Mübariz Əhmədoğlu: “Azərbaycanla olan münasibətlərə görə ABŞ Ermənistana 100 milyon dollar ayırmaz”
ABŞ Konqresindəki erməni lobbisi Azərbaycan əleyhinə növbəti dəfə fəallaşıb. Məsələ ondadır ki, Nümayəndələr Palatasının 35 üzvü Konqresin Erməni məsələsi komitəsinin Ermənistana və Dağlıq Qarabağdakı separatçılara 100 milyon dollar dəyərində maddi yardım göstərmək çağırışını dəstəkləyib. Bu barədə ABŞ-da fəaliyyət göstərən Amerika Erməni milli komitəsi məlumat yayıb.
Erməni lobbisi, hər il olduğu kimi, bu dəfə də Dağlıq Qarabağdakı cinayətkar rejimə maliyyə yardımını müxtəlif adlar altında göstərməyə çalışır. Guya həmin vəsaitin 6 milyon dolları Dağlıq Qarabağ ərazisinin minalardan təmizlənməsinə və əlillərin reabilitasiyasına, 4 milyon dollar ATƏT-in monitorinqi altında yanğın aşkarlama sistemlərinin tətbiqi daxil olmaqla, sülhə hazırlaşmağa sərf olunacaq. Ermənistana ayrılan 60 milyon dolların 10 milyonu hərbi yardım, 20 milyon dolları isə Yaxın Şərqdən olan qaçqınların təminatı üçün nəzərdə tutulub. Halbuki, Ermənistan Yaxın Şərqdən olan qaçqınları bu ölkədə yerləşdirmir. Əksinə, Suriyadan olan erməni əsilli qaçqınları qanunsuz olaraq Dağlıq Qarabağda yerləşdirir. Budur Ermənistanın yeritdiyi siyasət. Onu da qeyd edək ki, Konqresin Erməni məsələsi komitəsinə Frenk Pellone rəhbərlik edir. Müraciəti imzalayanlar həm də ABŞ-dan Azərbaycana hərbi yardımları dayandırmağı və “907-ci Düzəliş”i icra etməyi təklif edib. Xatırladaq ki, 1992-ci ildə erməni lobbisinin təsiri altında qəbul edilmiş “Azadlığa Müdafiə Aktına 907-ci düzəliş” adlı qətnamə Azərbaycana birbaşa dövlət yardımını qadağan edir.
Ermənistan və separatçı qurum üçün nəzərdə tutulan 100 milyon dollar kifayət qədər böyük vəsaitdir. Ona görə də ABŞ Nümayəndələr Palatasında belə bir çağırışın səslənməsi erməni lobbisinin təxribatçı fəaliyyətinin nəticəsidir. Ən başlıcası isə, bu, ABŞ-ın Azərbaycanla olan münasibətlərinə, bu ölkənin maraqlarına ziddir. O üzdən, ABŞ öz dövlət maraqlarından çıxış edərək buna yol verməməlidir.
Bu baxımdan maraqlıdır, bəs ekspertlər yaranan vəziyyəti necə şərh edirlər? Ermənistana və separatçılara sözügedən yardımın edilməsinə imkan yaradılacaqmı? Bunun qarşısını necə almaq olar?
Sözügedən məsələni “Bakı-Xəbər”ə şərh edən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, ermənipərəst konqresmenlərin səylərinə rəğmən, Birləşmiş Ştatların buna gedəcəyi real görünmür: “Buna iki istiqamətdən yanaşmaq lazımdır. Birincisi, ABŞ-ın özünün Ermənistanın apardığı siyasətdən xoşu gəlmir. Birləşmiş Ştatlar hesab edir ki, Paşinyanı onlar hakimiyyətə gətirib. Ancaq Paşinyan isə Rusiyaya yönəlik gedişlər edir və Putin nə deyirsə onu edir. Bir sıra ABŞ siyasətçilərinin fikrincə, hətta Rusiyaya müqavimət göstərməkdə Serj Sarkisyan Paşinyandan qat-qat güclü şəxsiyyət idi. Birləşmiş Ştatlar hazırda Ermənistana heç bir yardım etmir. O baxımdan inanmıram ki, Konqresin Erməni məsələsi komitəsinin qaldırdığı təşəbbüs reallaşsın. Digər tərəfdən, burada Azərbaycanın maraqlarının nəzərə alınması məsələsi də var. Çünki hazırda ABŞ Cənubi Qafqaz siyasətini yenidən qurmaq istəyir. Cənubi Qafqaz siyasətində də Azərbaycanın yeri ayrıdır. Azərbaycansız bunu həyata keçirmək mümkün deyil. Ona görə də Azərbaycanla olan münasibətlərə görə ABŞ Ermənistana 100 milyon dollar ayırmaz. Məbləğ həm də siyasi dəstəyin göstəricisidir. O üzdən, inanmıram ki, ABŞ Ermənistana belə böyük həcmdə yardım etsin”.
Vidadi ORDAHALLI
