Martın 31-dən bütün gözlər Türkiyədə keçirilən bələdiyyə seçkilərinə yönəlib. Sosial şəbəkələrdə aparılan müzakirələrdən görünür ki, Azərbaycan vətəndaşları qardaş ölkədəki seçkini böyük maraqla izləyirlər.
Seçki günü bu yöndə aparılan polemikalar bunu deməyə əsas verir ki, bu maraq hətta bir çox vətəndaşımızı yatmağa belə qoymayıb. Budəfəki seçkilərdə diqqətçəkən vacib məqamlardan biri hakim partiyanın xüsusilə də Türkiyənin böyük şəhərlərindəki məğlubiyyəti oldu. Gecədən paytaxt Ankarada CHP-nin qalib gəldiyi konkret məlum idi. Həmçinin, İzmirdə müxalifətin qalib gəldiyi mübahisə doğurmurdu. Ancaq Türkiyənin ən böyük şəhəri olan İstanbul uğrundakı mübarizə bir qədər gərgin keçdi. İlk olaraq hakim partiyanın namizədi Binəli Yıldırım prosesləri qabaqlayaraq özünü qalib elan etdi. O bu açıqlamanı verəndə hələ qutuların heç də hamısı açılmamışdı. Proseslərin sonunda isə hakim partiya İstanbulda qalib gəldiyi ilə bağlı verdiyi bəyanatı geri oxumaq məcburiyyətində qalıb: “Hazırkı nəticələrə görə, Əkrəm İmamoğlu məndən 25 min səs qabaqdadır".
Bu isə o deməkdir ki, AKP Ankara ilə yanaşı, İstanbulda da uduza bilər.
Seçkinin ümumi nəticələrini və xüsusilə də hakim partiyanın böyük şəhərlərdəki məğlubiyyətini necə dəyərləndirmək olar?
Politoloq Qabil Hüseynli qəzetimizə açıqlamasında bildirdi ki, bununla AKP-nin hakimiyyətinə sonun ilk işartıları nəzərə çarpmağa başladı: “Ümumən seçkilərdə CHP-nin irəliləməsi və xüsusilə də böyük şəhərlərdə qələbə qazanması hakim partiyanın son illər ərzində yürütdüyü yanlış siyasətə bağlıdır. Bu gözlənilən idi. Çünki ölkədə inflyasiya tüğyan edir. İqtisadi artım yerində sayır. Əksər dövlətlər və xüsusilə də qonşu ölkələrlə münasibətlərdə gərginlik var. Ən maraqlısı isə budur ki, Türkiyə üzvü olduğu NATO ilə də yola getmir. ABŞ kimi ənənəvi müttəfiqinə arxa çevirir. Ola bilər ki, siyasətçi üçün bu, səciyyəvi olsun, amma bunun sadə xalqa da təsiri olur. Son bir neçə ildə ətin kilosu 10 dəfə artıb. Bunun müqabilində isə əməkhaqqı və müavinətlər cüzi şəkildə qalxıb. Mənə elə gəlir ki, baş verənlər hələ başlanğıcdır və iflasın yaxınlaşdığını göstərir. Əsl məsələ bundan sonra başlayır. Türkiyə siyasətində bir qayda var ki, İstanbul, Ankaranı udan partiya hakimiyyətdə olmasa, hətta parlamentdə əksəriyyət təşkil etməsə belə, ölkədəki proseslərə o yön verir. Bundan sonra da belə olacaq. Böyük şəhərlərdəki məğlubiyyəti hakim partiya həm də HDP-nin CHP-yə verdiyi dəstəklə izah edir. Mən buna normal baxıram. Çünki siyasətdə belə ittifaqların olması təbiidir. Kürdlərin kompakt yaşadığı rayon və şəhərlərin hamısında HDP qalib gəlib. Böyük şəhərdə yaşayan kürd əsilli vətəndaşlar isə CHP-yə səs verib. Əgər AKP bacarırdısa, HDP-nin elektoratından özü istifadə edərdi”.
Məhəmmədəli QƏRİBLİ
