Fransanın Müdafiə naziri Sebastyan Lekornyu “Le Parisien” qəzetinə deyib ki, oktyabrın 23-də İrəvan və Paris hərbi təchizatla bağlı saziş imzalayacaqlar. Lekornyu ermənistanlı həmkarı Suren Papikyanı qəbul edəcəyini bildirib:
“Biz sabah (oktyabrın 23-də) Ermənistanın fransalı istehsalıçılardan müəyyən miqdarda silah alacağını rəsmən sənədləşdirəcəyik. Ermənistanın öz səmasını qorumasına imkan verəcək saziş imzalayacağıq”.
Ermənistan Fransanın dəstəyinə bel bağlaya bilərmi? Bu sualı nazir belə cavablandırıb: “Ermənistana dinc əhalisini və sərhədlərini qorumaq imkanı vermək çox vacibdir”.
Fransanın müdafiə nazirinin daha öncə dediyinə görə, o hesab etmir ki, Paris hərbi müdaxilə yolu ilə Ermənistanın ərazi bütövlüyünü qoruya bilər. Lekornyu onu da deyib ki, Fransa Ermənistanın müdafiə tələbatını öyrənir.
“Fransanın Ermənistanı silahlandırmağa start verməsi regionda qarşıdurma yaratmaq məqsədi güdür”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli hesab edir ki, Fransanın Ermənistanı silahlandırmaqda məqsədi regionda yeni qarşıdurma yaratmaqdır: “Əvvəla, Fransanın Ermənistana silah satması, ilk növbədə, Azərbaycana qarşı düşmənçilikdir. Düzdür, Fransa Ermənistanla yaxın dövlətdir. Ancaq indiki dövrdə Ermənistanı silahlandırmaq yeni münaqişə yaratmağa xidmət edir. Ən azından ona görə ki, Azərbaycanla Ermənistan arasında sülh sazişi imzalanmayıb. Azərbaycan öz ərazi bütövlüyünü və suverenliyini tam təmin etdikdən sonra bölgədə yaranmış yeni status-kvo Fransaya sərf etmir. Ona görə də Paris bütün mümkün təxribatçı addımlara əl atır. Belə olan halda Fransanın Ermənistanı silahlandırmağa start verməsi regionda qarşıdurma yaratmaq məqsədi güdür. O da məlumdur ki, Fransa müxtəlif beynəlxalq təşkilatlarda Azərbaycana qarşı qaralama kampaniyası aparır. Ermənilərə silah və hərbi texnikanın tədarükü Ermənistanda revanşizmin güclənməsinə, regionda gərginliyin artmasına xidmət edir. Görünən odur ki, rəsmi Paris Cənubi Qafqazda sülhün və sabitliyin olmasını istəmir. Hər vasitə ilə qarşıdurma yaratmağa çalışır. Fransa Cənubi Qafqaza geosiyasi rəqabət gətirməyə çalışır və bunun üçün Ermənistanı müharibəyə təhrik edir. Fransanın siyasi elitalarının, hakimiyyət komandasının və xüsusilə də ölkə prezidenti Emmanuel Makronun Azərbaycana qarşı aqressiv mövqeyi əslində rəsmi Bakı üçün heç bir əhəmiyyət kəsb etmir. Çünki Azərbaycan regionun lider dövlətidir. Azərbaycan Türkiyə ilə rəsmi strateji müttəfiqdir. Üstəlik, Aərbaycanın digər dost və tərəfdaş ölkələri də var”.
Vidadi ORDAHALLI
