Çində ortaya çıxan COVİD-19 koronavirusu bütün dünyada sürətlə yayılmaqda davam edir. Baki-xeber.com xəbər verir ki, indiyə kimi 70-dən çox ölkədə koronavirus aşkarlanıb.
Koronavirusdan ən çox təsirlənən ölkə isə İran, İtaliya və Cənubi Koreyadır.
Polşada da koronavirusa ilk yoluxma halı qeydə alınıb. “Trend”in məlumatına görə, bu barədə ölkənin Səhiyyə naziri Lukaş Şumovski mətbuat konfransı zamanı bildirib.
O deyib ki, xəstə Polşaya Almaniyadan gəlib. Həmin şəxs barədə ətraflı məlumat verilməyib.
Qeyd edək ki, koronavirus hazırda 73 ölkədə yayılıb. Yoluxanların sayı 90 min nəfəri ötüb.
Çində koronavirus infeksiyası başlayandan sonra virus təxminən 150 dəfə dəyişib. Çinli alimlər müəyyən edib ki, bu müddət ərzində virus daha aqressiv iki yarımtipə bölünüb
Virusların 70 faizi L yarımtipinə, 30 faizi S yarımtipinə aid olub.
Qeyd olunur ki, Uhan şəhərində virus təzə yayılarkən daha çox L yarımtipi qeydə alınıb. Alimlər qeyd edir ki, yanvar ayında L yarımtipinin yayılması tezliyi azalmağa başlayıb.
Müşahidələr nəticəsində məlum olub ki, L yarımtipi S yarımtipi ilə müqayisədə daha aqressivdir. İnsan müdaxiləsi hər iki yarımtipin daha geniş yayılmasının qarşısını alıb.
Almaniyada COVİD-19 virusuna yoluxanların sayı 240 nəfərə çatıb. Ən çox yoluxma halı Şimali Reyn-Vestfaliya federal torpağında qeydə alınıb.
Burada 111 yoluxma halı müəyyənləşdirilib. Bavariyada 44, Baden-Vürtemberq torpağında 44 yoluxma aşkar edilib.
Qeyd olunur ki, koronavirus, Saksoniya-Anhalt torpağı istisna olmaqla, Almaniyanın bütün federal torpaqlarında yayılıb.
İsraildə mindən çox məktəbli koronavirusla əlaqədar karantinə yerləşdirilib. Buna səbəb Brenner rayonundakı məktəbdə şagirdlərdən birinin koronavirusa yoluxması olub.
Qeyd olunur ki, həmin şagird virusa oyuncaq mağazasında İtaliyadan gəlmiş İsrail vətəndaşı ilə ünsiyyətdən sonra yoluxub.
Bu günədək İsraildə 15 nəfərdə koronavirus aşkar edilib.
İndiyədək İranın 31 vilayətinin 28 vilayətində yeni koronavirusa (COVİD-19) yoluxma halı təsdiqlənib. Bu, İranın Səhiyyə, Müalicə və Tibbi Təhsil Nazirliyinin hazırladığı infoqrafikada öz əksini tapıb.
İnfoqrafikaya əsasən, 2 336 nəfərin yeni virusa yoluxma halı və 77 nəfərin bu virus nəticəsində dünyasını dəyişməsi təsdiqlənib. İndiyədək 435 nəfər sağalıb.
Nazirlik 5 737 nəfərin yeni koronavirus analizi verdiyini bildirir.
İranda bütün icraiyyə qurumları və dövlət işçilərinin xarici ölkələrə səfərləri ləğv olunub. Bu, İranın vitse-prezidenti İshaq Cahangirinin əlaqədar qərarında öz əksini tapıb. Bu barədə vitse-prezidentin informasiya portalı məlumat verib.
Qərara əsasən, yeni koronavirusun yenidən İrana daxil olmasının qarşısını almaq məqsədilə dövlət işçiləri beynəlxalq konfrans və sərgilərdə iştirak edə bilməzlər.
Qərarda, sadəcə, İran Xarici İşlər Nazirliyi istisna olunub və digər istisna halları vitse-prezidentin təsdiqi ilə baş tuta bilər.
