26/05/2020 22:25
728 x 90

Ermənistanda Səhiyyə Nazirliyinin 14, Gürcüstan Müdafiə Nazirliyinin isə altı əməkdaşı virusa yoluxdu

img

Ermənistan Səhiyyə Nazirliyinin Xəstəliklərə Nəzarət və Profilaktika üzrə Milli Mərkəzinin 14 əməkdaşı koronavirusa yoluxub. Sputnik Azərbaycan xəbər verir ki, bu barədə Səhiyyə Nazirliyinin mətbuat katibi Alina Nikoqosyan "Facebook" səhifəsində yazıb. 

"Xəstəliklərə Nəzarət və Profilaktika üzrə Milli Mərkəzin şəhər filialının 14 əməkdaşının koronavirus xəstəliyinə yoluxduğu təsdiqlənib. Bütün profilaktik tədbirlər həyata keçirilib", - Nikoqosyan qeyd edib. Onun sözlərinə görə, bu yoluxma faktları 28 mart tarixli statistikaya daxil edilib.

Ermənistanda koronavirusun yayılmasına qarşı mübarizə üçün martın 16-dan aprelin 14-dək fövqəladə vəziyyət elan edilib. Son rəsmi məlumata görə, ölkədə "COVID-19" xəstəliyinə 424 yoluxma hadisəsi aşkar edilib, üç xəstə dünyasını dəyişib.

Martın 25-dən 31-dək koronavirusun yayılması səbəbi ilə ölkədə strateji əhəmiyyətli müəssisələr istisna olmaqla digər bütün müəssisə və təşkilatların fəaliyyəti dayandırılıb, vətəndaşların hərəkəti məhdudlaşdırılıb.

Gürcüstan Müdafiə Nazirliyinin altı əməkdaşında da koronavirus aşkar edilib. Müdafiə Nazirliyindən bildirilib ki, yoluxmuş şəxslər Milli Qvardiyanın Mülki ofisinin Təmizlik xidmətinin əməkdaşlarıdır. Onlar martın 21-dən karantində olublar. 

Qurum rəhbərliyi virusun yayılmasının qarşısını almaq üçün sərt tədbirlər görüb. Yoluxmuş işçilərin birbaşa və ya dolayı yolla təmasda olduğu bütün şəxslər qaydalara tam uyğun olaraq karantində saxlanılır və ya özləri təcrid olunublar. O cümlədən, yoluxmuş şəxslərlə əlaqədə olduğu ehtimal olunan səkkiz nəfər gələcək müayinə üçün Qori Hərbi Xəstəxanasına aparılıb.

Bu arada yoluxma mənbəyi aşkar edilib. Ehtimal ki, yoluxma mənbəyi əməkdaşlardan birinin qohumu olub. Onun Azərbaycana səfər etdiyi bildirilir.

Yoluxmuşların hamısı nazirliyin Hərbi Hospitalına çatdırılıb.

Rəsmi stopcov.ge saytının məlumatına görə, ölkədə koronavirusa 90 yoluxma faktı aşkar edilib, 18 xəstə sağalıb. Karantində 4717 nəfər saxlanılır.

Ümumdünya Səhiyyə Təşkilatı (ÜST) martın 11-də yeni tip koronavirusun (SARS-CoV-2) yayılmasını pandemiya elan edib. SARS-CoV-2 insanlarda "COVID-19" adlı xəstəliyə səbəb olur.

ÜST-ün son məlumatına görə, dünyada artıq 570 mindən çox yoluxma faktı qeydə alınıb, 26 mindən çox insan dünyasını dəyişib.

Son xəbərlər