Azərbaycandan Ermənistana könüllü köç edən Qarabağın erməni əhalisi burada gözlədiyi münasibətlə qaşılaşmır. Əksinə, Qarabağ erməniləri ilə Ermənistan erməniləri arasında getdikcə gərginliyin artması müşahidə olunur. Bundan başqa, separatçı rejimə rəhbərlik edənlərin də Ermənistanda aqibətinin yaxşı olmayacağı gözlənilir.
Ermənistanın “Joğovurd” nəşri yazır ki, rəsmi İrəvan Qarabağda baş verən son hadisələrə görə rejim rəhbərliyini günahlandırmağa can atır: “Qarabağ rəsmiləri” Milli Təhlükəsizlik Xidmətinə çağırılır. Onlar faktiki olaraq müxtəlif cinayət işləri, eləcə də “Qarabağ”ın ləğvi prosesi üzrə Milli Təhlükəsizlik Xidmətində dindirilirlər”. Nəşrə görə, yaxın vaxtlarda növbə ləğv edilmiş qondarma qurumun “sonuncu rəhbəri” Samvel Şahramanyana çatacaq, ona da ibtidai istintaq orqanının ciddi sualları var: “Qeyd edək ki, artıq İstintaq Komitəsi tərəfindən araşdırılan bir cinayət işi var. “Qarabağ təhlükəsizlik şurasının keçmiş katibi” Samvel Babayanın verdiyi açıqlamalar və hesabatlar əsasında cinayət işi başlanıb. Bir sözlə, siyasi hakimiyyət zəmin hazırlayır ki, “Qarabağın 3 rəhbəri” Bakı həbsxanasından Ermənistana gəlsə, dərhal Ermənistanda həbs olunsun”. Burada onu da xatırladaq ki, İrəvanda Qarabağ erməniləri separatçı rejimin binasına hücum ediblər. Binaya daxil olan etirazçılar özünü hələ də separatçı rejimin “rəhbəri” sayan Samvel Şahramanyanla görüşüblər. Şahramanyan Qarabağ ermənilərini sakitləşdirməyə çalışsa da, etirazlar səngiməyib. Açıqlamaya görə, Qarabağ erməniləri onları maraqlandıran suallara cavab tələb ediblər. Şahramanyan üzə çıxıb açıqlama versə də, onun dedikləri etirazçıları sakitləşdirməyib. Şahramanyan Qarabağ ermənilərinə bildirib ki, indiki çətin vəziyyət haqqında çox şey deyə bilər, lakin bu, Ermənistan üçün təhlükəlidir: “Mən sizə çox şey deyə bilərəm, lakin bu, Ermənistanın gələcək taleyi üçün ciddi təhlükədir. Biz hamımız son dərəcə çətin vəziyyətdəyik. Bizim burada düşmənimiz yoxdur. Bizim bir düşmənimiz var və bunu hamı bilir. Mən bütün qərarlarıma görə məsuliyyət daşıyıram”. Bu açıqlama ilə əslində Şahramanyan separatçı rejimin ləğvinə görə Paşinyan iqtidarının məsuliyyət daşıdığını diqqət mərkəzinə çatdırıb. Amma bu fonda Nikol Paşinyan iqtidarının da cavabı gecikməyib. Ermənistan parlamentinin “Vətəndaş Müqaviləsi” fraksiyasının deputatı Vağarşak Hakopyan qeyd edib: “Qarabağ sakininin cavab tələb etmək hüququ var: son 30 ildə Ermənistandan axın edən milyardlar haradadır? Qarabağ sakininin o sənəddə Ermənistan Silahlı Qüvvələrinin niyə yazılmasına dair cavab tələb etmək hüququ var. Qarabağın “rəhbərlərindən” birinin İrəvanın mərkəzində 50-dən çox daşınmaz əmlaka sahib olması barədə məlumatlar var.O, bu qədər mülkü haradan alıb? Qarabağ sakinləri nəhayət ki, Qarabağı kimin saxladığını və onu kimin təhvil verdiyini başa düşdü. “Qarabağ rəsmiləri” bunun niyə baş verdiyini və o milyardları haradan əldə etdiklərini izah etməlidirlər”. Maraqlıdır, aksiya iştirakçıları da qeyd ediblər ki, separatçı rejim illərdir onları qarət edib və bu pullara bahalı evlər, maşınlar alırlar. Hətta bəziləri təklif ediblər ki, bu evlər onların əlindən alınmalı və Qarabağ ermənilərinə verilməlidir.