İranda yeni koronavirus (COVID 19) nəticəsində indiyədək 2922 nəfər yoluxub. Bunu İranın Səhiyyə, Müalicə və Tibbi Təhsil Nazirliyinin mətbuat xidmətinin müdiri Kiyanuş Cahanpur deyib. Bu barədə IRINN məlumat verib.
K.Cahanpurun sözlərinə görə, ötən sutka ərzində daha 586 nəfər bu virusa yoluxub: “Tehran vilayətində 253, Gilan vilayətində 35, Mazandaran vilayətində 9, Simnan vilayətində 8, Gülüstan vilayətində 9, Şərqi Azərbaycan vilayətində 9, Kürdüstan vilayətində 4, Kirmanşah vilayətində 15, İlam vilayətində 7, Lorestan vilayətində 5, Xuzistan vilayətində 27, Fars vilayətində 14, Zəncan vilayətində 6, Mərkəzi vilayətdə 8, Qəzvin vilayətində 25, Əlborz vilayətində 19, Qum vilayətində 101, Çahar-Mahal və Bəxtiyari vilayətində 1, Kirman vilayətində 14, Sistan və Bəluçestan vilayətində 8, Rəzəvi Xorasanı vilayətində 8, Şimali Xorasan vilayətində 1 nəfərin yeni koronavirusa yoluxması ötən sutka ərzində bəlli olub” ,- deyə o qeyd edib.
Cahanpur bildirib ki, ötən sutka ərzində 15 nəfər dünyasını dəyişib və İranda bu virus nəticəsində ölənlərin sayı 92-yə yüksəlib.
Nazirlik rəsmisi əlavə edib ki, sağalanların sayı isə 552 nəfərə yüksəlib.
Qeyd edək ki, İranın Səhiyyə Nazirliyinin rəsmisi ötən gün 2 336 nəfərin yeni koronavirusa yoluxduğunu, 77 nəfərin dünyasını dəyişdiyini, 435 nəfərin sağaldığını bildirmişdi.
Tailandda dövlət qulluqçularının xaricə səfərləri məhdudlaşdırılıb.
Bundan başqa, məmurlar koronavirusun daha çox yayıldığı ölkələrdən qayıdarkən 14 günlük icbari karantinə yerləşdirilməlidir.
Qərara əsasən, hökumətin daha təhlükəli hesab etdiyi ölkələrə xidməti səfərlər tamamilə dayandırılır.
Hazırda ən təhlükəli ölkələr sırasına Çin, Cənubi Koreya, Yaponiya, İran, İtaliya, Almaniya, Sinqapur, Fransa daxil edilib.
Qeyd edək ki, bu günədək Tailandda 43 nəfər koronavirusa yoluxub, onlardan 31 nəfəri sağalıb.
Tacikistanda koronavirusun yayılmasının qarşısının alınması məqsədilə məscidlər müvəqqəti bağlanıb. Bu barədə ölkənin Dini İşlər üzrə Komitəsi qərar verib.
Qeyd olunur ki, bu qərar preventiv xarakter daşıyır.
Koreya Respublikasında koronavirusa yoluxma hallarının sayı ötən gün ərzində 516 nəfər yüksələrək 5328-ə çatıb. Bu barədə ölkənin Səhiyyə Nazirliyinin Xəstəliklərə Nəzarət və Profilaktikası Mərkəzindən bildiriblər.
Ölənlərin ümumi sayı 32-yə çatıb.
Mərkəz bildirir ki, yeni yoluxma hallarının 405-i Tequ şəhərində, 89-u isə Kensan-Pukto əyalətlərində baş verib. Cənubi Koreyanın paytaxtı Seulda bir, Pusan şəhərində isə üç yeni yoluxma hadisəsi qeydə alınıb. 41 nəfər tam sağalaraq xəstəxanalardan buraxılıb. Karantinə 28,4 min nəfər yerləşdirilib.
Son həftə Koreya Respublikasında yoluxma hadisələrinin sayının kəskin artması müşahidə olunur. Bununla əlaqədar olaraq ölkə hökuməti məktəblərdə tədrisi martın 23-nə qədər təxirə salıb.
Baki-xeber.com
