Türkiyə Prezident Administrasiyasının İctimaiyyətlə Əlaqələr Ədarəsinin rəhbəri Fəxrəddin Altun “Twitter” hesabında Türkiyəni tərk edən miqrantlarla bağlı paylaşım edib.
Baki-xeber.com-un xəbərinə görə, Türkiyədə olan suriyalılara “müvəqqəti qoruma” tətbiq edilməyə davam edildiyini bildirən F.Altun “Suriyalı qardaşlarımızın ölkəni tərk etmələri istənməyib. Qalmaq istəsələr qala bilərlər, getmək istəsələr gedə bilərlər. Sadəcə olaraq, miqrantların Türkiyəni tərk etmələrinin qarşısının alınmaması istiqamətində bir siyasət dəyişikliyinə getdik. Qaynaqlarımızın və personal sayımızın məhdud olduğunu nəzərə alaraq, Avropaya köçmək istəyən miqrantların qarşısını almağa çalışmaqdansa, Suriyadan daha çox qaçqın gəlməsi ehtimalına qarşı hazırlıq görürük” - deyə vurğulayıb.
Bu siyasət dəyişikliyinin ardından bəzi qaçqınların Türkiyəni tərk etməyə qərar verdiyinə işarə edən Altun son bir neçə gün ərzində Avropaya getmək üçün Türkiyəni tərk edən qaçqın sayının 80 min 888 olduğunu deyib: “Bu say qarşıdakı günlərdə daha da arta bilər. Türkiyə artıq İdlibdən qaçqın qəbul edə bilməz. Bununla yanaşı, nizamsız miqrasiya axınına qarşı hazırlıqlarımızı görürük. Avropa və digər ölkələr bu nəhəng çətinliyə qarşı dərhal tədbir görməlidir. Bizdən bütün bunları təkbaşına etməyimiz gözlənilməməlidir.”
“Heç bir əhəmiyyətli yardım almırıq”
Türkiyənin müharibədən, dağıntılardan və xaosdan qaçan 3,7 milyon suriyalı qaçqına sığınacaq verdiyini vurğulayan Altun “Türk xalqının səxavəti sayəsində milli qaynaqlarımızdan qardaşlarımıza kömək məqsədilə istifadə etməkdən qürur duyuruq. Ancaq təəssüf ki, beynəlxalq ictimaiyyət bizi bu çətinlik qarşısında tək qoydu. Aİ başda olmaqla, müttəfiqlərimizin bir çoxu siyasi və humanitar öhdəliklərini yerinə yetirməklə bu yükü bizimlə bölüşmürlər. İdlibdə və Suriyanın başqa yerlərində bəşəri fəlakətin qarşısını almaq üçün göstərdiyimiz səylərimizdə heç bir əhəmiyyətli yardım almırıq.
İdlibdəki münaqişəsiz zonanın məqsədi bölgədəki 4 milyon mülki şəxsin zülmə məruz qalmasının və kütləvi şəkildə qətlə yetirilməsinin qarşısını almaq idi. Məqsədimiz Əsəd rejiminin etnik təmizləmə və müharibə cinayətləri törətməsinin, daha çox insanın didərgin düşməsinin və nəhayət daha çox qaçqınla qarşı-qarşıya qalmağın qarşısını almaq idi. Təəssüf ki, bu mübarizədə tək qaldıq. Dəfələrlə bildirdik ki, bu yük ciddi şəkildə bölüşülməsə, artıq qaçqın qəbul etmək iqtidarında deyilik. Aİ və ABŞ-a çağırış edərək təhlükəsizlik zonasının yaradılmasını istədik, indi bu zonanı özümüz yaradırıq” - deyə bildirib.
“İkiüzlülükdən başqa bir şey deyil”
F.Altun qeyd edib ki, müttəfiqlərindən kifayət qədər dəstək almamaqları təəssüf doğurur: “Çağırışlarımız qulaqardına vurulduğunda, vədlər yerinə yetirilmədiyində və əsgərlərimiz hədəf alındığında, havada qalan sözlər və verilməyən dəstək qarşısında artıq səbrimiz qalmadı. Milyonlarla didərgin salınmış insanların və qaçqınların yalnız bizim problemimiz olduğu münasibətini qəbul edə bilmərik.
Suriyadakı bəşəri iztirablar, bu günə qədər görülməmiş miqyasda didərgin salınma və köç problemi təkcə bizim problemimiz deyil, eyni zamanda bölgənin, Avropanın və bütün dünyanın problemidir. Ciddi və möhkəm əməkdaşlığa açığıq və əlimizdən gələni edəcəyik, lakin başqaları da əllərindən gələni etməlidir.
Qaçqın siyasətimizlə bağlı kənardan edilən tənqidləri təəccüblə izləyirik. Bir neçə min qaçqınla nə edəcəkləri barədə ortaq fikrə gələ bilməyənlər 3,7 milyon qaçqını qəbul edən ölkəmizi ‘kifayətdir’ dediyi üçün tənqid etməyə cəsarət edirlər. Bu, utancverici ikiüzlülükdən başqa bir şey deyil.”
