Tam (11 illik) orta təhsil səviyyəsi üzrə 5 mart 2023-cü il tarixində keçirilmiş buraxılış imtahanında ən yüksək nəticə açıqlanıb. Dövlət İmtahan Mərkəzinin yaydığı məlumatda qeyd edilir ki, imtahan iştirakçıları arasında ən yüksək nəticəni 296.7 bal toplayan Bakı şəhəri Fizika, riyaziyyat və informatika təmayüllü respublika liseyinin şagirdi göstərib.
Görünən odur ki, bu il buraxılış imtahanından yüksək bal toplayan olmayıb. Ekspertlər bunun səbəbini məktəblərdə tədris olunan dərsin keyfiyyətli olmaması ilə izah edir.
Maraqlıdır, buraxılış imtananında niyə 300 bal toplayan olmayıb?
“Məktəblərdə keyfiyyətli tədris təşkil edilmədiyinə görə bu il imtahanda iştirak edən 50 mindən çox şagirddən yalnız bir nəfər 297 bal toplaya bildi”
Təhsil eksperti Kamran Əsədov bildirdi ki, 5 martda keçirilən buraxılış imtahanında nəticələrin aşağı olmasının bir neçə səbəbi var: “Birincisi, 5 və 12 martda imtahan verən abituriyentlərimiz pandemiya dövründə təhsil alıblar. Etiraf edək ki, həmin vaxt onlar üçün dərslərin əlçatanlığı və keyfiyyəti o qədər də təmin olunmadı. Xüsusilə riyaziyyat fənninin onlayn keçirilməsi ilə bağlı problemlər var idi. Bu əsas səbəblərdən biridir. Eyni zamanda 2023-cü ilin martında imtahan verən şagirdlər 3 ildir ki, orta məktəbdə yaxşı təhsil ala bilmirlər. Elm və Təhsil Nazirliyi orta məktəblərdə keyfiyyətli tədrisi təşkil edə bilmədiyinə görə bu il imtahanda iştirak edən 50 mindən çox şagirddən yalnız bir nəfər 297 bal toplaya bildi. Ən vacib səbəblərdən biri kimi biz Elm və Təhsil Nazirliyinin öz vəzifə öhdəliklərini yerinə yetirməməsini qəbul etməliyik. İkincisi, imtahanların çətinliyidir. 5 martda keçirilən imtahanda ” Azərbaycan dili” və ” Riyaziyyat” fənnindən təqdim edilən bir test tapşırığı şagirdlərin kifayət qədər çox vaxt itirməsinə səbəb olub. Onlar vaxtlarının çoxunu cəmi 2 test tapşırığını yazmağa həsr ediblər. Bu da onlarda psixoloji gərginlik yaradıb. Buna görə də abituriyentlər digər suallara o qədər də vaxt tapa bilməyiblər. Bir digər səbəb şagirdlərin test – sual kitabçaları ilə işləmə vərdişlərinin zəif olmasıdır. Pandemiya dövründə dərs keçən şagirdlər cavabların cavab kartına köçürülməsi zamanı problem yaşayıblar”
Həmsöhbətimiz onu da əlavə etdi ki, abituriyentlərin zəif nəticə göstərməsinin səbəblərindən biri də onların zəif hazırlaşmalarıdır: “Onlar görürlər ki, aşağı ballarla ali təhsil müəssisələrinə qəbul olmaq mümkündür, buna görə də özlərinə çox əziyyət vermirlər. Həmçinin, qəbul qaydaları və dərsliklər çətindir. Uşaqlar yaxşı hazırlaşa bilmirlər. Pandemiya və imtahanın yaratdığı psixoloji çətinliklər də təsir edir. Həmçinin Elm və Təhsil Nazirliyinin tədrisi yaxşı təşkil etməməsi və imtahan suallarının çətinliyini əsas səbəb kimi qeyd edə bilərik”.
Günel CƏLİLOVA
