“Vaqner” Hafterə dəstəyi dayandırır…
Türkiyənin hərbi dəstəyini alan Liviya Ordusu üsyançı general Hafterin bütün planlarını alt-üst edib. Hafter silahlılarına Rusiyanın muzdlu döyüşçülərdən ibarət “Vaqner” özəl hərbi şirkəti (Vaqner qrupu) və BƏƏ-nin Sudandan gətirdiyi Cancavid milisləri də dəstək verir.
Ancaq bütün bunlara baxmayaraq Liviya Ordusu, yaxın günlərə qədər bir çox bölgədə hücumlar həyata keçirən Hafter ordusuna ağır zərbələr endirməyə başlayıb. Liviya Ordusunun irəliləməsinin Hafter ordusunda parçalanmalar yaratdığı barədə də xəbərlər yayılıb.
Digər tərəfdən, Rusiyanın muzdlu döyüşçülərdən ibarət “Vaqner” qrupunun da üsyançı generalla aralarında yaranmış fikir ayrılığına görə bəzi bölgələrdən çəkilməyə başladığına dair xəbərlər dolaşır.
Belə iddialar da səslənir ki, Liviyadakı qanunsuz silahlı qüvvələrin liderini dəstəkləmək məsələsində Rusiya xarici işlər naziri Sergey Lavrovla müdafiə naziri Sergey Şoyqu arasında fikir ayrılığı yaranıb.
Rusiyalı hərbi ekspert Pavel Felqenhauer “Rosbalt” xəbər portalına, Liviyadakı son hadisələrlə əlaqədar Rusiyanın yol xəritəsinin pərdə arxasında baş verənlərlə bağlı maraqlı iddialarla çıxış edib.
Liviyadakı vəziyyətin olduqca mürəkkəb olduğunu bildirən Felqenhauer, Rusiyanın Liviya böhranına yanaşmasının da çox sadə olmadığını bildirib: "Moskvadakı fərqli qurumlar bu mövzuda fərqli mövqeyə sahibdirlər. Müdafiə Nazirliyi Hafteri dəstəkləyir, Kreml və Xarici İşlər Nazirliyi isə dəstəkləmir".
Felqenhauer bildirir ki, qurumlar arasında fikir ayrılıqları yanvar ayında Moskvada Liviyanın Baş naziri Fayiz es-Sarracın da qatıldığı, lakin Hafterin anlaşmanı imzalamadan Moskvanı tərk etdiyi toplantıda ortaya çıxdı: "Bu görüşdə Hafter heç bir sənəd imzalamadı və getdi. Rusiya Müdafiə Nazirliyi Hafteri dəstəklədi, Rusiya Xarici İşlər Nazirliyi isə Hafter qınadı".
Bu yaxınlarda Kremlə yaxın KİV-lərdə Rusiya özəl hərbi şirkəti “Vaqner”ə bağlı silahlı qruplara cəbhədən geri çəkilməklə bağlı göstəriş verildiyi və Hafterin bu qruplara pul ödəməyi dayandırdığına dair xəbərləri xatırladan Felqenhauer, daha sonra Rusiyanın Sarracla əlaqə qurduğunu iddia edir.
Moskvanın Liviya mövzusunda rəsmi olaraq neytrallığını qorumasına baxmayaraq, qurumlar arasında birliyin olmadığını iddia edən Felqenhauer, müdafiə naziri Şoyqunun Hafter və ətrafı ilə dəfələrlə görüşdüyünü, Lavrovun isə Hafterin hərəkətlərini qınadığını bildirib. Felqenhauer, Xarici İşlər İdarəsinin Hafterə, çox irəliyə getməsi və itirməyə başladığı üçün dəstəyin kəsilməli olduğunu düşündüyünü iddia edib.
TAHİR
