Rəqəmsal imtahanlara keçid üzrə işlər görülür. Dövlət İmtahan Mərkəzinin (DİM) İdarə Heyətinin sədri Məleykə Abbaszadənin sözlərinə görə, bu barədə Təhsil Nazirliyi ilə danışıqlar aparılıb: "Artıq yeni qiymətləndirmə prosesinə keçməliyik. Bu ildən etibarən gələcəkdə imtahanların bir qisminin rəqəmsal şəkildə həyata keçirilməsi üçün addımlar atılacaq".
Maraqlıdır, imtahanların rəqəmsal formada keçirilməsinin nə kimi müsbət və mənfi tərəfləri ola bilər?
Elçin Əfəndi: "İmtahanların rəqəmsal formaya keçidinin müsbət tərəfi odur ki, namizədlər imtahan verdikdən dərhal sonra imtahan nəticələri barəsində məlumat ala biləcəklər"
Təhsil eksperti Elçin Əfəndi "Bakı-Xəbər"ə şərhində bildirdi ki, imtahanların rəqəmsal formaya keçirilməsi təqdirəlayiqdir: "İmtahanların rəqəmsal formaya keçidinin müsbət məqamları ondan ibarətdir ki, namizədlər imtahan verdikdən dərhal sonra imtahan nəticələri barəsində məlumat ala biləcəklər. Açıq yazılı suallar saxlanılsa da, onların yoxlanılması 3-4 həftə deyil, fikrimcə, 5-10 gün ərzində həyata keçirilə bilər. Bundan əlavə, elektron imtahanların müsbət tərəflərindən biri namizədin kompüter arxasında əyləşərək sualları cavablandırması olacaq ki, bu, imtahan verənlər üçün daha əlverişlidir. Çünki əlavə kağız daşıyıcılarda kağızın zədələnməsi, müəyyən səhvlərə yol verilməsi kimi problemlər var. İmtahanlar kompüterlə olanda bu kimi hallar olmayacaq. Bundan başqa, imtahanları rəqəmsallşadıra bilsək, bir yox, bir neçə vaxtda imtahan keçirmək olar. Məsələn, buraxılış imtahanı yalnız bir dəfə keçirilir. Bunu artıq bir neçə cəhd formasında etmək olar".
Ramin Nurəliyev: "İnfrastrukturu hazırlanmadan, hər hansı müsbət və mənfi tərəfləri düşünülmədən bunu birbaşa tətbiq etmək olmaz"
Təhsil eksperti Ramin Nurəliyev hesab edir ki, hazırda rəqəmsal qiymətləndirmənin həyata keçirilməsi üçün tezdir: "Dövlət İmtahan Mərkəzi rəqəmsal qiymətləndirmə sisteminə keçməyi düşünürsə, qiymətləndirmə prosesində müəyyən addımlar atmağı fikirləşirsə, bunun infrastrukturunu hazırlamalıdır və ona uyğun addım atmalıdır. İnfrastrukturu hazırlanmadan, hər hansı müsbət və mənfi tərəfləri düşünülmədən bunu birbaşa tətbiq etmək olmaz. Artıq dünya rəqəmsal texnologiyaya, süni intellektə doğru addımlayır, bu istiqamətdə müəyyən nailiyyətlər əldə olunur. Prosesin bəlkə də daha tez həll olunmasına müsbət təsir göstərəcək, amma biz buna hazırıqmı, bizim abituriyentlərimiz, müəlimlərimiz buna hazırdırmı, təhsil sistemimiz buna hazırdırmı deyə düşünmək lazımdır. Əgər olarsa, çox gözəl olar, dünya ilə ayaqlaşmış olarıq. Amma mən düşünürəm ki, "kamil bir palançı olsa da insan, yaxşıdır yarımçıq papaqçılıqdan". Yəni biz bir şeyi yaxşı ediriksə edək, etmiriksə etməyək".
Günel CƏLİLOVA