Bunlar fonunda Qarabağ ermənilərinin İrəvandakı aksiyasının əsas sifarişçisinin Nikol Paşinyan olduğu bildirilir. Maraqlıdır ki, etirazçılar saatlarla qondarma rejimin qarşısında şüar səsləndirsələr də, Nikol Paşinyana qarşı heç bir tələb və tənqidi fikir səsləndirilməyib. Bütün hədəflər separatçı rejimin “rəhbərliyi”nə qarşı olub. “Joğovurd” nəşri yazır ki, bir qrup Qarabağ sakininin “Qarabağın Ermənistandakı nümayəndəliyi” qarşısında saatlarla aksiya keçirməsi zamanı müşahidə edilən hallar da bunu təsdiq edir. Nəşr qeyd edib ki, onlar ləğv edilmiş qondarma qurumun “sonuncu rəhbəri” Samvel Şahramanyana bir sıra tələblər təqdim ediblər: “Bir sıra qaranlıq və gizli detallar gözümüzdən qaçsaydı, hər şey bu qədər aydın və başadüşülən olardı. Əvvəla diqqətəlayiqdir ki, aksiyanı həyata keçirən Qarabağ sakinlərinin Qarabağın təhvil verilməsinin əsas günahkarı Nikol Paşinyan və onun hökumətindən heç bir tələbi yox idi. Əksinə, hər ikinci nitqdə təkrarlayırdılar ki, Ermənistan hakimiyyətindən razıdırlar, onlara pul verirlər, yaşayış yeri ilə təmin edirlər. Halbuki, ac və evsiz Qarabağ sakinlərini tez-tez görürük”. Paşinyana yaxın erməni ictimai xadim Mikayel Hayrapetyan isə bildirir: “Ermənistanı amputasiya ediblər, bir qanadını kəsiblər, qanaxma davam edir. “Qarabağ məmurları” səfil kimi pul istəyirlər. O pul Qarabağ sakinlərinə verilsin, 30 ildir onu yeyən əclaflara yox. Şahramanyan kimilərini buradan qovmaq lazımdır. Onlar “mühacirətdə olan hökumət” deyil, Rusiya agentləridir”. Onların Ermənistanın Milli Təhlükəsizlik Xidmətinə dəvət olunaraq dindirilməsi isə bu şəxslərin sıradan çıxarılacağını deməyə əsas verir. Sentyabrın sonlarından bu yana bir sıra “eks-məmur” dindirilir, barələrində cinayət işi açılır. Yəqin ki, yaxın vaxtlarda növbə Samvel Şahramanyana da çatacaq. Artıq Samvel Babayanın verdiyi açıqlamalar fonunda cinayət işinə start verilib. Ermənistan Cinayət Məcəlləsinin 550-ci maddəsi (hərbi vəziyyət və müharibə dövründə komandirin və ya vəzifəli şəxsin öz səlahiyyətlərini yerinə yetirərkən vicdansız və səhlənkar münasibət sərgiləməsi, öz vəzifələrini layiqincə yerinə yetirməməsi) ilə açılan cinayət işinə görə bir sıra məmurun dəmir barmaqlıqlar arxasına keçəcəyi gözlənilir. Samvel Babayan isə Paşinyanın adamı sayılır. Bu fonda Samvel Babayanın hakim partiyanın deputatları ilə İrəvan küçələrində görünməsi sosial şəbəkələrin erməni seqmentində müzakirə yaradıb. Babayanın hakim partiyadan olan deputatlar Andranik Köçəryan və Qurgen Arsenyanla həddən artıq səmimi olması, deyib-gülməsi son günlər baş verən proseslərin arxasında Nikol Paşinyanın dayandığı ehtimalını daha da gücləndirib.
Samirə SƏFƏROVA
