18/09/2020 10:59
728 x 90

Dəhşətli partlayışla sarsılan Beyrut qarışdı... Nümayişçilər 4 nazirlik binasını ələ keçirdi, ordu küçəyə çıxdı, baş nazirdən erkən seçki mesajı gəldi... - VIDEO / YENİLƏNDİ

img

Livanın paytaxtı Beyrutda, 4 avqustda 158 nəfərin ölümü, 6 mindən çox insanın yaralanması ilə nəticələnən dəhşətli partlayışdan 4 gün sonra başlayan hökumət əleyhinə etirazlar davam edir.

Baki-xeber.com xarici mediaya istinadən xəbər verir ki, dünən etirazçılar Xarici İşlər Nazirliyi və İqtisadiyyat Nazirliyinin binalarına basqın etdikdən sonra Ətraf Mühit və Energetika nazirliklərinə də giriblər. Beyrut küçələrinə yeridilən Livan ordusu isə artıq nümayişçilərin işğal etdiyi dövlət binalarını boşaltmağa başlayıb, əvvəlcə nümayişçilər Xarici İşlər Nazirliyinin binasından çıxarılıb. Nazirliyin yerləşdiyi əraziyə çox sayda əsgər gətirilib, etirazçıların sayı isə azalmağa başlayıb.

Livandakı El Manar televiziyasının verdiyi məlumata görə, paytaxtda hökumət əleyhinə etiraz aksiyaları zamanı təxminən 490 nəfər yaralanıb, bir polis əməkdaşı isə ölüb.

Beyrutun mərkəzində bir çox bir çox obyekt etirazçılar tərəfindən yandırıb, şəhərdəki dövlət və özəl obyektlərə ciddi ziyan dəyib.

Bu arada, Livanın baş naziri Həsən Diab növbədənkənar parlament seçkilərinin keçirilməsini təklif edib. H.Diab növbədənkənar parlament seçkilərinin keçirilməsinin böhrandan yeganə çıxış yolu olduğunu deyib: "Mən Nazirlər Kabinetinin növbəti iclasında növbədənkənar parlament seçkilərinin keçirilməsi təklifini təqdim edəcəyəm” – deyən baş nazir ölkənin çox çətin bir dövrdən keçdiyini bildirib.

Beyrut Limanında baş verən partlayışın illərlə davam edən korrupsiya və pis idarəçiliyin nəticəsi olduğunu söyləyən Diyab, "Limandan məsul olanların hamısı məsuliyyətə cəlb ediləcək. Bu fəlakət cavabsız qalmayacaq. İstintaq fəlakətdə bağlantısı olan hər kəsi əhatə etməklə genişləndiriləcək" deyib. 

  • X X X

Beyrutda hökumət əleyhinə minlərlə insanın iştirak etdiyi etirazlar davam edir. Baki-xeber.com xarici mediaya istinadən xəbər verir ki, Beyrutdakı etirazçılar Xarici İşlər və İqtisadiyyat nazirliklərinin binalarına basqın etdikdən sonra Ətraf Mühit Nazirliyinin, az əvvəl isə Energetika Nazirliyinin binasına giriblər.

Nümayişçilər Livan Banklar Birliyi binasının qarşısında da toplaşıb. Binada yanğın baş verdiyinə dair məlumatlar yayılıb.

Son məlumatlara görə, nümayişləri yatırmaq üçün ordu Beyrut küçələrinə çıxmağa başlayıb. Beyrutun mərkəzində də görünən əsgərlər nümayişçilərdən Xarici İşlər Nazirliyinin binasını tərk etmələrini istəyib. Lakin nümayişçilərin az bir hissəsi bu tələbi yerinə yetirib, digərləri isə daş və dəyənəklə təhlükəsizlik qüvvələrinə müqavimət göstərir.

Digər tərəfdən Livanın MTV televiziyası, Livan ordusuna aid əsgərlərin etirazçıların hücum etdiyi Beyrutdakı Energetika Nazirliyinin binasına çatdığını bildirir.

  • X X X

Livanın paytaxtı Beyrutda Şəhidlər Meydanında başlayan və minlərlə insanın iştirak etdiyi etiraz aksiyası davam edir. Son məlumatlara görə, 3 nazirlik binasına girən nümayişçilər dördüncü nazirliyə hücum ediblər.

Bundan başqa, Şəhidlər Meydanındakı nümayişçilər Livan Banklar Birliyinin binasına girməyə çalışırlar.

  • Qarşıdurmalarda ilk ölüm...

Bu arada, təhlükəsizlik qüvvələri parlament binasına girməyə çalışan nümayişçilərə müdaxilə edib. Baş verən qarşıdurmalarda yaralananların sayı 230-ı keçib. Etirazçıların hədəfi olan Le Gray otelindəki qarşıdurmada isə təhlükəsizlik qüvvələrinin bir əməkdaşı ölüb.

  • X X X

Avqustun 4-də Livanın paytaxtı Beyrutdakı Beyrut Limanında baş verən partlayışdan sonra minlərlə insan küçələrə çıxıb.

Baki-xeber.com xarici  mediaya istinadən xəbər verir ki, "Hesab günü" şüarı ilə küçələrə çıxan aksiyaçılar limanda baş verən partlayışa görə bütün məsul şəxslərin, xüsusən prezident Mişel Avnın istefasını tələb edirlər. Etirazçılar paytaxtdakı Şəhidlər Meydanına toplaşaraq parlament binasına tərəf yürüş edib. Polis nümayişçilərin yürüşünə mane olmaq üçün ərazini beton və dəmir baryerlərlə bağlayıb, maneələri keçmək istəyən etirazçılara gözyaşardıcı qazla müdaxilə edib. Gərginliyin artdığı aksiyalarda nümayişçilər polis müdaxiləsinə daş atmaqla cavab verirlər.

  • 142 nəfər yaralandı

Livan Qırmızı Xaç Təşkilatı, etirazçılarla təhlükəsizlik qüvvələri arasında parlament binası yaxınlığında yaşanan qarşıdurmada 142 nəfərin yaralandığını bildirir. Qeyd edilir ki, 110 yaralıya hadisə yerinə müdaxilə edilib, digər 32 yaralı isə yaxınlıqdakı xəstəxanalara aparılıb.

  • Etirazçılar XİN-in binasını ələ keçirib öz qərargahları elan etdilər

Bundan başqa etirazçılar paytaxtın Eşrafiya bölgəsində yerləşən Xarici İşlər Nazirliyinin binasına basqın ediblər. Nümayişçilər binanın üzərinə "Beyrut silahsız şəhərdir" yazılmış pankart asıblar. Nümayişçilər binanın içərisində asılmış Prezident Avnın şəkillərini çölə ataraq cırıblar.

Məlumatlara görə, etirazçılar XİN-in binasını öz qərargahları elan ediblər.

  • İqtisadiyyat Nazirliyi və Ətraf Mühit Nazirliyi də etirazçıların hədəfi oldu

Bundan başqa etirazçıların Beyrutun mərkəzində İqtisadiyyat Nazirliyinin də binasına daxil olduğu bildirilir. Etirazçıların həmçinin Ətraf Mühit Nazirliyinin binasına daxil olmağa çalışdığı da qeyd edilir.

Qeyd edək ki, uzun müddətdir iqtisadi böhranın davam etdiyi Livanda 4 avqustda meydana gələn partlayışdan sonra ölkədə iqtisadi vəziyyət daha da pisləşib.

Son xəbərlər