Rusiya və Ermənistan arasında artan gərginlik fonunda Kreml artıq İrəvanı açıq mətnlə hədələməyə başlayıb. Rusiyanın Ermənistandakı səfiri Sergey Kopırkinin İrəvan Rus Evində təşkil edilən rus soydaşların 15-ci konfransında çıxış edərkən səsləndirdiyi fikirlər də bu qənaəti gücləndirir.
Səfirin sözlərinə əsasən, bu konfrans fövqəladə şəraitdə, müasir Ermənistan tarixinin ən qaranlıq səhifələrindən birinin fonunda keçirilir: “Biz Qarabağın 100 min sakininin öz vətənlərini necə tərk etməyə “məcbur edildiyinin” şahidi olduq. Bu “faciənin” ilk günlərindən Rusiya məcburi köçkünlərə həm özəl təşkilatlar, həm də dövlət səviyyəsində yardımlar edir. Rusiya bunu özünün faciəsi kimi qəbul edir”.Qeyd edək ki, Azərbaycan Ordusu 19-20 sentyabrda apardığı lokal antiterror tədbirləri zamanı heç bir mülki obyektə zərbə endirməyib, bir mülki ev belə zərər görməyib, yalnız legitim hədəflər məhv edilib. Antiterror tədbirləri başa çatandan sonra isə erməni sakinlərə Azərbaycana inteqrasiya təklif edilib və öz evlərində qalmaları üçün bütün şərait yaradılıb. Bu həqiqəti rus səfir Kopırkinin bilməməsi mümkün deyil, çünki hər şey Qarabağdakı rus sülhməramlıların gözü önündə baş verib. Belə halda rus səfirin Azərbaycana qarşı böhtan kampaniyasına qoşulması təəccüblüdür. Amma bu kampaniya fonunda səfir daha çox Ermənistanı hədələyib: “Bütün bu işlər, “faciəyə” münasibət, zənnimcə inandırıcı sübutdur ki, hər şeyə baxmayaraq, yumşaq desək, müasir Ermənistanda Rusiyaya, onun məqsədlərinə, roluna münasibətdə, qeyri-müəyyən bəyanatlar səslənməsinə, təbliğat aparılmasına, açığını desəm, çox vaxt böhtan kampaniyası həyata keçirilməsinə baxmayaraq, onu göstərir ki, Ermənistan Respublikası Rusiya Federasiyası və rus xalqı üçün sadəcə dost deyil, həm də qardaş dövlət olaraq qalır. Yenə deyirəm, erməni xalqının yaşadığı hadisələr Rusiya və ruslar üçün yad deyil”. Rusiya səfiri əmin olduğunu bildirib ki, siyasi situasiyanın heç bir dəyişimi iki ölkə xalqları arasında unikal tarixi dostluq və qarşılıqlı anlaşma bağlarını silə bilməz. Eyni zamanda, o vurğulayıb ki, Rusiya öz növbəsində regiona sülh və firavanlıq gətirmək üçün hər hansı problem və ya müxalifətə baxmayaraq, fəaliyyətini davam etdirmək niyyətindədir. Rusiya Federasiyasının Ermənistanla münasibətlərinə və Cənubi Qafqazda mövcudluğuna verdiyi önəmin daha bir bariz nümunəsi kimi Kopırkin Zəngəzur vilayətinin Qafan şəhərində Rusiyanın Baş Konsulluğunu açmaq niyyətini göstərib: “Üç diplomatdan ibarət qabaqcıl komandamız hazırda orada işləyir və bu açılışa hazırlaşır”. Bütövlükdə mövcud vəziyyətə toxunan Kopırkin qeyd edib ki, Cənubi Qafqazda gedən proseslər bilavasitə qlobal hadisələrlə bağlıdır: “Yaşadığımız faciələr, sarsıntılar böyük ölçüdə ABŞ başda olmaqla kollektiv Qərbin çoxqütblü dünya nizamının formalaşması obyektiv prosesini ləngitmək və dünyada hegemonluğunu saxlamaq cəhdlərinin nəticəsidir. Bu gün kollektiv Qərb Rusiyanı aparıcı dünya dövlətləri mövqeyindən çıxarmaq, iqtisadiyyatı sarsıtmaq, daxili siyasi vəziyyətə zərbə vurmaq üçün ona qarşı, o cümlədən hərbi yolla hibrid müharibə aparır. Bu məqsədlərə nail olmaq üçün düşmənlərimiz istənilən vasitəyə əl atmağa, qardaş ölkələrimizi və xalqlarımızı, o cümlədən Ermənistanı bu qarşıdurmaya çəkmək cəhdlərinə əl atmağa hazırdır. Eyni zamanda, bu çirkin oyunun erməni xalqı və bir dövlət kimi Ermənistan üçün hansı nəticələrinin olacağı Qərb quruluşunu çox da maraqlandırmır”. Beləliklə, Sergey Kopırkin açıq mətnlə bildirir ki, Rusiya ilə qarşıdurma siyasəti Ermənistana baha başa gələcək və Qərb də ona kömək edə bilməyəcək.
