Brüssel Moskva ilə münasibətləri məhv etdi. Baki-xeber.com xəbər verir ki, bunu Rusiya XİN rəhbəri Sergey Lavrov çinli həmkarı Van İ ilə danışıqlardan sonra mətbuat konfransında deyib.
Aİ-nin illərdir qurulmuş mexanizmləri məhv etdiyini vurğulayan Lavrov "AB ilə əlaqəmiz yoxdur. Bu əlaqələr Brüsselin birtərəfli qərarları ilə məhv edildi” deyib.
ABŞ və Qərb ölkələrinin Rusiya və Çinə qarşı sanksiyalar tətbiq etdiklərini xatırladan Lavrov, bu sanksiyaların qəbuledilməz olduğunu deyib.
"ABŞ, Avropa və Qərb diplomatiyadan daha çox öz qaydalarını tətbiq etmək yönündə addımlar atırlar. Onlar dünya nizamının əsasını beynəlxalq qanunlar deyil, öz qaydalarının təşkil etməsi gərəkdiyini düşünürlər. Sanksiyalar da belə qaydalardan biridir" – Lavrov bildirib.
Nazir qeyd edib ki, Avropada milli maraqları rəhbər tutan və Rusiya ilə partnyor dialoqunu qoruyan tək-tük ölkə qalıb, qalanları isə bütün mövcud mexanizmləri dağıdıblar.
"Hələlik Qərb cəbhəsində bir dəyişiklik yoxdur, amma Şərqlə bağlı gündəmimiz intensivdir və ildən-ilə zənginləşir", - Lavrov əlavə edib.
Rusiya XİN başçısı deyib ki, əgər Avropa İttifaqı yaranmış anormallığı aradan qaldırmaq istəsə, Moskva əlaqələri bərpa etməyə hazırdır.
Bu arada, Aİ-nin nümayəndəsi Lavrovun Rusiya ilə bu qurum arasında olan münasibətləri Brüsselin məhv etməsinə dair bəyanatına cavab verib.
"Şərhləri şərh eləmirik. Rusiya ilə Aİ-nin münasibətləri beş prinsip əsasında qurulur və bizim bu çərçivədə birliyimiz bizim əsas nailiyyətimizdir. Avropa İttifaqının sədri Şarl Mişel Rusiya Prezidenti Vladimir Putinlə elə dünən danışıb və bunun Aİ-nin Rusiyaya qarşı yanaşma tərzi olduğunu aydın şəkildə söyləyib", - RİA Novosti-nin müsahibi deyib.
"Rusiya Avropa İttifaqına qarşı konfrontasiya mövqeyindən çıxış edr. Rusiya beynəlxalq hüququ və insan haqlarını pozanda biz buna reaksiya verməliyik və Aİ-nin təhlükəsizliyi naminə maraqlarına və dəyərlərinə sadiq olaraq bundan belə də bu cür davranacağıq", - o əlavə edib.
Nümayəndə qeyd edib ki, Aİ ölkələrinin liderləri qurumla Rusiya arasındakı münasibətləri bu həftə sammitdə müzakirə edəcəklər.
Bu ərəfədə məlumat verilib ki, Aİ XİN başçıları Minsk razılaşmalarının yerinə yetirilməsinədək sanksiyalar saxlanılmaqla əməkdaşlığı nəzərdə tutan mövcud beş prinsipə sadiq qalmaq barədə razılaşıblar.
2016-cı ildə Aİ Rusiya ilə münasibətlərdə bütün üzv ölkələrin rəhbər tutduğu beş prinsipi qəbul edib. Prinsiplər Ukrayna üzrə Minsk razılaşmalarına tam əməl olunmasını, Aİ-nin şərq partnyorları ilə əməkdaşlığın möhkəmlənməsini, Avropa İttifaqının enerji təhlükəsizliyini, Aİ üçün maraq kəsb edən beynəlxalq məsələlərdə Avropa-Rusiya əməkdaşlığının inkişafını və RF və Aİ xalqları arasında əlaqələrin dəstəklənməsini ehtiva edir.
Qeyd edək ki, son zamanlar Rusiya ilə Avropa İttifaqı arasında ziddiyyətlərin yaranması bloger Aleksey Navalnı ilə bağlıdır. Brüssel ona görə Rusiyaya qarşı yeni sanksiyalar tətbiq edib. Rusiya XİN onları "dalana dirənmiş, qeyri-hüquqi addım" adlandıraraq müvafiq cavab hazırlayacağına söz verib.
