Şimali Kiprin Xarici işlər naziri ABŞ konqresmenlərinə məktubunda nələrdən bəhs etdi...
Şimali Kiprin Baş nazirinin müavini və xarici işlər naziri Kudret Özersay ABŞ dövlət katibi Michael R. Pompeo və müdafiə naziri Mark Esperə ayrı-ayrılıqda məktub göndərib.
Baki-xeber.com-un xəbərinə görə, Özersay məktubunda Kipr Rum İdarəçiliyi ilə Yunanistana yaxınlığı və qərəzli fikirləri ilə tanınan ABŞ Konqresinin üzvləri Frank Pallone, Gus Bilirakis və Carolyn Maloney tərəfindən ada ətrafında təbii qaz axtarışı mövzusunda ABŞ Xarici işlər və Müdafiə Nazirlərinə göndərilən məktubda yer alan yalan iddialara cavab verib. Özersay, Kipr türklərinin adanın ətrafındakı təbii qaynaqların bərabər sahibləri olduqlarını və bu səbəbdən də təbii qaynaqlara dair bütün qərarların Kipr türkləri və Kipr rumları tərəfindən qəbul edilməli olduğunu bildirib. Özersay Kiprin türk və rum toplumlarının bərabər hüquqlarına və Kipr Türk tərəfinin bütün etiraz və xəbərdarlıqlarına baxmayaraq Rum tərəfinin 2000-ci illərdən bəri təktərəfli və qanunsuz fəaliyyətlərdə israr etdiyini, adadakı və bölgədəki gərginliyin səbəbinin də məhz onun təxribatçı münasibətinin nəticəsi olduğunu qeyd edib. Nazir Rum tərəfinin birtərəfli təşəbbüslərində israrlı olduğunu və Şimali Kipr türk xalqının ortaq qərar qəbul edilməsində iştirakının təmin edilməsi mövzusunda işbirliyindən imtina etməsi səbəbilə ŞKTC-nin öz hüquq və mənafelərini qorumaq və daha da irəliyə aparmaq üçün Türkiyə Respublikası ilə kontinental şelf delimitasiya müqaviləsi imzaladığını və Türk Petrolları Korporasiyasına təbii qaz araşdırması üçün səlahiyyət verdiyini xatırladıb. Bundan əlavə, Kipr Türk tərəfinin 2011, 2012 və nəhayət 2019-cu ildə təbii qaz axtarış işlərində əməkdaşlıq üçün Kipr Rum tərəfinə vicdanla təkliflər verdiyini, lakin Kipr Rum rəhbərliyinin bu təklifləri qəbul etmədiyini bildirən Özersay idarəetmə və sərvəti Kipr Türklərilə paylaşmaqdan imtina edən Kipr Rum tərəfinin bu zehniyyətinin 52 ildir Kipr probleminin həllinin qarşısını aldığını vurğulayıb. Beynəlxalq ictimaiyyətin yuxarıda adı çəkilən Amerika Konqresi üzvlərinin etdiyi kimi Kipr Türklərinin adadakı hüquqlarını görməzdən gələrək Kipr Rum tərəfinə verdiyi dəstəyin Rumların barışmaz münasibətini artırdığını diqqətə çatdıran cənab Özersay məktubunda Kipr Türk tərəfinin, karbohidrogen ehtiyatları da daxil, adaya dair bütün məsələlərin əməkdaşlıq, diplomatiya və dialoq yolu ilə həllinə tərəfdar olduğunu vurğulayıb.
SAMİRƏ
