Rusiya ABŞ və NATO-nun Şərqi Avropa və Baltikyanı bölgəsində nüvə başlıqları yerləşdirmək ehtimalına sərt reaksiya verib.
Baki-xeber.com xəbər verib ki, bu barədə açıqlama verən Rusiya Federasiya Şurasının Müdafiə və Təhlükəsizlik Komitəsinin sədr müavini Frans Klintseviç bildiri ki, ölkəsi buna qarşı operativ reaksiya göstərmək imkanına sahibdir.
“Əgər ABŞ Şərqi Avropadakı bazalarına və Baltik ölkələrdəki NATO bazalarına nüvə başlıqları yerləşdirərəsə, Rusiya bu nöqtələri operativ şəkildə hədəf alacaq” – Rusiya rəsmisi bildirib.
Klintseviç Rusiyanın özünü bu təhdidlərdən qorumaq məcburiyyətində qalacağını deyib.
Qeyd edək ki, ABŞ Müdafiə Nazirliyini (Pentaqon) açıqladığı yeni doktrinasında, bütün dünyaya nüvə bombası daşımaq gücündə olan F-35 təyyarələri yerləşdiriləcəyi bildirilir.
Yeni nüvə doktrinasında əsas yer Rusiyaya ayrılıb. Doktrinada Çin, İran və Şimali Koreya da potensial rəqib kimi qeyd olunub. ABŞ-ın müdafiə naziri Ceyms Mettis sənədi şərh edərkən bildirib ki, doktrina hazırlanarkən Rusiyanın hərbi potensialının artması və həyata keçirdiyi strategiya nəzərə alınıb.
Doktrinada, Rusiya "potensial təhlükə" adlandırılır və qeyd edilir ki, Moskva birinci olaraq "məhdud nüvə zərbəsi" endirməklə hədələyir: “Moskva nüvə zərbəsini birinci endirməyə hazır olduğu ilə hədələyir. Bu zaman səhvən belə hesab edir ki, məcburi nüvə təhdidləri və ya məhdud birinci nüvə zərbəsi ABŞ-ı və ya NATO-nu iflic edə, bununla da münaqişəyə Rusiyanın diqtə etdiyi şərtlərlə son qoya bilər”.
Rusiya həmcinin, silahlar üzərində nəzarət barədə razılaşmaları və digər beynəlxalq öhdəlikləri pozmaqda ittiham olunur. Bundan əlavə, Rusiyanın nüvə potensialını yeniləməsi onun "fövqəldövlət" statusunu qaytarmaq istəyi kimi dəyərləndirilir. Bildirilir ki, ABŞ-ın Rusiya tərəfdən nüvə və ya qeyri-nüvə hücumlarını effektiv çəkindirmə taktikası Moskva rəhbərliyinin nüvə silahından birinci istifadənin nəticələri məsələsində yanılmamasına əsaslanır. Çünki Rusiya hakimiyyəti başa düşməlidir ki, preventiv nüvə zərbəsi öz hədəflərinə çata bilməz. “Bizim strategiyamız Rusiyaya nümayiş etdirəcək ki, nüvə silahından istənilən istifadə, hətta məhdud olsa belə, öz məqsədinə çata bilməz” - sənəddə deyilir.
Doktrinada Şimali Koreya "təxirəsalınmaz və gözlənilməz təhlükə" kimi dəyərləndirilir. Qeyd edilir ki, Pxenyan 2006-cı ildən bu yana 6 nüvə sınağı, o cümlədən ən təhlükəli olan hidrogen bombası sınağı keçirib, yaxın vaxtlarda ABŞ-ı vurmaq üçün ballistik raket yarada biləcək.
İrana da xüsusi yer ayrılır. Bildirilir edilir ki, Tehran kimyəvi və bioloji silah yaradılmasına investisiya qoymaqda davam edir. Həmçinin, İran Yaxın Şərqdə raket proqramına vəsait ayırır və gələcəkdə nüvə silahına sahib ola bilər.
Bütün bunlara baxmayaraq, ABŞ Rusiya və Çini rəqib kimi nəzərdən keçirmək istəmədiyini, onlarla stabil münasibətlərə can atdığını bəyan edir.
ABŞ müdafiə nazirinin müavini Patrik Şenaxan isə bəyan edib ki, Vaşınqton nüvə silahından yalnız "fövqəladə hallarda" istifadə edə bilər, o cümlədən Amerika Birləşmiş Ştatları və onun müttəfiqlərinə qarşı qeyri-nüvə hücumu olarkən: "Nüvə doktrinasına əsasən, ABŞ fövqəladə hallarda özünün və müttəfiqlərinin maraqlarını müdafiə etmək üçün nüvə silahlarından istifadə məsələsinə baxa bilər”.
Onun sözlərinə görə, fövqəladə hallar kimi həmçinin qeyri-nüvə strateji hücumları nəzərdə tutulur.
