Belarusla Rusiya arasında özəl təhlükəsizlik şirkəti Vaqner qrupu ilə bağlı gərginlik davam edir. Minsk saxlanan 33 qrup üzvünün ölkədə qeyri-sabitlik yaratmaq və seçkilərə müdaxilə etmək planları hazırladığını iddia edir, Moskva isə qrupun hədəfinin İstanbul vasitəsilə üçüncü ölkəyə getmək olduğunu bildirir.
Bu arada Belarus lideri Aleksandr Lukaşenko Belarus xüsusi xidmət orqanlarının rəhbəri Valeri Vakulçik və İstintaq komitəsinin rəhbəri İvan Noskeviçlə məsələni müzakirə etmək üçün bir araya gəlib.
Lukaşenko görüşdə Moskvanın dediklərinin əksinə olaraq muzdluların ölkəyə fərqli məqsədlər üçün gəldiyini bildirib: "Ruslar Moskvanın dediyi kimi İstanbula uçmağı planlaşdırmırdılar. Ölkəmizə "fərqli məqsədlər üçün" gəlmişdilər. 33 Rusiya vətəndaşı Belarusa göndərilməsi planlaşdırılan 180 və ya 200 nəfərlik qrupun tərkib hissəsidir".
Təhlükəsizlik qüvvələrinə, ruslarla diqqətli davranmağı tapşıran Lukaşenko, "Əlbəttə, bu insanlar günahkardır, lakin onlara qarşı sərt tədbirlər görmək üçün yetərli deyil. Onlar əsgərdirlər, əmr aldılar və gəldilər. Biz əmri verəni və onları buraya göndərəni ortaya çıxarmalıyıq” deyib.
Yalanlar üzərində siyasət qurmadıqlarını və mətbuat üzərindən problemi həll edə bilməyəcəklərini deyən Lukaşenko, heç nəyi gizlətmədiklərini və həqiqəti öyrənməyin vacib olduğunu bildirib.
Minsk rəsmiləri olayla bağlı bir çox məlumatın dövlət sirri olduğunu bildirirlər.
Kremlin sözçüsü Dmitri Peskov, Minskdə tutulan 33 Rusiya vətəndaşının özəl bir təhlükəsizlik şirkətinin işçisi olduğunu təsdiqləyib və əsas uçuş məntəqəsi olan İstanbula uçmadan əvvəl təyyarələrini qaçırdıqları üçün tranzit nöqtəsi olan Belarusda qaldıqlarını qeyd edib. Rusiyanın Belarusdakı səfiri Dmitri Mezentsev də Minskdə tutulan Rusiya vətəndaşlarının 25 iyulda İstanbula getməyi planlaşdırdıqlarını, ancaq təyyarəni qaçırdıqlarını bildirib.
Belarus Prezidenti Aleksandr Lukashenko isə Təhlükəsizlik Şurasının iclasında rus muzdluları haqqında "Onlar müdaxiləyə hazırlaşırdılar" deyib.
