Xaqani Cəfərli: “Tramp administrasiyasının “İbrahim Sazişləri” ilə bağlı açıqlamaları daha çox təbliğat xarakteri daşıyır”
RİA “Novosti”nin yaydığı məlumata görə, ABŞ prezidentinin Yaxın Şərq üzrə xüsusi nümayəndəsi Stiv Uitkoff bildirib ki, yaxın bir neçə ay ərzində 4-6 ölkə, o cümlədən Suriya, Livan, Ermənistan və Azərbaycan “İbrahim Sazişlərinə” qoşula bilər.
"Mənim proqnozum belədir ki,.. tezliklə biz Livanda və hətta Suriyada normallaşma potensialını görəcəyik... Bu, Liviya ilə də baş verə bilər... Mən “İbrahim razılaşmalarına” qoşulan ölkələr haqqında danışıram, bu, Azərbaycan və Ermənistanla baş verə bilər", - deyə o, Breitbart-a müsahibəsində deyib.
Stiv Uitkoffın sözlərinə görə, Ermənistan və Azərbaycan münaqişəni həll etməyə yaxındırlar: “Mən tam əminəm ki, yaxın bir neçə ay ərzində dörd və ya beş, bəlkə də altı ölkə “İbrahim Sazişlərinə” qoşulacaq”.
Məlumata görə, 2020-ci ildə ABŞ İsrail və ərəb ölkələri arasında münasibətlərin normallaşdırılmasına yönəlmiş prosesə başlayıb. Nəticədə “İbrahim sülh sazişləri” adlanan bir sıra sənədlər imzalanıb və sazişlərə BƏƏ, Bəhreyn və Mərakeş də qoşulub.
Liviya və Suriyanı başa düşdük, amma Azərbaycanla Ermənistan arasında sülh sazişi imzalamamış necə ola bilər ki, Azərbaycan gedib Ermənistanla bir bloka, ittifaqa daxil olsun?
Bu dövlətlər üçün bu vacibdirsə, birinci Ermənistanı vadar etsinlər ki, sülh sazişini imzalasın. Yəni nə qədər düzgün olar ki, Azərbaycan sülh sazişi imzalamadan gedib Ermənistanla "İbrahim razılaşmaları"na qoşulsun?
“Azərbaycanla Ermənistan arasında sülh sazişinin olmaması...”
Politoloq Xaqani Cəfərli “Bakı-Xəbər”ə bildirdi ki, bu açıqlama təbliğat xarakteri daşıyır: “ABŞ prezidentinin Yaxın Şərq üzrə xüsusi nümayəndəsi Stiv Uitkoffun Liviya, Suriya, Ermənistan və Azərbaycanın da “İbrahim Sazişləri”nə qoşula biləcəyi ilə bağlı açıqlaması daha çox təbliğata xidmət edir. Çünki “İbrahim Sazişləri” İsraillə münasibətləri normallaşdırmağı hədəfləyir. Azərbaycan və Ermənistanın İsraillə diplomatik əlaqələri olduğu üçün onların “İbrahim Sazişləri”nə qoşulması ciddi bir yeniliyə səbəb olmayacaq. İsrail dövləti Suriyanın indiki hakimiyyətinin legitimliyini tanımadığı üçün Suriyanın “İbrahim Sazişləri”nə qoşulmasında maraqlı deyil. Bu mənada Tramp administrasiyasının “İbrahim Sazişləri” ilə bağlı açıqlamaları daha çox təbliğat xarakteri daşıyır.
Azərbaycanla Ermənistan arasında sülh sazişinin olmamasının bu sazişləri imzalamağa heç bir aidiyyəti yoxdur. Çünki ittifaq və ya alyans deyil. İsraillə “İbrahim Sazişləri” imzalayan dövlətlərin bir-biri ilə müttəfiq, dost olması zərurəti də yoxdur. Ermənistanla Azərbaycan arasında sülh sazişinin imzalanmasına yardım etmək hələlik Tramp administrasiyası üçün öncüllük təşkil etmir”.
X.Cəfərlinin sözlərinə görə, Tramp administrasiyasının yanaşması belədir ki, Avropadakı münaqişələrin həllində Avropa öncüllük etməli, Amerika bu məsələlərdən mümkün qədər uzaq durmalıdır. “Ancaq Rusiya ilə Ukrayna arasında sülh məsələsinə aydınlıq gəlsə, Tramp Azərbaycanla Ermənistan arasında sülh müqaviləsinin imzalnması üçün təşəbbüs göstərə bilər”-deyə X.Cəfərli bildirdi.
İradə SARIYEVA
