Rusiya Federal Təhlükəsizlik Xidməti (FTX) Belarus prezidenti Aleksandr Lukaşenkonu fiziki yolla hakimiyyətdən kənarlaşdırmaqla ölkədə hərbi çevriliş etməyi planlaşdıran şəxsləri saxlayıb.
Baki-xeber.com xarici mediaya istinadən xəbər verir ki, FTX-nin açıqlamasında, Dövlət Təhlükəsizlik Komitəsi (DTX) ilə birlikdə keçirilən xüsusi əməliyyatda ABŞ və Belarus vətəndaşlığı olan Yuri Zenkoviç və Belarus vətəndaşı Aleksandr Fedutanın saxlandığı bildirilir.
Qeyd edilir ki, həmin şəxslər Prezident Aleksandr Lukaşenkoya sui-qəsdi və hərbi çevrilişi mayın 9-da Minskdə Qələbə günü münasibətilə keçiriləcək hərbi paradda həyata keçirməyi planlaşdırırmışlar.
“Saxlanan şəxslər belaruslu və ukraynalı millətçilərlə birlikdə Belarusda “rəngli inqilab” ssenarisi çərçivəsində hərbi çevriliş və prezident Aleksandr Lukaşenkoya sui-qəsd planlaşdırırdılar” – açıqlamada deyilir.
Radikal müxalif ideologiyalı bu şəxslərin internetdə gizli söhbət proqramı üzərindən hərbi çevriliş planını müzakirə etdiyi deyilən açıqlamada, onların Moskvada gizli şəkildə müxalif fikirli bir belaruslu generalla görüşməyə qərar verdiyi deyilir.
Sözügedən görüş Zenkoviçin ABŞ və Polşadakı məsləhətləşmələrindən sonra Moskvada bir restoranın kabinəsində baş tutub. Toplantıda iştirak edənlər belaruslu generala, planlarının uğurla həyata keçirilməsi üçün Belarusun bütün yüksək rütbəli məmurlarının öldürülməsi gərəkdiyini bildiriblər.
Xalqa müraciətlərini yayımlamaq üçün radio və televiziya mərkəzlərinin ələ keçirilməsi, hazırkı hökumətə sadiq daxili qoşunlar və çevik polis qüvvələrinin əngəllənməsi də daxil olmaqla hərbi çevriliş planını ətraflı müzakirə ediblər. Həmçinin, hüquq-mühafizə və təhlükəsizlik qüvvələrinin hərəkətlərini çətinləşdirmək üçün Belarusda enerji verilişini dayandırmaq da planlaşdırılırmış.
Rusiya kəşfiyyatı bildirir ki, prezident səlahiyyətlərinin ləğvi ilə konstitusiya quruluşunun dəyişdirilməsi və ölkənin idarə edilməsinin “Milli Sülh Komitəsi”nə həvalə olunması yekun hədəf olaraq qarşıya qoyulmuşdu.
Bundan başqa, açıqlamada, Zenkoviçin ölkə parlamentinin və hüquq sisteminin idarəçiliyini, Fedutanın isə siyasi islahatlar və ideoloji işləri öz üzərinə götürməyi planlaşdırdığı iddia edilir.
Çevriliş və sui-qəsd planlaşdırmaq ittihamı ilə tutulan şəxslərin Belarusa təhvil verildiyi bildirilir.
Belarus prezidenti Aleksandr Lukaşenko da onun övladlarına sui-qəsd hazırlayan qrupun üzvlərinin yaxalandığını bildirib. Belarus rəhbəri qeyd edib ki, qrupun üzvləri ABŞ-ın xüsusi xidmət orqanlarının əməkdaşları ilə əlaqəlidir.
Lukaşenkonun sözlərinə görə, cinayətkarlar əməliyyata uzun müddət hazırlıq görüblər, hətta oğurlayacaqları şəxsləri saxlamaq üçün xüsusi zirzəmi hazırlayıblar. Belarus prezidentinin sözlərinə görə, sui-qəsddə Amerikanın xüsusi xidmət orqanlarının əli ola bilər.
"Biz qrupu yaxaladıq, onlar göstərdilər ki, bunların hamısın necə planlaşdırırdılar. Sonra biz xarici xüsusi xidmət orqanlarının işini aşkarladıq, ehtimal ki, MKİ, FTB – bilmirəm, orada amerikalılardan kim işləyib. Biz onların Minskə gəlmək və prezidentə və uşaqlara sui-qəsdin təşkili ilə məşğul olmaq arzusunu aşkar etdik", - Lukaşenko jurnalistlərə deyib.
Onun sözlərinə görə, saxlanılanların uşağın (Lukaşenkonun övladlarının -red) ələ keçirilməsi planı varmış. Qrup üzvəri Homelsk əyalətində zirzəmi hazırlayıblar.
"Məni başqa şey təəccübləndirir. Niyə amerikalılar özlərini belə aparırlar? Prezidenti aradan götürmək məsələsi qoymaq, yadda saxlayın, ən yüksək siyasi rəhbərlikdən başqa buna heç kim razılıq verə bilmir. Yalnız onlar, başqa heç bir xüsusi xidmət orqanı", - Belarus prezidenti vurğulayıb.
Belarusun Federal Təhlükəsizlik Xidmətinin İctimaiyyətlə Əlaqələr Mərkəzi də ölkədə hərbi çevriliş cəhdinin qarşısının alındığını bildirib. Xidmətin məlumatına görə, Rusiyanın paytaxtı Moskvada ABŞ və Belarus vətəndaşlığı olan Yuri Zenkoviç və Belarus vətəndaşı Aleksandr Feduta saxlanılıblar. Qeyd edilir ki, onlar mayın 9-da Minskdə Belarus prezidentinə sui-qəsdi həyata keçirməklə hərbi çevriliş planı hazırlayıblar.
