Səudiyyə Ərəbistanının vəliəhd şahzadəsi Məhəmməd bin Salman ölkədə çevriliş olacağından ehtiyatlanır.
Baki-xeber.com Türkiyə mediasına istinadən xəbər verir ki, kral ailəsinin bəzi üzvlərinin ona qarşı çevriliş edə biləcəyindən qorxan şahzadə ökənin müxtəlif bölgələrindən paytaxta hərbi qüvvə toplamağa başlayıb. Məlumata görə, şahzadə Salman dislokasiyası qərarını ötən həftə başlayan xarici səfərindən əvvəl verib.
Bir müddət əvvəl dövlətin bütün gücünü əlinə toplayan şahzadəyə qarşı jurnalist Camal Kaşıqçı cinayətindən sonra kral ailəsi və böyük tayfalar arasında narazılıq yarandığı və ona alternativ axtarışının güclənməsinə dair xəbərlər yayılmışdı.
Məhz buna görə, fevral ayında Səudiyyə ordusunun yuxarı səviyyələrində dəyişikliyə gedən şahzadə xaricə səfər etməzdən əvvəl yenidən bir sıra tədbirlər görüb. Qeyd edilir ki, şahzadə ölkənin şərq və qərb əyalətlərindəki hərbi hissələrin bir qismini xaricdə olarkən ola biləcək çevrilişin qarşısını almaq üçün paytaxt Ər-Riyada yerləşdirib.
şahzadə Salmana qarşı müxaliflərin çox güclü olduqları bildirilir.
Kral Salman bin Əbdüləzizdən sonrakı dövrə hazırlaşan müxaliflərin dəstəklədiyi, kralın qardaşı şahzadə Əhməd bin Əbdüləzizə kral ailəsi daxilində dəstəyin 95 faizə yüksəldiyi iddia edilir. Bundan əvvəl “Bloomberg” də, şahzadəyə müxalif olan qüvvələrin kral Salmandan sonrakı dövrə hazırlaşdığını yazırdı.
G-20 Zirvəsində iştirak etmək üçün Argentinaya gedən şahzadə Məhəmməd bin Salmanın qaldığı lüks oteldən Səudiyyə Ərəbistanının bu ölkədəki səfirliyinə köçmək məcburiyyətində qalıb. Məlumata görə, şahzadə üç gündür onun üçün ayrılmış lüks Four Seasons otelindən ayrılaraq səfirlik binasında qalır. Onun bu qərarı, Kaşıqçı cinayətinə görə etiraz aksiyaları və təhlükəsizliyilə bağlı verdiyi iddia edilir.
Bundan əvvəl də “Human Rights Watch” təşkilatı iddia edirdi ki, şahzadə Salman, argentinalı prokurorların Kaşıqçı cinayəti ilə bağlı başlatdığı araşdırmalara görə, qaldığı lüks oteldən Səudiyyə səfirliyinə köçüb.
Məlumata görə, argentinalı prokurorlar Kaşıqçı cinayəti, Yəməndə Səudiyyə Ərəbistanı liderliyindəki koalisiya qüvvələrinin törətdiyi müharibə cinayətləri və insan hüquqlarının pozulması ilə bağlı iş qaldırıb.
İstintaq iddiaları ilə bağlı açıqlama verən Argentina baş nazirinin müavini Daniel Raimondi Səudiyyə şahzadəsinin ölkəsinin təmsilçisi kimi Argentinada toxunulmazlıq hüququna sahib olduğunu deyib.
Xatırladaq ki, 2 oktyabrda Səudiyyə Ərəbistanın İstanbuldakı Baş Konsulluğunda öldürülən Camal Kaşıqçı ölkə siyasətini kəskin tənqid edən jurnalistlərdən biri olub.
Səudiyyə Ərəbistanın Baş Prokurorluğu Camal Kaşıqçının öldürülməsi ilə əlaqədar 5 nəfərin edamını tələb edib. "Səfirliyə daxil olduqdan sonra Camal Kaşıqçıya öldürücü dozada dərman verilib. Boğularaq öldürülən jurnalistin cəsədi parçalara ayrılıb, torbalara doldurulub. Camal Kaşıqçının cəsədi elə bu şəkildə də səfirlikdən çıxarılıb. Artıq bu işdə birbaşa əli olan şəxslərin kimliyi haqda məlumatlıyıq. Hətta Kaşıqçının cəsədini təslim alan, hətta kameraları bağlayan şəxslərin də görüntülərini əldə etmişik" - deyə Səudiyyə Ərəbistanın Baş Prokurorluğundan bildirilib.
