"Onlar hər cür yalan, böhtan, şər icad edirlər ki, oradakı bir ovuc ermənini girovluqda saxlamağa davam etsinlər"
Məsələ ilə bağlı mövqe bildirən siyasi şərhçi Azər Həsrət "Bakı-Xəbər"ə açıqlamasında "Bizdə bir deyim var:" Xain xoflu olar". İndi sadə erməniləri girov saxlayan o cinayətkar dəstə də xof, qorxu içindədir. Yəni onlar hər cür yalan, böhtan, şər icad edirlər ki, oradakı bir ovuc ermənini girovluqda saxlamağa davam etsinlər. Başa düşürlər ki, məsələ kökündən həll olunanda cinayət törətməmiş, əli qana buzlaşmamış ermənilərin problemi olmayacaq. Azərbaycan dövləti onlara digər vətəndaşları kimi münasibət bəsləyəcək, amma o cinayətkar dəstə təbiidir ki, cəzalanacaq. Ona görə də onlar məsələnin kökündən və tez həll olunmasını bu və ya digər vasitələrlə əngəlləməyə çalışırlar. O baxımdan hardansa kimsə zəng vurub nəsə soruşanda onu belə Azərbaycan xüsusi xidmət orqanların işi kimi qələmə verirlər. Yaxud da bu cür zənglərə cavab verənlərə xəbərdarlıq edirlər ki, sən Azərbaycan xüsusi xidmət orqanlarına işləyirsən. Dediyim kimi, bütün bunlar xainlərin xofundan irəli gəlir"- deyə bildirdi.
A.Həsrətin fikrincə, amma onlar bir şeyi unudurlar ki, Azərbaycan xalqı xeyli müddət səbr edərək vəziyyətin yetişməsini gözlədi və 44 günün içində o torpaqları Ermənistanın işğalından azad etməyi bacardı. "İndi bir ovuc erməninin məsələsini Azərbaycan vaxtı çatanda dörd saata həll edəcək. Ona görə də yaxsi olardı ki, bu cinayətkar "çete", dəstə başını alıb Azərbaycan torpaqlarından rədd olub getsin, sadə ermənilər isə nəhayət ki, normal həyata başlasınlar"-deyə A.Həsrət vurğuladı.
İradə SARIYEVA
