Bu gün paytaxtın A.Hüseynzadə adına 20 nömrəli məktəbində şagirdlər arasında kütləvi zəhərlənmə qeydə alınıb. Zəhərlənmə ibtidai sinif şagirdləri arasında olub. 20 nömrəli məktəb-liseyin bufetindən toyuq əti alan uşaqlarda qarın ağrısı əlamətləri müşahidə olunub.
Məlumata görə, məktəbdə iaşə xidmətini təşkil edən “Tais ikf” MMC-dir.
Baş vermis hadisə ilə bağlı öncə 20 saylı məktəblə əlaqə saxladıq.
20 nömrəli məktəb: “Uşaqların vəziyyəti normaldır və 5 uşaq zəhərlənib”
20 nömrəli məktəbdən “Bakı-Xəbər”ə bildirildi ki, uşaqların vəziyyəti normaldır və 5 uşaq zəhərlənib: “10 –dan çox uşağın zəhərlənməsi ilə bağlı yayılan xəbərlər həqiqətə uyğun deyil. Hazırda 5 uşaq zəhərlənib. Şagirdlər Kliniki Tibbi Mərkəzin Toksikologiya şöbəsinə aparılıblar. Onların yanındayıq, maraqlanırıq”.
Məhsəti Əliyeva: “Məktəb bufetlərində satılan qidaların keyfiyyəti sual altındadır”
Qida mütəxəssisi Məhsəti Əliyeva bizimlə söhbətində qeyd etdi ki, məktəb bufetlərində satılan qidaların keyfiyyəti sual altındadır. Buna da məktəblərdə baş verən zəhərlənmə hallarını misal göstərmək olar: “Çünki bir çox hallarda məktəb bufetlərində əvvəllər sadəcə günlük yeni bişirilən bulkalar olurdusa və yaxud digər məhsullar olurdusa bu gün məktəb bufetlərində rəf ömrü uzun olan və yaxud sağlamlıq üçün həddindən artıq zərərli olan suxariklər, çipsilər və yaxud da un məmulatları var ki, bunlar 6 ay bəzən də 1-2 il rəf ömrü olan qidalardır. Və bir çox hallarda da 1-ci smen də təhsil alan şagirdlər var ki, bunlar səhər yeməyi etmədən məktəbə gedirlər, belə olan halda da artıq 11-12 radələrində əl çatan nə varsa həmin qidalar ilə qidalanır. 20 saylı məktəbin bufetinə qidaları verən şirkət məsuliyyətə cəlb olunmalıdır. Çoxlu sayda şagirdin zəhərlənməsi faciədir. Hər uşağın orqanizmi bir cürdür. Allah eləməsin zəhərlənmə o uşaqlardan birinə ağır fəsad versə nə cavab verəcəklər?”.
Nizami Hüseynov: “Bufetlərdə vaxtı ötmüş məhsullar satılır, nəticədə …”
Təhsil eksperti Nizami Hüseynov bildirdi ki, məktəb bufetlərində qida təhlükəsizliyinə əməl edilməsində problemlər var: “Məsələn, kimsə evdən qida gətirə bilər. Bu da zəhərlənməyə səbəb olur. Bufetlərdə vaxtı ötmüş məhsullar satılır. Yağda qızardılmış "peraşki" kimi məhsulların satışı yolverilməzdir. Həmçinin, burger kimi qidaların da satışı qadağandır. Ancaq bu gün fərqli mənzərə müşahidə olunur. Şirkətlər əməkdaşlıq etdiyi məktəblərin bufetinə müxtəlif növ burger və ya un məmulatları gətirir. Şagirdlər də onların ziyanlı olmasından xəbərsiz olduğu üçün alırlar. Nəticədə isə bu cür xoşagəlməz hallar yaşanır”.
Günel CƏLİLOVA
