Elm və təhsil naziri Emin Əmrullayev bu günlərdə bildirib ki, yaxın üç il ərzində Azərbaycan məktəblərinə 150 min kompüter veriləcək, son nəticədə hər altı şagirdə bir kompüter düşəcək.
Qeyd edək ki, ölkə məktəblərinin müxtəlif proqramlar çərçivəsində kompüter avadanlığı ilə təchiz edilməsi prosesi artıq bir neçə ildir davam edir. Yeni nəsil texniki vasitələr hazırda tədris prosesinə fəal şəkildə daxil olur.
Maraqlıdır, nazirin qeyd etdiyi kimi, rəqəmsallaşma sahəsində bundan sonra məzmun baxımından görüləcək işlərə məktəb mühiti, uşaqların qavrayış səviyyəsi, öyrənmə bacarıqları və ən başlıcası, ixtisas müəllimlərinin bilgiləri adekvatdırmı? Rəqəmsallıqdan istifadənin digər müəllimlər arasındakı təbliği hansı səviyyədədir?
“Rayonlarda, ucqar ərazilərdə çox acınacaqlı haldır ki, informatikanı tədris edən müəllimlərin belə, İKT bacarıqları olduqca aşağıdır və demək olar ki, heç yoxdur”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, hazırda bütün dünyada İKT-nin təhsilə tətbiqinin gündəmə gəlməsi ilə pedaqoji heyətin, ümumtəhsil müəssisələrinin rəhbərlərinin əlavə təhsilə cəlbi aktual məsələyə çevrilib: “Məktəbdə lokal, həmçinin internetə qoşulan qlobal şəbəkənin qurulması, multimedia mərkəzlərinin yaradılması da önəmlidir. İKT sahəsində yüksək biliyi və bu sahədə layihədə nəzərdə tutulan metodiki köməklikləri etmək bacarığı olan, həmçinin İKT avadanlığının sazlığına cavabdeh işçilərin məktəblərdə olması vacibdir. Şagirdlərə dərsdənkənar vaxtlarda İKT-dən istifadə üçün şərait yaradılmalıdır".
Ekspert hesab edir ki, rayonlarda, ucqar ərazilərdə çox acınacaqlı haldır ki, informatikanı tədris edən müəllimlərin belə, İKT bacarıqları olduqca aşağıdır və demək olar heç yoxdur. Bu da dövrün tələbinə tam uyğun deyil: “Düzdür, nazirlik tərəfindən müəllimlərin İKT bacarıqlarının artırılması üçün təlimlər keçirilir, bu istiqamətdə ciddi layihələr təşkil olunur. Təcrübəli müəllimlər də az deyil, sadəcə, bu sahə inkişaf etdirilməlidir. Nəzərə almaq lazımdır ki, rəqəmsallaşma dövrün tələbidir. Bu sahədə savadlı kadrlara ehtiyac var”.
Günel CƏLİLOVA
