“USS Theodore Roosevelt” təyyarə gəmisinin kapitanı ABŞ Hərbi Dəniz Qüvvələrinə məktub göndərərək koronavirusla bağlı kömək istəyib.
Baki-xeber.com xarici meddiaya istinadən xəbər verir ki, Sakit okeandakı Guam adasında karantinə alınan “USS Theodore Roosevelt” təyyarə gəmisinin kapitanı Brett Kroze, ABŞ Hərbi Dəniz Qüvvələrindən göyərtədəki bütün personalın quruya çıxarılıb karantinə alınmasını istəyib.
100-dən çox əsgərin yeni bir növ koronavirusa (Covid-19) yoluxduğu gəminin kapitanının məktubu Kaliforniyada yerləşən “The Chronicle" adlı xəbər saytına dərc edilib.
Kapitan Kroze 4 səhifəlik məktubunda yalnız az sayda əsgərin Guam adasına çıxarılıb xəstəxanaya yerləşdirildiyini, ancaq göyərtədə olan 5 minə yaxın əsgərin 14 günlük karantin və ara məsafəsi qaydalarına əməl etməsinin mümkün olmadığını bildirib.
"Döyüş gəmisinin müəyyən məhdudiyyətlərinə görə biz bunu (karantin və ara məsafəsi tətbiq etmək) edə bilmirik. Xəstəliyin şəxsi heyət arasında yayılması sürətlə davam edir" - Kroze deyib.
Nüvə mühərrikli təyyarə gəmisinin kapitanı, təyyarədə infeksiyanın yayılmasının qarşısını almaq üçün "ən qısa müddətdə bütün personalın gəmidən endirilib, Guam adasındakı karantin altına alınmasını” istəyir.
"Biz müharibədə deyilik. Dənizçilərin ölməsinə ehtiyac yoxdur. İndi tədbir görməsək, ən etibarlı ünsürümüz olan dənizçilərimizə lazımi qədər qayğı göstəməmiş olacağıq. Xidmətdəki bir ABŞ nüvə təyyarə gəmisinin personalının əksəriyyətinin iki həftə ərzində quruya çıxarılması fövqəladə bir tədbirdir. Ancaq bu lazımlı bir tədbirdir" – Kroze məktubunda yazıb.
Kapitan Kroze, ABŞ təyyarə gəmisindəki vəziyyətin bir müddət əvvəl infeksiya yayılmış gəmilərin vəziyyətindən daha pis ola biləcəyilə bağlı xəbərdarlıq edib və gəmidə fərdi kabinələr və otaqların olmadığını deyib.
"Hazırda müharibə mümkün deyil. Sülh dövrü qaydalarının tətbiq edilməsini tövsiyə edirəm" - deyən Kroze, karantin olmadan testlərin həll yolu olmayacağını söyləyib.
ABŞ hərbi gəmilərinin xidmətdə olarkən şəxsi heyətini quruya çıxarması hərbi qaydalara zidd olduğu və əvvəllər belə bir tələbin Amerika ordusunda olmadığı bildirilir.
ABŞ Hərbi Dəniz Qüvvələrinin rəsmisi isə məsələ ilə bağlı CNN televiziyasına açıqlamasında məktubdan yeni xəbərdar olduqlarını və Donanmanın göyərtədəki bütün personalın quruya çıxarılmasına icazə verə biləcəyini, ancaq Guam adasında yetərli çarpayının olmadığını deyib.
