Ermənistanda qarşıdurma dərinləşir – Paşinyan tərəfdarlarını yenə küçələrə çağırdı, prezidentin impiçmenti gündəmə gəldi

img

Ermənistanın Baş naziri Nikol Paşinyanın Rusiyanın "İskəndər" operativ-taktiki kompleksinin keyfiyyətsiz olması barədə açıqlaması, ardınca Baş Qərargah rəisinin birinci müavini Tiqran Xaçatryanın onun fikirləri ilə razılaşmadığına görə istefaya göndərilməsindən sonra ölkədə yaranmış gərginlik davam edir.

  • "İskəndər" Ermənistanın özünü vurdu

Qeyd edək ki, Baş Qərargah rəisinin birinci müavini Xaçatryan Paşinyanın "İskəndər" komplekslərilə bağlı səs-küylü bəyanatına münasibət bildirərək onun açıqlamalarını şübhə altına alıb. “Bağışlayın, amma bu ciddi deyil. Bu cür səthi qiymətləndirmələrlə nəticə çıxarmaq düzgün deyil. Kimin nə dediyini bilmirəm, amma təkrar edirəm - bu mümkün deyil ”, - Xaçatryan bildirib.

Xaçatryan bu cavabının cəzasını çox ağır ödəyib - 24 fevralda Baş Qərargah rəisinin birinci müavini vəzifəsindən uzaqlaşdırılıb.

Bu qərardan sonra, Ermənistanda hərbçilərlə Paşinyan arasında açıq qarşıdurma başladı. Elə həmi gün Ermənistanın ən yüksək hərbi rəsmiləri bəyanat yayaraq Paşinyanı istefaya çağırıblar. Buna cavab olaraq Paşinyan ölkənin Baş Qərargahının bəyanatını hərbi çevrilişə cəhd adlandırıb və Qasparyanın istefaya göndərildiyini bəyan edib. Paşinyan tərəfdarlarını da meydanlara çağırıb. Eyni zamanda hərbçiləri dəstəkləyən müxalifət də İrəvanda aksiyalara başlayıb.

Ermənistan prezidenti Armen Sarkisyan isə Paşinyanın Qasparyanın istefası barədə qərar layihəsini imzalamadan baş nazirə geri qaytarıb. Üstündən yarım saat keçməmiş Paşinyan qərarı təkrar Sarkisyana göndərib. Müşahidəçilərə görə, Sarkisyan qərarı yenə də imzalamayacaq. Belə vəziyyətdə isə Paşinyanın məsələni Konstitusiya məhkəməsinə daşıyacağı gözlənir.

Bu arada, Paşinyan Sarkisyanın Qasparyanın istefası ilə bağlı qərarı imzalamamasını sərt tənqid edərək bunun əsassız olduğunu bildirib və tərəfdarlarını martın 1-də yenidən meydanlara çıxmağa çağırıb. "Sabah hərbi çevriliş cəhdindən, prezidentin anlaşılmaz, əsassız və heç bir hüquqi əsası olmayan qərarından bəhs edəcəyik…" - Paşinyan deyib.

Prezident Sarkisyan gərginlik yarandıqdan sonra Baş Qərargah rəisi ilə iki dəfə görüş keçirib ki, bu da Paşinyan komandasında ciddi şübhələrə yol açıb.

Bütün bunların fonunda prezident Sarkisyanın impiçment prosesi də gündəmə gəlib. Hakim “Mənim addımım” fraksiyasının deputatı Vaaqn Ovakimyan bildirib ki, Konstitusiyanın 139-cu maddəsinə əsasən, prezident baş nazirin sərəncam layihəsini etirazla geri qaytarmaq hüququna malikdir: "İlk baxışdan da Baş Qərargah rəisinin vəzifəsindən azad edilməsi barədə sərəncamını da prezident geri qaytararkən bu hüququndan istifadə edib. Lakin əslində məsələ belə deyil. Prezident özbaşına sərəncam layihəsini ona təklif edən orqana qaytara bilməz. İndiki halda baş nazir Konstitusiyanın 155-ci maddəsinə uyğun olaraq öz səlahiyyətləri çərçivəsində Baş Qərargah rəisini vəzifədən azad olunmasını təklif edib. Hətta ən güclü təxəyyüllə malik insan bu prosesdə Konstitusiyaya zidd element görə bilməz. Biz əslində prezidentin səlahiyyətlərindən özbaşına istifadəsini görürük. Prezidentin səlahiyyətlərindən özbaşına istifadə dövlət təhlükəsizliyini təhdid altınla qoya və stabilliyi poza bilər. Buna görə də Konstitusiyanın 141-ci maddəsinin kobud surətdə pozulduğunu nəzərə alaraq prezidentin impiçment prosesinin başlanılması üçün aydın əsaslar mövcuddur".

Tahir TAĞIYEV

Son xəbərlər