ABŞ-da Nyu-York ştatının qubernatoru Endrü Kuomo Tramp administrasiyasını yeni növ koronavirusun (Covid-19) yayılmasına qarşı kifayət qədər dəstək vermədiyi üçün sərt tənqid edib.
Baki-xeber.com xarici mediaya istinadən xəbər verir ki, mətbuat konfransı keçirən Kuomo, xəstələrin sayının sürətlə artdığını və ABŞ-da epidemiyanın mərkəzinə çevrilən Nyu-Yorkda tibbi ləvazimatların tükənmək üzrə olduğuna dair xəbərdarlıq edib.
Koronavirusdan təsirlənən insanların sayının hər üç gündə iki dəfə artdığını və qarşısını almağın mümkün olmadığını bildirən Kuomo, Nyu-Yorkun köməyə ehtiyacının olduğunu deyib.
Kuomo Tramp administrasiyasını Nyu-Yorka kifayət qədər dəstək vermədiyinə görə sərt tənqid edib: "Fövqəladə Halların İdarəedilməsi Federal Agentliyi 400 süni nəfəs aparatı göndərir. 30 minə ehtiyacım olduğu halda 400 aparatla nə edə bilərəm? Bu vəziyyətdə öləcək 26 min insanı siz müəyyənləşdirin, çünkü yalnız 400 süni nəfəs aparatı göndərirsiniz”.
Epidemiyanın, əvvəlki 45 gün təxminlərinin əksinə olaraq, 2-3 həftə ərzində zirvəyə çatacağını bildirən Kuomo, əyalətdə 140 min çarpayıya ehtiyac olduğunu söyləyib.
ABŞ prezidenti Donald Trampın "əyalətlərə milyonlarla tibbi maska göndəriləcəyi" açıqlamasına toxunan Kuomo, "Mən sözlərə deyil, əmələ inanıram. Haradadır süni nəfəs aparatı, laboratoriya geyimləri, və əlcəklər?” deyə sual edib.
Koronavirusa yoluxanların sayının 25 mini keçdiyi Nyu-Yorkda indiyə kimi 210 nəfər ölüb.
Con Hopkins Universitetinin məlumatlarına görə, ABŞ-da xəstələrin sayı 46 min 805-ə çatıb, 593 nəfər ölüb.
