İranda sosial şəbəkədə yeni koronavirusun saxta vaksinini satan şəxs saxlanıb. “Trend”in məlumatına görə, bunu İranın kiber polisinin rəis müavini Ramin Paşayi deyib. Onun sözlərinə görə, Şərqi Azərbaycan vilayətində polis əməkdaşları sosial şəbəkədə reklamlar əsasında həmin şəxsin koronavirusun vaksininə sahib olduğunu iddia etdiyini aşkarlayıb.
Paşayi əlavə edib ki, müttəhim vaksinə 8 milyon rialdan (təxminən 190 dollar) yuxarı qiymət təyin edibmiş.
Polis rəsmisi bu vaksinin indiyədək kimsəyə satılıb-satılmamasının araşdırıldığını deyib.
Qeyd edək ki, İranın Səhiyyə, Müalicə və Tibbi Təhsil Nazirliyi indiyədək 2 522 nəfərin yeni koronavirusa yoluxduğunu, 92 nəfərin dünyasını dəyişdiyini və 552 nəfərin sağaldığını təsdiqləyib.