Qeyd edilən xüsusda Ermənistanın “Lragir” nəşri yazır: “Rus səfirin cəhdlərinə baxmayaraq, onun yanaşmasına əsasən, nankor erməni xalqı nəcib bir ziyalını, yenilməz döyüşçünü və diplomatı qətlə yetirdi. Hələlik virtual siyasi qətldən danışırıq. Baxmayaraq ki, Sergey Pavloviçin belə çıxışlar etməsini istəyən şəxs başa düşməlidir ki, hətta erməni xalqının dibsiz səbri də sonsuz deyil. Allah eləməsin ki, hadisələrin bu cür idarəolunmaz gedişatı bir-iki günə Rusiya Federasiyasının dağılmış dövlət sistemini, qardaş rus xalqı üçün heç bir perspektivi olmayan bir şəkildə devirəcək. Onun minlərlə övladı artıq bizim mərhəmətli qoynumuzda məskunlaşıb”. Ermənistan parlamentinin müdafiə və təhlükəsizlik komissiyasının sədri Andranik Köçəryan isə qeyd edir ki, Moskvanın artan qəzəbi təsadüfi deyil: “Rusiya Paşinyanın Avropa Parlamentində belə uğurlu çıxış etməsini qısqanır. Görünür ki, bu çıxış Rusiyaya qarşı yönəlib, ancaq buna baxmayaraq, Ermənistan hakimiyyəti dövlət maraqlarına xidmət edir və biz təhlükəsizlik sistemimizlə bağlı tərəfdaşlarımızı, real dostluq əlaqələrini qeydə almaq istəyirik. Əgər bu kifayət etmirsə və ya reallıqdan kənara çıxarsa, biz onu qeydə alırıq və nəinki qeydə almağa, nəticələrini qəbul etməyə və həll yollarını təklif etməyə çalışırıq, çünki təhlükəsizliklə zarafat etmək olmaz”. Köçəryan deyib ki, Ermənistan çox çətin vəziyyətdədir və təhlükəsizlik sisteminin idarə olunması problemi çərçivəsində bütün tərəfdaşlıqları düzgün idarə etmək lazımdır. Ermənistan Silahlı Qüvvələri Baş Qərargah rəisinin keçmiş birinci müavini, keçmiş müdafiə naziri Arşak Karapetyan isə qeyd edir ki, milli təhlükəsizlik məsələlərində Ermənistanın indiki hakimiyyəti səriştəli deyil: “Başa düşmürlər ki, milli təhlükəsizlik hərtərəfli anlayışdır və hərbi, iqtisadi, enerji təhlükəsizliyi və sairdən ibarətdir. Milli təhlükəsizliyin vektorunu dəyişmək üçün isə bir komponenti deyil, bütövlükdə olanı dəyişmək lazımdır. Bizdə vektorun dəyişməsi ciddi iqtisadi və enerji problemlərinə gətirib çıxaracaq. Bu, istər-istəməz bizim məhsullarımızın Rusiya Federasiyasına ixracına, ümumilikdə Rusiya Federasiyasından qazın tədarükünə və onun maya dəyərinə təsir göstərəcək. Nəticələri isə dövlətimiz üçün fəlakətli ola bilər”.
Tahir TAĞIYEV
