Ermənistan Naxçıvana qarşı ekoterror zavodu tikir - ABŞ dəstəkdən imtina edəcəkmi…
Ermənistanın 30 ilə yaxın işğal altında saxladığı Azərbaycan ərazilərində törətdiyi ağır cinayətlər sırasında ekoloji cinayətlərin də miqyası çox böyükdür. 44 günlük Vətən müharibəsində Azərbaycan öz torpaqlarını işğaldan azad etdi.
Bu gün biz görürük ki, Ermənistan uzun illər işğal altında saxladığı torpaqlarımızda təbiətə qarşı da düşmən münasibət sərgiləyib. Ermənilərin törətdiyi terror nəticəsində regionun ekologiyası üçün ciddi təhlükələr yaranıb. Belə ki, həmin ərazilərdə bioloji müxtəlifliyə, flora və fauna növlərinə, xüsusi mühafizə olunan təbiət ərazilərinə ciddi zərər vurulub, ərazilər yandırılıb, su resursları çirkləndirilib, qiymətli ağac növləri ilə zəngin olan meşələr məhv edilib. Ümumilikdə, yeraltı və yerüstü sərvətlərin məqsədli şəkildə talan edilməsi nəticəsində bu bölgədə ekoloji tarazlıq pozulub və Azərbaycanın ekologiyasına ciddi ziyan dəyib.
Təəssüf ki, Ermənistan tərəfindən ekoloji terror hələ də davam edir. Belə ki, Ermənistan Naxçıvan Muxtar Respublikası ilə həmsərhəd bölgədə və Türkiyə ilə sərhədə çox yaxın ərazidə - Arazdəyəndə ABŞ sərmayəsi ilə 70 milyon dollarlıq iri metallurgiya zavodu inşa etməyə hazırlaşır. Zavodun inşası geniş zolaqda ətraf mühitin, ekosistemin pozulmasına, havanın zəhərli tullantılarla çirklənməsinə gətirib çıxaracaq. Bu da Naxçıvan, o cümlədən Sədərək sakinlərinin haqlı narazılığına səbəb olub.
Qeyd edək ki, zavodun inşası geniş zolaqda ətraf mühitin, ekosistemin pozulmasına, havanın zəhərli tullantılarla çirklənməsinə gətirib çıxaracaq.
Zavodun inşası Sədərəkdə mal-qaranın və əkinlərin məhvinə, insanların ciddi xəstəliklərlə üzləşməsinə gətirib çıxara bilər. Çünki təsərrüfatlarda Ermənistandan gələn “Şir Arxı”nın suyundan istifadə edilir.
Xatırladaq ki, ermənilər Araz çayını ekoloji fəlakətin qurbanına çeviriblər. Araz çayı Ermənistanın dağ-mədən sənayesi müəssisələrinin kollektoruna çevrilib. Araşdırmalar göstərir ki, hər il Ermənistan ərazisindən keçən 350 milyon kubmetr su kimyəvi maddələrlə çirkləndirilir.
- “Ermənistan inşa edəcəyi zavod vasitəsilə Azərbaycan ərazisinə və əhalisinə problem yaradır, bu problemin qarşısını almaq üçün…”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, dövlətlər öz ərazilərində hansısa fəaliyyətlə məşğul olmaqda sərbəstdir: “Buna görə də xarici dövlətlər və qonşu ölkələr bu məsələyə müdaxilə edə bilməz. Lakin bu fəaliyyət və ya quruculuq işləri hansısa şəkildə qonşu dövlətin ərazisinə, əhalisinə təhdid olarsa narahatlıq üçün əsas var. Belə olan halda qonşu dövlət haqlı olaraq məlum məsələnin üzərinə getməlidir. Ermənistanın atdığı məlum addımla bağlı Azərbaycan haqlı tərəfdir. Yəni Azərbaycan narazı olmaqdan kifayət qədər əsaslara sahibdir. Bu səbəbdən də Ermənistan dövləti belə bir müəssisənin qurulmasını sərhəd ərazidə deyil, daxildə həyata keçirməlidir. Buna qalarsa, Azərbaycan sərhəd ərazidə istənilən müəssisəni qura bilər və bundan Ermənistan tərəfi də əziyyət çəkər”.
Həmsöhbətimiz onu da əlavə etdi ki, Ermənistan vəziyyətdən çıxmaq istəyir, öz iqtisadiyyatını qurmağa çalışır. Bu onların haqqıdır. Lakin ətraf mühitə dəyəcək zərəri də düşünməlidirlər. Ətrafa dəyəcək fəsad Azərbaycana da nüfuz edəcəksə o zaman biz sakit dayana bilmərik: “Ermənistan inşa edəcəyi zavod vasitəsilə Azərbaycan ərazisinə və əhalisinə problem yaradır. Bu problemin qarşısını almaq üçün Azərbaycan tərəfi mütləq şəkildə hərəkətə keçəcək. Ona görə də ermənistan rəsmiləri bu addımı atmazdan öncə ciddi şəkildə düşünməlidir. Ona görə də Ermənistan rəsmiləri zavodu inşa etməzdən öncə ciddi şəkildə düşünməlidir. Onlar təxribatçı iqtisadi təşəbbüsdən əl çəkməlidirlər. Həmçinin, bu zavodun inşası üçün ABŞ dəstək olur. Amerika belə bir işə razılıq verməzdən əvvəl onun nə kimi ekoloji təxribata səbəb olacağını da araşdırmalı idi”.
Günel CƏLİLOVA
