Fransada bahalaşmaya qarşı çıxan “sarı gödəkcəlilər” adı almış kütləvi etiraz aksiyaları günlərdir davam edir. Baki-xeber.com xəbər verir ki, bu gün keçiriləcək sayca dördüncü aksiyaların daha şiddətli olacağı gözlənilir.
Bahalaşmaya qarşı küçələrə çıxan etirazçılar indi isə Prezident Emmanuel Makronun istefasını tələb edirlər. Yerli mətbuat Makronun istefası ehtimalının zəif olduğunu yazsa da, Fransa siyasi tarixində belə böhranlar əvvəllərdə yaşanıb.
Qeyd edək ki, Fransa konstitusiyasına görə, prezident vaxtından əvvəl istefaya gedərsə, onu Senat sədri əvəz edir. Istefadan sonrakı 20-35 gün arasında isə yeni seçkilər keçirilməlidir.
Bu arada, Euronews-a açıqlama verən "sarı gödəkcəlilər"in sözçüsü artıq tələblərinin yanacağın bahalaşması ilə bağlı deyil, yeni bir dövrün başlanması ilə bağlı olduğunu deyib.
Sözçü Leila, insanların ədalətsizliklə üzləşdiyini deyərək “Beşinci Respublika”nın bitdiyini və yeni bir dövrün başlamasının vacib olduğunu söyləyib: “Biz azadlığımıza və hüquqlarımıza sahib olmaq istəyirik”.
Qeyd edək ki, kütləvi aksiyalara görə, Fransa hakimiyyəti geri addım ataraq yanacağın qiymətinin artırılması barədə qərarının icrasını 6 aylığa dayandırmaq qərarına gəlib. Bu qərardan sonra isə qiymət artımlarının 2019-cu il üçün ləğv edildiyi açıqlanıb. Ancaq buna baxmayaraq ölkədə etirazlar səngimək bilmir.
