Böyük Britaniyanın cənub-şərqində koronavirusun daha sürətlə yayılan yeni növü aşkarlanıb. Britaniyanın Baş naziri Boris Conson və bir qrup elm adamı mutasiya olunmuş yeni koronavirusun əvvəlki virusdan 70 faiz daha yoluxucu olduğunu açıqlayıb.
Yeni ortaya çıxan koronavirusun daha asan yayıldığı, daha ciddi simptomlara səbəb ola biləcəyi və ya peyvəndi təsirsiz hala gətirə biləcəyinə dair hələlik dəqiq bir sübut yoxdur.
Baki-xeber.com xəbər verir ki, ilk dəfə sentyabr ayında Britaniyanın Kent şəhərində aşkar edilən koronavirusun yeni mutasiyası Avropada sürətlə yayılır.
İngiltərə səhiyyə naziri Matt Hankok mutasiyaya uğramış yeni koronavirusun nəzarətdən çıxdığını açıqlayıb. "Xəstə sayı sürətlə artır, gedəcək hələ çox yolumuz var. Peyvəndlər tamamlanmadan onu idarə etmək çox çətin görünür" - Hankok deyib.
Mutasiyaya uğramış koronavirusun nəzarətdən çıxdığını vurğulayan Hankok "Virusun planımızda mutasiya edəcəyi barədə məlumatımız yox idi. Mutasiya olunan virusun bu qədər sürətlə yayılacağını təxmin etməmişdik. VUI-202012/01 adlanan bu virusun orijinal koronavirusdan daha yüngül olduğuna dair bir dəlil yoxdur" deyib.
İngiltərədə yeni bir koronavirus növünün ortaya çıxmasının ardından ölkələr ehtiyat tədbirləri üçün sərhədləri bağlayırlar. Belçika Baş naziri Aleksandr De Kroo bu ölkə ilə hava və dəmir yolunun ən azı 24 saat dayandırılacağını bildirib. Qərarın bu gücədən tətbiq ediləcəyini deyən Kroo, 24 saatlıq müddətin uzadıla biləcəyini də sözlərinə əlavə edib.
İtaliya xarici işlər naziri də, İngiltərə ilə uçuşların qarşılıqlı olaraq dayandırıldığını elan edib. Hollandiya hökuməti isə dünən gecədən etibarən İngiltərə ilə uçuşları yanvarın 1-dək dayandırıb. Almaniya və Fransanın da İngiltərəyə uçuşları dayandıracağı və ya məhdudiyyət tətbiq edə biləcəyilə bağlı məlumatlar var.
Belçika və Hollandiyadan gələn məlumatlara görə isə, hər iki ölkədə də artıq yeni tip koronavirus mutasiyasına rast gəlinib. BBC-yə açıqlama verən Ümumdünya Səhiyyə Təşkilatının (ÜST) səlahiyyətliləri, Belçika və Hollandiyadan başqa, Avstriya və Danimarkada da mutasiyaya uğramış koronavirus yoluxmalarının olduğunu bildirib.
ÜST-nin Avropa Ofisi yeni mutasiyanın ortaya çıxmasından sonra üzv dövlətləri tədbirləri artırmağa çağırıb.
COVİD-19 mutasiyası ilə əlaqədar İngiltərə rəsmiləri ilə "sıx təmasda olduqlarını" açıqlayan ÜST "virusun yeni növünün xüsusiyyətləri və mümkün təsirləri" haqqında daha çox məlumat əldə edildikcə təşkilata üzv 194 ölkəyə məlumat veriləcəyini bildirib.
