Çində ortaya çıxan və qısa müddətdə başqa ölkələrə də görülən koronavirus (covid-19) yayılmaqda davam edir. Xüsusilə son dövrlərdə İran və İtaliyada həyatı kabusa çevirən koronavirus bütün dünya üçün ciddi problemə çevrilib.
Baki-xeber.com xəbər verir ki, İranın 31 vilayətinin 30-da yeni koronavirusa yoluxma halı rəsmən təsdiqlənib. Bu ölkədə koronavirusdan indiyədək 107 nəfər dünyasını dəyişib. İranın Səhiyyə, Müalicə və Tibbi Təhsil Nazirliyinin mətbuat xidmətinin müdiri Kiyanuş Cahanpurun sözlərinə görə, ötən sutka ərzində 15 nəfər bu virus nəticəsində ölüb. Cahanpur bildirib ki, ötən sutka ərzində 591 nəfər yeni koronavirusa yoluxub və ümumilikdə yoluxanların sayı 3 513-yə yüksəlib. Nazirlik rəsmisi 739 nəfərin sağaldığını əlavə edib.
İranda ilin sonuna kimi (21 mart 2020-dək) məktəb və universitetlərin fəaliyyəti də dayandırılıb.
İranın səhiyyə, müalicə və tibbi təhsil naziri Səid Nəməki məktəb və universitetlərin fəaliyyətinin dayandırması nəticəsində istirahət məkanlarına səfərlərin ləğv edilməsini İran vətəndaşlarına tövsiyə edib. S.Nəməkinin sözlərinə görə, İran vilayət rəsmiləri, polis və digər qurumların köməyilə vilayətlər arasında gediş-gəlişlər məhdudlaşdırılacaq. Nəməki əlavə edib ki, virusa yoluxma və ya şübhəli halı gizlədən şəxslər cinayət məsuliyyətinə cəlb olunacaq.
Bundan başqa, İran və İraq arasında sərhəd gömrükləri dezinfeksiya işlərinə görə bir həftə müddətinə bağlana bilər. Məlumata görə, İraqın sərhəd gömrükləri idarəsi İran tərəfinə bunu elan edib və 7 martdan 15 martadək İran-İraq gömrükləri bağlanacaq.
Məlumatda bildirilir ki, İranı Xosrəvi, Sumar, Mehran, Çəzzabə və Şələmçə sərhəd gömrükləri bir həftə fəaliyyət göstərməyəcək.
Məlumatda qeyd olunur ki, İran və İraq sərhəd rəsmiləri arasında sərhədlərin açıq saxlanılması üçün məsləhətləşmələr davam edir. Bununla belə, iranlı ixracatçılar ehtiyatlı addım atmalıdır.
Çin hökuməti İrana qarşı sanksiyalar tətbiq edən ölkələri koronavirusa görə bu tədbirləri dayandırmağa çağırıb. Çin Xarici İşlər Nazirliyinin rəsmi nümayəndəsi Çjao Litszyan bildirib ki, İran hökuməti və xalqı virusla mübarizə apardığı zaman birtərəfli sanksiyaların davam etməsi vəziyyəti daha da kəskinləşdirəcək: “Bu, həmçinin humanitar ruha ziddir. Çin epidemiya ilə mübarizədə maneələrin yaranmaması üçün İrana qarşı tətbiq olunan sanksiyaları dayandırmağa çağırır”.
ABŞ Prezidenti Donald Tramp isə, İran qəbul edəcəyi təqdirdə, ABŞ-ın koronavirusla mübarizə ilə bağlı bu ölkəyə kömək göstərməyə hazır olduğunu deyib. D.Tramp bildirib ki, ABŞ bu virusun öhdəsindən yüksək səviyyədə gəlir: “Bizdə dünyanın ən yaxşı həkimləri işləyir. Biz bu mübarizədə bir çox ölkəyə kömək edirik. İran istəsə, onlara da kömək edə bilərik. Onlar çox ziyan çəkib”.
İtaliyada isə koronavirusdan ölənlərin sayı 107 nəfərə çatıb. Ölkədəki 2706 nəfərin virusa yoluxduğu açıqlanıb. Ölkədəki təhsil müəssisələrinin martın 15-dək fəaliyyətinin dayandırıldığı bildirilir.
Avstraliyada isə ölənlərin sayı 2-yə yüksəlib. Ən son məlumatlara görə, ölkədə 51 nəfər virusa yoluxub. Avropada İtaliyadan sonra ən çox virus görülən Almaniyada yoluxanların sayı 262, Fransada isə 257-yə çatıb. Ən son Balkan ölkələrində aşkarlanan virusların mənbəyinin də İtaliya olduğu açıqlanıb.
Gürcüstanda koronavirusa yoluxanların sayı 4 nəfərə çatıb. Gürcüstanın Xəstəliklərə Nəzarət və İctimai Sağlamlıq Milli Mərkəzindən bildirilib ki, yoluxma aşkarlanan şəxs martın 1-də İtaliyadan qayıtmış Gürcüstan vətəndaşıdır.
Rusiyada isə koronavirusa yoluxmuş İtaliya vətəndaşı xəstəxanaya yerləşdirilib. Fevralın 29-da İtaliyadan Rusiyaya gəlmiş şəxs martın 2-də həkimə müraciət edib və koronavirus aşkar olunan xəstə infeksiya boksuna yerləşdirilib.
İsveçrədə koronavirusdan ilk ölüm faktı qeydə alınıb. Ölkənin qərbindəki Vo kantonunda martın 3-də xəstəxanaya yerləşdirilmiş 74 yaşlı xəstə vəfat edib. Qeyd olunur ki, həmin şəxs xroniki xəstəliklərdən əziyyət çəkirmiş.
İndoneziya hökuməti koronavirusa yoluxanlarları kimsəsiz adaya yerləşdirməyi planlaşdırır. Qeyd edilir ki, hökumət koronavirusa yoluxanlar üçün məskunlaşmamış Qalanq adasında xəstəxana təşkil edəcək. Əvvəllər vyetnamlı qaçqınlar yerləşdirildiyi adada hazırda xəstəxananın salınması imkanları nəzərdən keçirilir. Qeyd olunur ki, xəstəxanada minədək xəstə yerləşdirilə bilər. Bundan başqa, adada karantin mərkəzinin salınması nəzərdə tutulur.
Birləşmiş Millətlər Təşkilatı yeni tip koronavirusun yayılmasına görə 290 milyondan çox şagird və tələbənin təhsilinin dayandırıldığını açıqlayıb.
